މިރޭގެ ވަގުތެއްގައި، އީރާނުން އިސްރާއީލަށް ދިން ވަރުގަދަ މިސައިލް ހަމަލާތަކާ ގުޅިގެން އިސްރާއީލުގެ މެދުތެރޭގެ މަސްރަޙު ނުހަނު ބޮޑަށް ނުތަނަވަސްވެ، ބޮޑެތި ގެއްލުންތަކެއް ލިބެމުން އެބަދެއެވެ.

އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) އިން ފޮނުވާލި މި ހަމަލާތަކުގެ ނަތީޖާ ވަޒަންކުރުން ހުއްޓުވުމަށްޓަކައި، ހަމަލާތައް އެރި ވަކިވަކި ތަންތަނުގެ މަޢުލޫމާތު އާންމުކުރުން އިސްރާއީލުގެ އަސްކަރީ ސެންސަރުން ވަނީ ވަރަށް ބޮޑަށް ހިފަހައްޓާފައެވެ. ނަމަވެސް، މައިދާނުން ލިބޭ ރިޕޯޓުތައް ބުނާގޮތުގައި އިސްރާއީލުގެ މެދުތެރޭގެ ބެއިޓް ޝެމެޝްގެ މީހުން ދިރިއުޅޭ ސަރަޙައްދަކަށް އީރާނުގެ ބެލިސްޓިކް މިސައިލެއް އެރުމުގެ ސަބަބުން 8 މީހުން މަރުވެ، 20 މީހަކު ވަނީ ޒަޚަމްވެފައެވެ.

Ad
rt

އިސްރާއީލުން ހިފެހެއްޓިނަމަވެސް ލީކްވެފައިވާ ވީޑިއޯތަކުން ފެންނަގޮތުގައި ސެންޓްރަލް އިސްރާއީލުގައި ވަރަށް ބޮޑަށް ރޯވެ އަލިފާނުގެ ހުޅުގަނޑު ފެނެއެވެ. އަދި ބޯ ދުން ފެތުރެމުންދާއިރު އަލިފާން ނިވާ އުޅަނދުތަކާއި އެމްބިއުލާންސްތައް ދުއްވާތީ ވީޑިއޯތަކުން ފެނެއެވެ.

ވޭތުވެދިޔަ 48 ގަޑިއިރު ތެރޭގައި ތެލް އަވީވް އާއި ގުޝް ދާން ސަރަޙައްދުގައި ނުރައްކަލުގެ ރަނގަބީލުގެ އަޑު މެދުނުކެނޑި ދަނީ އިވެމުންނެވެ. އިސްރާއީލުގެ "އެރޯ" އަދި "ޑޭވިޑްސް ސްލިންގް" ވައިގެ ދިފާޢީ ނިޒާމުތަކުން ގިނަ މިސައިލްތަކެއް ހުއްޓުވިކަމަށް ދައުވާކުރި ނަމަވެސް، ބައެއް މިސައިލްތަކާއި އޭގެ ބައިތައް ތެލް އަވީވް، ރާމަތު ގާން އަދި ޔެހޫދު ފަދަ ސަރަޙައްދުތަކަށް ވަނީ އަރާފައެވެ. މަސްރަޙު ދިރާސާކުރާ ފަރާތްތަކުން ބުނާގޮތުގައި އީރާނުގެ މި އުކުޅަކީ ހަމައެކަނި އަސްކަރީ މަރުކަޒުތަކަށް އަމާޒުކުރުމުގެ ބަދަލުގައި، މީހުން ގިނަ ސަރަޙައްދުތަކަށް ހަމަލާދީ އިސްރާއީލުގެ ރައްޔިތުން ނަފްސާނީ ގޮތުން ބަލިކޮށްލުމަށް ކުރާ ކަމެކެވެ.

މި ހަމަލާތަކާ ގުޅޭގޮތުން އިސްރާއީލުން ވަނީ ނޫސްވެރިންނަށް ހަރުކަށި ހުރަސްތަކެއް ކުރިމަތިކުރުވާފައެވެ. އެގޮތުން މިސައިލްތައް ވައްޓާލާ މަންޒަރު ނުވަތަ މިސައިލް އަރައިގެން އުފެދޭ ވަޅުގަނޑުތަކުގެ ލައިވް ފުޓޭޖް ދެއްކުން ވަނީ މަނާކޮށްފައެވެ.

ހަމަނުޖެހުންތައް މުޅި ސަރަޙައްދަށް ފެތުރެމުންދާއިރު، އިސްރާއީލުގެ އުތުރުގެ ސަރަޙައްދުތަކަށް ދިން ހަމަލާތަކެއްގައި 30 އަށްވުރެ ގިނަ މީހުން ޒަޚަމްވެގެން ގަލީލީގެ ހޮސްޕިޓަލްތަކަށް ވަނީ ގެންގޮސްފައެވެ. މީގެ ރައްދުގައި އިސްރާއީލުން ވެސް ދަނީ އީރާނުގެ އުމްރާނީ ވަސީލަތްތަކަށް ހަމަލާދެމުންނެވެ. އެގޮތުން ތެހެރާންގެ ފިރުދައުސީ މައިދާނުގައި ބޭއްވި ޤުދުސް ދުވަހުގެ އެއްވުމަކަށް އިސްރާއީލުން މިއަދު ހަމަލާދީފައިވާ ކަމަށް ރިޕޯޓުތައް ބުނެއެވެ.

އީރާނުގެ އާ އިސް ލީޑަރު މުޖްތަބާ ޚާމަނާއީގެ އިރުޝާދުގެ ދަށުން، އެ ޤައުމުން މިހާރު ގެންގުޅެނީ "ލޮލަކަށް ލޮލެއް" ގެ ހަރުކަށި ސިޔާސަތެކެވެ. މިއީ ފެބްރުއަރީ މަހުގެ ފަހުކޮޅުން ފެށިގެން އެމެރިކާ އާއި އިސްރާއީލުން އީރާނަށް ދެމުންދާ 15،000 އަށްވުރެ ގިނަ ހަމަލާތަކުގެ ރައްދުގައި ކުރާ ކަމެއް ކަމަށް އީރާނުން ބުނެއެވެ.

އަސްކަރީ މާހިރުން ފާހަގަކުރާ ގޮތުގައި، އީރާނުން މިހާރު އަމާޒު ހިފާފައިވަނީ އިސްރާއީލުގެ "ވޭނީ ނުގުތާތަކަށެވެ". މީގެ ބޭނުމަކީ އިސްރާއީލުގެ ސަރުކާރާއި ރައްޔިތުންނާ ދެމެދު ނުތަނަވަސްކަން އުފެއްދުމެވެ. ހޯރްމުޒް ކަނޑުއޮޅި ބަންދުވެފައި އޮތުމާއެކު، މުޅި ސަރަޙައްދުގެ އިޤްތިޞާދަށާއި މަސްރަޙަށް ވަނީ ބޮޑެތި ފިއްތުންތަކެއް ކުރިމަތިވެފައެވެ.