ސްރީލަންކާއަށް ކުރިމަތިވެފައިވާ ހަކަތައިގެ ބޮޑު ދަތިކަމުން އަރައިގަތުމަށްޓަކައި، ކޮންމެ ހަފުތާއެއްގެ ބުދަ ދުވަހަކީ ސަރުކާރު ބަންދު ދުވަހެއްގެ ގޮތުގައި އެގައުމުގެ ސަރުކާރުން ރަސްމީކޮށް އިޢުލާނުކޮށްފިއެވެ.

މި ނިންމުމާއެކު، 18 މާޗު 2026 އިން ފެށިގެން އެގައުމުގެ ސަރުކާރު މުއައްސަސާތައް ހަފުތާއަކު މަސައްކަތް ކުރާނީ ހަތަރު ދުވަހުއެވެ.

Ad
rt

ލަންކާ ސަރުކާރުން މި ފިޔަވަޅު އަޅާފައިވަނީ، މިދިޔަ ފެބުރުވަރީ މަހުގެ ފަހުކޮޅު އެމެރިކާ-އިސްރާއީލް އިއްތިހާދާއި އީރާނާ ދެމެދު ފެށުނު ހަނގުރާމައިގެ ސަބަބުން ކުރިމަތިވި ތެލުގެ ތަދުމަޑުކަމަށް އިޖާބަދިނުމުގެ ގޮތުންނެވެ.

މި ހަނގުރާމައާ ގުޅިގެން "ސްޓްރެއިޓް އޮފް ހޯމޫޒް" ބަންދުވުމުގެ ސަބަބުން ދުނިޔޭގެ ތެލާއި ގޭހުގެ ސަޕްލައިގެ ގާތްގަނޑަކަށް 20 އިންސައްތަ ވަނީ މެދުކެނޑިފައެވެ. މީގެ ސަބަބުން ސްރީލަންކާ ފަދަ ތެޔޮ އެތެރެކުރުމަށް ބަރޯސާވާ ގައުމުތަކަށް ވަނީ އިގްތިސާދީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ.

މި ސިޔާސަތު ތަންފީޒުކުރުމަށް ނިންމާފައިވާ ގޮތުގެ ތަފުސީލުތަކަށް ބަލާއިރު، ބުދަ ދުވަހުގެ ބަންދު އަމަލުކުރެވޭނީ ސަރުކާރުގެ އިދާރާތަކަށާއި، ސްކޫލްތަކާއި، ޔުނިވަރސިޓީތަކުގެ އިތުރުން އަދުލު އިންސާފުގެ ދާއިރާގެ މުއައްސަސާތަކަށެވެ. ނަމަވެސް، ސިއްހީ ހިދުމަތްތަކާއި، ބަނދަރުގެ ހިދުމަތްތަކާއި، ފެނުގެ ހިދުމަތުގެ އިތުރުން ކަސްޓަމްސް ފަދަ ޒަރޫރީ ހިދުމަތްތައް މެދުނުކެނޑި ފުރިހަމައަށް ކުރިއަށްދާނެއެވެ.

ސަރުކާރުން ބުދަ ދުވަސް ބަންދު ދުވަހެއްގެ ގޮތުގައި ހިޔާރުކުރީ ސްޓްރެޓީޖިކް ނިންމުމެއްގެ ދަށުންނެވެ. އެއީ ހުކުރު ދުވަސް ބަންދުކޮށްފިނަމަ، ހަފުތާ ބަންދާއެކު ޖެހިޖެހިގެން ތިން ދުވަހު އޮފީސްތައް ބަންދުވެފައި އޮތުމުގެ ސަބަބުން އާންމު ހިދުމަތްތަކަށް ބޮޑެތި ބުރޫތަކެއް އަރާފާނެތީއެވެ.

މީގެ އިތުރުން، ތެޔޮ ބޭނުންކުރާ މިންވަރު ކޮންޓްރޯލްކުރުމަށްޓަކައި "ނޭޝަނަލް ފިއުލް ޕާސް" ކިއުއާރު ސިސްޓަމް ވަނީ އަލުން ތައާރަފުކޮށްފައެވެ. މި ސިސްޓަމްގެ ދަށުން، އަމިއްލަ ކާރުތަކަށް ހަފުތާއަކު ދޫކުރެވޭނީ 15 ލީޓަރުގެ ތެލެވެ. އަދި ސައިކަލުތަކަށް ހަފުތާއަކު ދޫކުރަން ހަމަޖެހިފައިވަނީ 5 ލީޓަރުގެ ތެލެވެ.

ސްރީލަންކާގެ ރައީސް އަނޫރާ ކުމާރަ ދިސާނަޔަކަ މި ހާލަތާ ގުޅޭގޮތުން ވިދާޅުވީ، މިއީ "އެންމެ ގޯސް ހާލަތަކަށް ތައްޔާރުވުން" ކަމަށެވެ. ރައީސް ފާހަގަކުރެއްވި ގޮތުގައި މިފަދަ ހަރުކަށި ފިޔަވަޅުތަކެއް މިވަގުތު ނާޅައިފިނަމަ، އެގައުމުގައި މިހާރު ހުރި ތެލުގެ ރިޒާވް ކުރިއަށް އޮތް ހަ ހަފުތާގެ ތެރޭގައި އެއްކޮށް ހުސްވާނެއެވެ.

މި މައްސަލައަށް ދާއިމީ ހައްލެއް ހޯދުމުގެ ގޮތުން، ސްރީލަންކާ ސަރުކާރުން މިހާރު ދަނީ އިންޑިއާއާއި ރަޝިއާއާއެކު ކުއްލި މަޝްވަރާތަކެއް ކުރަމުންނެވެ.