ތ. ހިރިލަންދޫ ރަށު ޖެޓީއަށް ކަޅުތެލާއި ފިއްލެއު އަންނަ މައްސަލައިގައި އެ ރަށު ޒުވާނުން ކަންބޮޑުވުން ފާޅުކޮށް މުޒާހަރާކުރުމާ ގުޅިގެން، ރަށުގައި އުފެދޭ ފިއްލެއު ދުވަހުން ދުވަހަށް ރަށުން ބޭރުކޮށްދޭނެ ފަރާތެއް ހޯދުމަށް ކޮޅުމަޑުލު ހިރިލަންދޫ ކައުންސިލްގެ އިދާރާއިން އިޢުލާނުކޮށްފިއެވެ.
ކައުންސިލުން މިއަދު އިޢުލާނުކުރީ ކުރިއަށްއޮތް 2 އަހަރު ދުވަހުގެ މުއްދަތަށް މި މަސައްކަތް ކޮށްދޭނެ ފަރާތެއް ހޯދުމަށެވެ. މި އިޢުލާނު ކޮށްފައިވަނީ ރަށު ޖެޓީއަށް ކަޅުތެލާއި ފިއްލެއު އަންނަ މައްސަލައާ ގުޅިގެން ރަށުގެ ބައެއް ޒުވާނުން އެކަމުގެ ކަންބޮޑުވުން ފާޅުކޮށް، ހިރިލަންދޫ ކައުންސިލް އިދާރާގެ ކުރިމަތީގައި މުޒާހަރާކޮށްފައި ވަނިކޮށެވެ. މުޒާހަރާގެ ބައިވެރިން ވަނީ މިކަމާ ގުޅޭގޮތުން އެ ފަރާތްތަކުގެ ހުރި ކަންބޮޑުވުންތައް ފާޅުކޮށްފައެވެ.
މި މައްސަލައާ ގުޅިގެން މީގެ ދެ ދުވަސް ކުރިން ހިރިލަންދޫ ކައުންސިލުން މީސްމީޑިއާގައި އާންމުކުރި ޕޯސްޓެއްގައި ބުނެފައިވަނީ، މައްސަލައަށް ހައްލެއް ހޯދުމުގެ ގޮތުން ކައުންސިލުން އެއިރު ވަނީ ރަށުގައި މަސްކައްކާ ފަރާތްތަކާއި ރަށުގެ އެކި އެހެނިހެން ފަރާތްތަކާއެކު މަޝްވަރާކޮށްފައި ކަމަށެވެ. އަދި އެ މަޝްވަރާތަކަށްފަހު، ރަށުން ފިއްލެއު ބޭރުކުރެވޭނެ އިންތިޒާމެއް ހަމަޖެއްސުމަށް ނިންމާފައިވާ ކަމަށްވެސް ކައުންސިލުން ބުންޏެވެ.
ހިރިލަންދޫ އަކީ ޒަމާނުއްސުރެ ފުޅާ ދާއިރާއެއްގައި މަސްވެރިކަމާއި މަސްކެއްކުމުގެ ވިޔަފާރި ކުރަމުން އަންނަ، މި މަސައްކަތްތަކުގައި މުޅި އަތޮޅުގައިވެސް ނަމޫނާ ރަށެކެވެ. ރަށުގެ އިގްތިސާދުގެ މައިގަނޑު ބިނާވެފައިވަނީ މި ސިނާއަތުގެ މައްޗަށެވެ. ހިރިލަންދޫ އަކީ އާދައިގެ ގޮތަކަށް މަސްކައްކައި ހިއްކުމުގެ އިތުރުން، ވެކިއުމްކޮށް ހިއްކި މަހުގެ އުފެއްދުންތައް ތައްޔާރުކުރުމަށް ރާއްޖޭގައި ވަރަށް މަޝްހޫރު ރަށެކެވެ. މިއީ ރަށު ފެންވަރުގައި ވިޔަފާރި އުސޫލުން ވަރަށް ފުޅާކޮށް ކުރާ މަސައްކަތެކެވެ.
މި ރަށުގައި ކައްކައި ހިއްކައިގެން ތައްޔާރުކުރާ ކަނޑުމަހުގެ ބާވަތްތަކަކީ މާލެއާއި ރާއްޖޭގެ އެކި ހިސާބުތަކުގެ ބާޒާރުތަކުގައި ވަރަށް ޑިމާންޑް ބޮޑު، އިތުބާރު ލިބިފައިވާ އުފެއްދުންތަކެކެވެ.
ރަށުގައި އުފެދޭ ފިއްލެއު ދުވަހުން ދުވަހަށް ރަށުން ބޭރުކުރުމުގެ މަސައްކަތުގެ ބީލަން ކުރިއަށްއޮތް ހަފުތާގައި އިއުލާނުކުރާނެ ކަމަށް ކައުންސިލުން ކުރިން ބުނެފައިވާއިރު، އެކަމަށް ޝައުގުވެރިވާ ފަރާތްތަކުން މިއަދުން ފެށިގެން 2 ސެޕްޓެންބަރު 2026 ވާ ބުދަ ދުވަހުގެ ހެނދުނު 11:00 ގެ ނިޔަލަށް ބީލަމުގައި ރަޖިސްޓްރީވުމުގެ ފުރުސަތު މިހާރު ވަނީ ހުޅުވާލާފައެވެ. ބީލަމުގައި ރަޖިސްޓްރީވުން ކުރިއަށްދާނީ ކައުންސިލުން އާންމުކޮށްފައިވާ އޮންލައިން ލިންކު މެދުވެރިކޮށެވެ.
މި ބީލަމުގައި ރަޖިސްޓްރީވުމުގެ ފީއެއްގެ ގޮތުގައި 100 ރުފިޔާ ކަނޑައަޅާފައިވާއިރު، ކައުންސިލުން ބުނެފައިވަނީ ބީލަން ހުށަހެޅުމުގެ ފުރުސަތު ލިބިގެންދާނީ އެ މުއްދަތުގެ ތެރޭގައި ރަޖިސްޓްރީވާ ފަރާތްތަކަށް އެކަނި ކަމަށެވެ. ރަޖިސްޓްރީނުވާ ފަރާތްތަކަށް ބީލަން ހުށަހެޅުމުގެ ފުރުސަތެއް ނުލިބޭނެއެވެ.
މި ބީލަމާ ގުޅިގެން މަޢުލޫމާތު ދިނުމަށް ބާއްވާ ޕްރީ ބިޑް މީޓިންގ އޮންނާނީ 2 ސެޕްޓެންބަރު 2026 ވާ ބުދަ ދުވަހުގެ މަންދުރުފަހު 13:15 ގައެވެ. އަދި ބީލަން ހުށަހެޅުމާއި ބީލަން ހުޅުވުމުގެ ބައްދަލުވުން އޮންނާނީ 3 ސެޕްޓެންބަރު 2026 ވާ ބުރާސްފަތި ދުވަހުގެ ހެނދުނު 11:00 ގައެވެ. ކައުންސިލުން ބުނި ގޮތުގައި މި ދެ ބައްދަލުވުންވެސް ކުރިއަށްދާނީ ތ. ހިރިލަންދޫ ކައުންސިލްގެ އިދާރާގައެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!