ކެނެޑާގެ ވެންކޫވަރުގައި ކުރިއަށްދާ ޓެޑް 2025 ކޮންފަރެންސްގައި ގޫގުލްއިން އެކުންފުނީގެ އެކްސްޓެންޑެޑް ރިއަލިޓީ (އެކްސްއާރު) އައިނު ދައްކާލައިފިއެވެ. މިއީ ސްމާޓްފޯނަކާ ގުޅާލެވޭ، ލައިވްކޮށް ތަރުޖަމާކުރުމާއި ކުރިން ބެލި މަންޒަރުތައް ދެނެގަތުމުގެ ޤާބިލުކަން ލިބިފައިވާ އައިނެކެވެ.
ގޫގުލްގެ އެކްސްއާރު ޑިވިޜަންގެ ވައިސް ޕްރެޒިޑެންޓް އަދި ޖެނެރަލް މެނޭޖަރު ޝަހްރާމް އިޒާދީ މި އައިނާ ބެހޭ ގޮތުން މަޢުލޫމާތު ދެއްވިއެވެ. އޭނާ ވިދާޅުވި ގޮތުގައި މި އައިނަކީ ކެމެރާއަކާއި، މައިކްރޯފޯނަކާއި، ސްޕީކަރުތަކެއް ހަރުކުރެވިފައިވާ އާލާތެކެވެ.
ކޮންފަރެންސްގައި މި އައިނުގެ ބައެއް ޚާއްޞަ ސިފަތައް ދައްކާލެވުނެވެ. މީގެ ތެރޭގައި އޯޑިއަންސްއާ ބެހޭ ހައިކޫއެއް އުފެއްދުމާއި، ތަފާތު ބަސްތަކަށް ލިޔުން ތަރުޖަމާކުރުމާއި، މިއުޒިކް ދެނެގަނެ ޔޫޓިއުބް މިއުޒިކް އެޕް މެދުވެރިކޮށް ޖައްސާލުން ހިމެނެއެވެ.
އެޕަލް އަދި ސެމްސަންގް ފަދަ ކުންފުނިތަކުން މިކްސްޑް ރިއަލިޓީ ހެޑްސެޓްތައް ތަޢާރަފުކޮށްފައިވާއިރު، މެޓާ، ގޫގުލް، އެޕަލް، ސެމްސަންގް އަދި ސްނެޕްޗެޓް ފަދަ ކުންފުނިތަކުން ލުއި އެކްސްއާރު އައިނެއް ތައްޔާރުކުރުމުގެ މަސައްކަތް ކުރަމުންދާކަން ފާހަގަކުރެވެއެވެ.
ގޫގުލްގެ މި އާ ޓެކްނޮލޮޖީއަކީ ކުރިމަގުގައި މުވާސަލާތާއި މަޢުލޫމާތު ހޯދުމުގެ ދާއިރާގައި އިންޤިލާބީ ބަދަލުތަކެއް ގެނެސްދޭނެ އެއްޗެއްކަމަށް ބެލެވެއެވެ. ނަމަވެސް މި ޓެކްނޮލޮޖީ ބޭނުންކުރުމުގައި ޕްރައިވަސީއާ ގުޅޭ ކަންބޮޑުވުންތަކެއް އުފެދިދާނެކަމަށްވެސް ލަފާކުރެވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!