ސްޕެނިޝް ފުޓުބޯޅައިގެ އެންމެ ވާދަވެރި އަދި ފޯރިގަދަ ކުރިމަތިލުން ކަމަށްވާ އެލް ކްލެސިކޯގައި، ރެއާލް މެޑްރިޑްގެ ކޯޗުކަމާ ހަވާލުވެ ހުރި ހޯސޭ މޮރީނިއޯއާ ދެކޮޅަށް އެފްސީ ބާސެލޯނާ އާދީއްތަ ދުވަހު ނުކުންނާނެ އެވެ.

ތޭރަ އަހަރަށް ފަހު މި ކުރިމަތިލުމަށް މޮރީނިއޯ އެނބުރި އަންނައިރު، ދެ ޓީމުގެ ކުރިމަތިލުމުގެ އެންމެ ބޮޑު ސަމާލުކަމެއް ހުއްޓިފައިވަނީ ބާސާގެ ޒުވާން ތަރި ލަމީން ޔަމާލް އަދި ރެއާލްގެ ފޯވާޑް ކީލިއަން އެމްބާޕޭގެ ވާދަވެރިކަމަށެވެ. މިއީ ލަންޑަނުގައި ބާއްވާ ބެލޮންޑިއޯ އެވޯޑު ދިނުމުގެ ރަސްމިއްޔާތުގެ އެއް ދުވަސް ކުރިން މި ދެ ކުޅުންތެރިން އެއް ދަނޑެއްގައި ބައްދަލުކުރާ މެޗެވެ.

Ad
rt

ލީގުގެ ތާވަލަށް ބަލާއިރު ބާސެލޯނާ އޮތީ ކުޅުނު ނުވަ މެޗުން ވެސް މޮޅުވެ، 39 ލަނޑު ޖަހައިގެން ހަ ޕޮއިންޓުގެ ލީޑަކާއެކު އެއްވަނައިގަ އެވެ. މި މެޗުން މޮޅުވެއްޖެނަމަ އެ ޓީމުގެ ލީޑު ނުވަ ޕޮއިންޓަށް ފުޅާވާނެ އެވެ. އަދި އެތުލެޓިކޯ މެޑްރިޑްގެ ފަހަތުން ތިންވަނައިގައި އޮތް ރެއާލް މެޑްރިޑް މޮޅުވެއްޖެނަމަ އެ ފަރަގު ތިން ޕޮއިންޓަށް ކުޑަވާނެ އެވެ. އެންމެ ފަހުން ކުޅުނު ހަތް ކްލެސިކޯގެ ތެރެއިން ހަ މެޗުން ރެއާލް ބަލިވެފައިވާއިރު، ޗެމްޕިއަންސް ލީގުގައި އާރްބީ ލައިޕްޒިގް އަތުން 4-1 އިން މޮޅުވި މެޗަށް ފަހު މޫވިސްޓާ އަށް ދިން އިންޓަވިއުއެއްގައި މޮރީނިއޯ ބުނީ، މިއީ ލީގުގެ އެހެން މެޗެއް ނަމަވެސް، އެހެން މެޗުތަކާ މުޅިން ތަފާތު މެޗެއް ކަމަށެވެ.

ކޭމްޕް ނޯގައި 2010 ވަނަ އަހަރުގެ ފިނި ނޮވެމްބަރު މަހު ޕެޕް ގާޑިއޯލާގެ ބާސެލޯނާ އަތުން މޮރީނިއޯގެ ރެއާލް މެޑްރިޑް 5-0 އިން ބަލިވި ހަނދާންތައް ބާސާގެ ސަޕޯޓަރުން އަދިވެސް ހަނދާން އެބަހުއްޓެވެ. ބާސެލޯނާގެ 35 އަހަރުގެ ސަޕޯޓަރެއް ކަމަށްވާ އަލެއިކްސް ސޮލާ ބުނީ، އެ މެޗުގެ 5-0 ގެ ނަތީޖާގެ އިތުރުން މެޗުގެ ކުރިންނާއި ފަހުން އޮތް ބޮޑު ނުތަނަވަސްކަން ހަނދާން ހުންނަ ކަމަށެވެ. މެޗު ފެށުމުގެ ކުރިން މުޅި ހަފުތާ ޒުވާބުގައި ހޭދަވާ ކަމަށާއި، ރެއާލް ބަލިކުރުމަކީ އަބަދުވެސް ހާއްސަ ކަމެއް ނަމަވެސް މޮރީނިއޯ ބަލިކޮށްލުމުން ހޯމަ ދުވަހުގެ ހެނދުނު ވެސް ހިނިތުންވެވޭ ކަމަށް އޭނާ ފާހަގަކުރި އެވެ.

