ބީއެމްއެލްއިން މާލޭގައި ބިޒްނަސް ސެންޓަރެއް ހުޅުވައިފި

ވިޔަފާރިތަކަށް އެހީތެރިކަން ފޯރުކޮށްދިނުމަށް ބެންކް އޮފް މޯލްޑިވްސްއިން މާލޭގައި ބިޒްނަސް ސެންޓަރެއް ހުޅުވައިފިއެެވެ.

ބީއެމްއެލްއިން މާލޭގައި ހުޅުވި ފުރަތަމަ ބިޒްނަސް ސެންޓަރު ހުޅުވައިދެއްވުމަށްފަހު ވާހަކަދައްކަވަމުން އިކޮނޮމިކް މިނިސްޓަރ ފައްޔާސު އިސްމާއިލް ވިދާޅުވީ، މިއަންނަ އަހަރުގެ ކުރީކޮޅު ބޭންކްރަޕްސީ ޤާނޫނަކާއި އިންސޮލްވެންސީ ގާނޫނެއް މަޖިލީހަށް ހުށައަޅުއްވާނެކަމަށެވެ.

މާލީ މައްސަލަތައް ހައްލުކުރުމަށް މިހާރު ކޯޓުތަކުގައި ދިގު މުއްދަތެއް ނަގާކަމަށް މިނިސްޓަރ ވިދާޅުވިއެވެ. އަދި މިހާރު މިފަދަ މައްސަލަތައް ދިގުދެމިގެންގޮސް ބެންކާއި، ލޯނުނެގިފަރާތާއި، މޯގޭޖްކުރި ފަރާތާއި، ގެރެންޓަރވެސް މިކަމުގައި ގިނަ ދުވަސްތަކެއް ހޭދަކުރަންޖެހޭކަމަށް މިނިސްޓަރ ވިދާޅުވިއެވެ. އެހެންކަމުން މިޤާނޫނު ވެގެންދާނީ މިފަދަ މައްސަލަތަކަށް އަވަސް ހައްލެއް ލިބިގެންދާނެ ޤާނޫނަކަށްކަމަށް މިނިސްޓަރ ވިދާޅުވިއެވެ.

"އަޅުގަނޑުމެން އިރާދަކުރެއްވިއްޔާ މިއަންނަ އަހަރުގެ ކުރީކޮޅުގައި އިންސޮލްވެންސީ ޤާނޫނަކާއި ބޭންކްރަޕްސީ ޤާނޫނެއް މަޖިލީހަށް ހުށައަޅާނަން. އޭގެސަބަބުން އަޅުގަނޑު ޤަބޫލުކުރާ ގޮތުގައި މި ދެންނެވި ކަހަލަ ޒަމާންވީ ކަންކަމަށް ހައްލެއް ލިބިގެންދާނެ. ލޯނު ނެގިފަރާތަށްވެސް، ލޯނު ނުދެއްކިގެން އުޅޭ ފަރާތަށްވެސް ބެންކަށްވެސް، އަދި އިންވެސްޓަރުންނަށްވެސް ޔަޤީންކަން އިތުރުވެގެންދާނެ." އިކޮނޮމިކް މިނިސްޓަރ ފައްޔާސު އިސްމާއިލް ވިދާޅުވިއެވެ.

މި ބިޒްނަސް ސެންޓަރުގައި ކުދި އަދި މެދު ފަންތީގެ ވިޔަފާރިތަކަށް ކަނޑައަޅާފައިވާ ހާއްސަ ރިލޭޝަންޝިޕް މެނޭޖަރުން ތިބޭނެކަމަށް ބީއެމްއެލްއިން ބުނެއެވެ. އޭގެއިތުރުން ވިޔަފާރިއާ ގުޅޭ ލަފާޔާއި އިރުޝާދު ދިނުމާއި، ވިޔަފާރިތަކަށް އަމާޒުކޮށް ބޭންކުން ދޫކުރާ ލޯނާ ގުޅޭ މައުލޫމާތު ދިނުމާއި، ޕީއޯއެސް އަދި ޕޭމަންޓް ގޭޓްވޭ ފަދަ މަރޗަންޓް ހިދުމަތްތަކަށް އެހީތެރިކަން މި ބިޒްނަސް ސެންޓަރުން ލިބޭނެކަމަށް ބީއެމްއެލްއިން ބުނެއެވެ.

މި ރަސްމިއްޔާތުގައި ވާހަކަ ދައްކަވަމުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ ޓިމް ސޯޔާރ ވިދާޅުވީ ބޭންކް އޮފް މޯލްޑިވްސް އިން މިހާރުވެސް އެކި އެކި ދާއިރާގެ ވިޔަފާރި ހިންގާ 1300 ވިޔަފާރިތަކަށް 800 މިލިއަނަށްވުރެ ގިނަ ރުފިޔާގެ ލޯނު ދޫކޮށްފައިވާކަމަށެވެ.

ބީއެމްއެލްއިން މި އަހަރު ތެރޭގައި އައްޑޫ ސިޓީގައިވެސް ބިޒްނަސް ސެންޓަރެއް ވަނީ ހުޅުވާފައެވެ. އަދި ކައިރި މުސްތަގްބަލެއްގައި މިފަދަ ސެންޓަރުތައް ހުޅުމާލެ އަދި ކުޅުދުއްފުށީގައި ވެސް ހުޅުވިގެންދާނެކަމަށް އެ ބެންކުން މައުލޫމާތުދެއެވެ.

As part of our commitment and support for business, we’re pleased to open the first Business Centre in Male’ at Fasmeeru Building, Boduthakurufaanu Magu. It was a pleasure to welcome Minister of Economic Development @faya_i for the inauguration of the new premises tonight. pic.twitter.com/wQLQA2pZs2

— Bank of Maldives (@bankofmaldives) November 12, 2019

މި ބިޒްނަސް ސެންޓަރު ހުންނަނީ ބޮޑުތަކުރުފާނު މަގުގައި ހުންނަ ފަސްމީރު ބިލްޑިންގގައެވެ.