ވޯލްޑް ކަޕް ފުޓްބޯޅަ މުބާރާތުގެ ނޮކައުޓް މަރުހަލާގެ ގަދަ 32 ގެ މެޗުތައް ފެށިގެން ކުރިއަށްދާއިރު، ދުނިޔޭގެ ވަރުގަދަ ޓީމުތަކުގެ ކުރިމަތިލުންތަކާއެކު މުބާރާތުގެ ފޯރި ވަނީ ގަދަވެފައެވެ. މިގޮތުން ހޯމަ ދުވަހު ކުޅޭ ތިން މެޗުގެ ތެރެއިން އެންމެ ފާހަގަކޮށްލެވެނީ ފަސް ފަހަރުގެ ޗެމްޕިއަން ބްރެޒިލާއި ޖަޕާން ބައްދަލުކުރާ މެޗާއި، ދުނިޔޭގެ ގަދަ 10 ގެ ތެރޭގައި ހިމެނޭ ނެދަލެންޑްސް އާއި މޮރޮކޯ ބައްދަލުކުރާ މެޗެވެ.
ބްރެޒިލް އާއި ޖަޕާންގެ ކުރިމަތިލުން
ހިއުސްޓަންގައި ކުޅޭ މި މެޗަކީ ދެ ގައުމުގެ ދެމެދުގައި އޮތް ގާތް ގުޅުމުގެ ސަބަބުން ވެސް ހާއްސަ މެޗެކެވެ. ބްރެޒިލަކީ ޖަޕާނުން ބޭރުގައި އެންމެ ގިނަ ޖަޕާން ދަރިކޮޅުގެ މީހުން ދިރިއުޅޭ ގައުމެވެ. ޖަޕާނުގެ ކޯޗު ހާޖީމޭ މޮރިޔާސޫ ބުނި ގޮތުގައި، އެންމެ ފަހުން ކުޅުނު އެކުވެރިކަމުގެ މެޗުން ޖަޕާން މޮޅުވެފައިވުމުން، ބްރެޒިލުން މި މެޗަށް ނުކުންނާނީ ވަރަށް ބޮޑަށް ތައްޔާރުވެގެންނެވެ.
"އެމީހުން އަހަރެމެންނާ ދެކޮޅަށް ކުޅޭއިރު މާ ބޮޑަށް މޯޓިވޭޓްވާނެ. އެމީހުން ތިބީ އަހަރެމެން ބަލިކުރަން އަމާޒު ހިފައިގެން،" މޮރިޔާސޫ ބުންޏެވެ.
ޖަރުމަނާއި ޕެރަގުއޭގެ ކުރިމަތިލުން
ދުވަހުގެ ދެވަނަ މެޗުގައި ބައްދަލުކުރާނީ ގްރޫޕް އީގެ އެއްވަނަ ހޯދި ޖަރުމަނާއި ޕެރަގުއޭއެވެ. ޖަރުމަނަކީ ގްރޫޕް ސްޓޭޖުގައި އެންމެ ގިނަ ލަނޑު ޖެހި ޓީމެވެ. ޖަރުމަނުގެ ކޯޗު ޖޫލިއަން ނާގަލްސްމަން ބުނީ ޕެރަގުއޭއަކީ ޑިފެންސިވް ކުޅުމެއް ކުޅޭ، ބަލިކުރަން އުނދަގޫ ޓީމެއް ކަމަށެވެ. 2014 ވަނަ އަހަރަށްފަހު ފުރަތަމަ ފަހަރަށް ނޮކައުޓް ބުރަށް ޖަރުމަނު ދަތުރުކުރިއިރު، ޕެރަގުއޭގެ ކެޕްޓަން ގުސްޓާވޯ ގޯމޭޒް ބުނީ މެޗުގެ ކުދިކުދި ތަފްސީލުތަކަށް ސަމާލުކަން ދިނުން މުހިންމު ކަމަށެވެ.
ނެދަލެންޑްސް އާއި މޮރޮކޯގެ ފޯރިގަދަ މެޗު
މި ބުރުގެ އެންމެ ވަރުގަދަ އެއް މެޗަކަށް ވާނީ ދުނިޔޭގެ ރޭންކިންގެ 7 ވަނައިގައި އޮތް ނެދަލެންޑްސް އާއި 6 ވަނައިގައި އޮތް މޮރޮކޯ ބައްދަލުކުރާ މެޗެވެ. ނެދަލެންޑްސްއަކީ ވޯލްޑް ކަޕެއް ކާމިޔާބު ނުކުރެވުނު އެންމެ ވަރުގަދަ ޓީމުގެ ގޮތުގައި ބެލެވޭއިރު، މޮރޮކޯއަކީ 2022 ވަނަ އަހަރުގެ ސެމީ ފައިނަލަށް ދަތުރުކޮށް ދުނިޔެ ހައިރާންކޮށްލި ޓީމެވެ. މޮރޮކޯގެ ގޯލްކީޕަރު ޔާސީން ބޫނޫ ބުނީ 90 މިނެޓަށް ނުވަތަ ޕެނަލްޓީއަށް ދިޔަޔަސް އޭނާގެ ޓީމު އޮތީ ތައްޔާރަށް ކަމަށެވެ.
މެޗުތައް ކުޅޭ ވަގުތު (ރާއްޖެ ގަޑިން)
ބްރެޒިލް - ޖަޕާން: ހޯމަ ދުވަހުގެ ރޭ 22:00 ގައި، މެޗް ކުޅޭނީ ހިއުސްޓަންގައި
ޖަރުމަނު - ޕެރަގުއޭ: ހޯމަ ދުވަހުގ މެންދަމު 1:30 ގައި، މެޗް ކުޅޭނީ ފޮކްސްބަރާގައި
ނެދަލެންޑްސް - މޮރޮކޯ: އަންގާރަ ދުވަހު ހެނދުނު 6:00 ގައި، މެޗް ކުޅޭނީ މޮންޓެރޭގައި
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!