ހަންސީ ފްލިކްގެ އިރުޝާދުގެ ދަށުން ބާސެލޯނާ ވަރުގަދަކޮށް އޮތް ނަމަވެސް، އެ ޓީމު މި މެޗަށް ނުކުންނަނީ ޕީއެސްޖީ އަތުން 4-2 އިން ބަލިވެ، މި ސީޒަނުގެ ފުރަތަމަ ބަލިވުމާ ކުރިމަތިލާން ޖެހިފައިވާ ދަނޑިވަޅެއްގަ އެވެ. ޕެރިހަށް ދިއުމުގެ ކުރިން ގެޓަފޭ، ގަލަތަސަރާއި އަދި ރެއާލް ބެޓިސް ކޮޅަށް ގިނަ ލަނޑުތަކެއް ޖެހި ނަމަވެސް، ޑިފެންސްގެ މައްސަލަތަކެއް އެބަހުއްޓެވެ. އަނިޔާގެ ސަބަބުން އެރިކް ގާސިއާ އަދި ހުކުރު ދުވަހުގެ ފަރިތަކުރުންތަކުގައި ބައިވެރިނުވި ޖޫލްސް ކޫންޑޭ ނުކުޅޭއިރު، ފުލްބެކްގެ ގޮތުގައި ފްލިކްގެ އޮޕްޝަންތަކަކީ ޕައު ކުބާސީ އާއި ޖެރާޑް މާޓިންގެ އަރިމަތިން ޒަވީ އެސްޕާޓް އަދި ޔާއޯ ކަންސޭލޯ އެވެ. މީގެ އިތުރުން ޑެނީ އޮލްމޯ އަށް ލިބުނު މަސްގަނޑުގެ އަނިޔާއާ ގުޅިގެން ޓީމުގެ މެދުތެރެއަށް ވެސް ވަނީ އުނދަގޫތަކެއް ކުރިމަތިވެފަ އެވެ.

ޗެމްޕިއަންސް ލީގުގައި ކުޅުނު ތިން މެޗުން ވެސް މޮޅުވެފައިވާ ރެއާލް މެޑްރިޑުން އެންމެ ފަހުން ލައިޕްޒިގް ބަލިކުރީ ބެނާޑޯ ސިލްވާ، އާރްދާ ގުލާ، އެމްބާޕޭ އަދި ޔާން ޑިއޮމެންޑޭގެ ލަނޑުތަކުންނެވެ. އެހެން ނަމަވެސް، ސަސްޕެންޝަންގެ ސަބަބުން ވިނީޝިއަސް ޖޫނިއާ މި މެޗުގައި ނުކުޅޭނެ އެވެ. އެހެންކަމުން ވާތުފަޅިން ޑިއޮމެންޑޭ ފެނުމުގެ ފުރުސަތު އޮތްއިރު، ޖޫޑް ބެލިންހަމް އާއި ގުލާގެ އެހީތެރިކަމާއެކު ފްލިކްގެ ޑިފެންސް ލައިންގެ ފަހަތުން ލިބޭ ހުސް ޖާގަތަކަށް އެމްބާޕޭ އެޓޭކް ކުރާނެ ކަމަށް ބެލެވެ އެވެ. މީގެ އިތުރުން ފަހަކަށް އައިސް ކަނާތު ބެކަށް ކުޅޭ ފެޑެރީކޯ ވަލްވާޑޭ އެ މަގާމުގައި ބަހައްޓާނެތޯ ނިންމާނީ މޮރީނިއޯ އެވެ.

މެޗުގައި ޔަމާލް ހުއްޓުވުމަށް ރެއާލްގެ ޑިފެންޑަރުން އިތުރަށް ސަމާލުވާން ޖެހޭއިރު، އޭގެ ސަބަބުން ޕެޑްރީ އަށާއި، ލީގުގައި މިހާތަނަށް 12 ލަނޑު ޖަހާފައިވާ ރަފީނިއާ އަށް ފުރުސަތުތައް ތަނަވަސްވެގެންދާނެ އެވެ. ރެއާލް މެޑްރިޑްގެ 26 އަހަރުގެ ސަޕޯޓަރެއް ކަމަށްވާ ލޫސިއާ މާޓިން ބުނި ގޮތުގައި، ކޭމްޕް ނޯގައި މޮޅުވެވިއްޖެނަމަ އެ ޓީމަށް ލީގު ކާމިޔާބު ކުރެވިދާނެ ކަމުގެ އުންމީދު އާވާނެ އެވެ. ބައްޕައާއެކު މެޗު ބަލަން ދަތުރުކުރާ މާޓިން ބުނީ ހިތްވަރާއެކު ކުޅެފިނަމަ އެކަން ވާނެ ކަމަށާއި އޭނާގެ އުންމީދު އެންމެ ބޮޑަށް ގުޅިފައިވަނީ އެމްބާޕޭއާ ކަމަށެވެ.