ސްރީލަންކާއަށް ކުރެއްވި ކާމިޔާބު ފުރަމާނަ ދަތުރުފުޅަށްފަހު، އެ ގައުމުގެ ރައީސް އަދި ބޮޑުވަޒީރާއެކު ބޭއްވުނު ފައިދާހުރި މަޝްވަރާތަކުން ވަރަށް ބޮޑު ހިތްވަރަކާއި އިތުބާރެއް ލިބިވަޑައިގެންފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ރައީސް މިހެން ވިދާޅުވީ ލަންކާ ދަތުރުފުޅު ނިންމަވާލައްވަމުން މީސް މީޑިއާގައި ކުރެއްވި ޕޯސްޓެއްގައެވެ.

Ad
rt

ރައީސުލްޖުމްހޫރިއްޔާ ވިދާޅުވީ ސްރީލަންކާގެ ރައީސް އަނޫރާ ކުމާރާ ޑިސަނާޔަކެ އަދި ބޮޑުވަޒީރު ޑރ. ހަރިނީ އަމަރަސޫރިޔާއާއެކު ތަފާތު އެކި ދާއިރާތަކުން ބޭއްވުނު މަޝްވަރާތަކަކީ ދެ ގައުމުގެ ގުޅުން އިތުރަށް ހަރުދަނާވެގެންދިޔަ ބައްދަލުވުންތަކެއް ކަމަށެވެ.

"އަޅުގަނޑުމެން އެއްބަސްވި ކަންކަމަކީ ދެ ގައުމުގެ ރައްޔިތުންގެ ލާބައާއި މަންފާއަށްޓަކައި ނަތީޖާ ނެރެދޭނެ ކަންތައްތަކަކަށް ހެދުމަށްޓަކައި، ގުޅިގެން މަސައްކަތް ކުރުމަށް އަޅުގަނޑު އުންމީދުކުރަމެވެ،" ރައީސް ވިދާޅުވިއެވެ.

މި ދަތުރުފުޅުގައި ރައީސުލްޖުމްހޫރިއްޔާގެ ދެކަނބަލުންނަށާއި ވަފުދަށް ވިދާޅުވި ހޫނު މަރުހަބާއާއި ބެހެއްޓެވި ގާތްކަމަށްޓަކައި ސްރީލަންކާ ސަރުކާރަށާއި އެ ގައުމުގެ ރައްޔިތުންނަށް ރައީސް ވަނީ އިޚްލާޞްތެރި ޝުކުރެއް ދަންނަވާފައެވެ.

ރައީސް ވިދާޅުވީ އެމަނިކުފާނު ލަންކާއިން ފުރައިގެން ވަޑައިގަންނަވަނީ ދެ ގައުމުގެ ދެމެދުގައި އޮތް ޒަމާންވީ ގުޅުން އިތުރަށް ބަދަހިކުރުމުގެ އާ އަޒުމަކާއެކު ކަމަށެވެ.

ރައީސުލްޖުމްހޫރިއްޔާގެ ދެކަނބަލުން ސްރީލަންކާއަށް ކުރެއްވި މި ފުރަމާނަ ދަތުރުފުޅަކީ އެ ގައުމުގެ ރައީސް އަނޫރާ ކުމާރާ ޑިސަނާޔަކެގެ ދަޢުވަތަކަށް ކުރެއްވި ދަތުރުފުޅެކެވެ.

ދަތުރުފުޅު ނިންމަވާލައްވަމުން ރައީސް ވަނީ ދިވެހިރާއްޖެއާއި ސްރީލަންކާގެ އެކުވެރިކަން އަބަދަށް ދެމިއޮތުމަށް އެދިވަޑައިގެންފައެވެ.