ޔުއެފާ ނޭޝަންސް ލީގުގައި ބުރާސްފަތި ދުވަހު ކްރޮއޭޝިއާއާ ދެކޮޅަށް ކުޅުނު މެޗު 2-1 އިން ކާމިޔާބުކޮށް، އިންގްލެންޑުގެ ކެޕްޓަން ހެރީ ކޭން ގައުމީ ޓީމަށް ޖަހައިދިން 92 ވަނަ ލަނޑާއެކު އަނެއްކާވެސް ރެކޯޑެއް ހަދައިފިއެވެ.

މިއީ އިންގްލެންޑް ޓީމަށް އެންމެ ގިނަ ލަނޑު ޖެހުމުގެ ރެކޯޑް އޭނާ އިތުރަށް ފުޅާކުރި ލަނޑެވެ.

Ad
rt

ވެމްބްލީ ސްޓޭޑިއަމްގައި ކުޅުނު މި މެޗުގައި ފުރަތަމަ ލަނޑު ޖަހައި ކުރިހޯދީ އިންގްލެންޑުންނެވެ. އެގޮތުން މެޗުގެ 24 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މޯގަން ރޮޖާސްއެވެ. ނަމަވެސް މެޗުގެ ފުރަތަމަ ގަޑިއިރު ހަމަވާން ކައިރިވެފައި ވަނިކޮށް، ޕެޓާ ސޫސިޗް ޖެހި ލަނޑުން ކްރޮއޭޝިއާއިން ވަނީ ނަތީޖާ ހަމަހަމަކޮށްފައެވެ. އިންގްލެންޑް މޮޅުވި ލަނޑު މެޗުގެ 64 ވަނަ މިނެޓުގައި ލިބުނު ޕެނަލްޓީއަކުން ޖަހައިދިނީ ކޭންއެވެ.

ދާދިފަހުން ބެލޮންޑިއޯ އެވޯޑު ކާމިޔާބުކުރި ކޭން އިންގްލެންޑް ގައުމީ ޓީމަށް ކުޅެދިން 126 ވަނަ މެޗާއެކު، އޭނާ މިހާރު ވަނީ އެ ގައުމަށް އެންމެ ގިނަ މެޗު ކުޅެދިނުމުގެ ރެކޯޑް އެކަނި ހާސިލުކޮށްފައެވެ. މެޗަށްފަހު ވާހަކަދައްކަމުން ކޭން ބުނީ، މެޗު ފެށުމުން އެންމެ މުހިންމު ކަމަކީ މޮޅުވުމާއި ތިން ޕޮއިންޓް ހޯދުން ކަމަށެވެ.

މި ނަތީޖާއާއެކު ގްރޫޕް އޭ3 ގެ އެއްވަނަ ޓީމު ކަނޑައެޅުން މިހާރު ވަނީ އަންނަ އާދީއްތަ ދުވަހު މެޑްރިޑުގައި ސްޕެއިނާއި އިންގްލެންޑް ބައްދަލުކުރާ މެޗަށް އަމާޒުވެފައެވެ. މި ދެ ޓީމު ވެސް މިހާރު މުބާރާތުގެ ކުއާޓާ ފައިނަލުން ޖާގަ ހޯދާފައިވީ ނަމަވެސް، ސެޕްޓެމްބަރު މަހު ސްޕެއިން އަތުން 3-2 އިން ބަލިވެފައިވާ އިންގްލެންޑަށް ގްރޫޕުގެ އެއްވަނަ ލިބެން އޮތީ ދެ ލަނޑު ނުވަތަ އެއަށްވުރެ ބޮޑު ތަފާތަކުން ސްޕެއިން ބަލިކޮށްގެންނެވެ.

ސްޕެއިނާ ދެކޮޅަށް ކުޅޭ މެޗާ ގުޅޭގޮތުން ބްރޯޑްކާސްޓަރު އައިޓީވީ ސްޕޯޓްސްއަށް ކޭން ބުނީ، އެންމެ ފަހުން އެ ޓީމާ ދެކޮޅަށް ކުޅުނު މެޗުގައި އެދެވޭ ކުޅުމެއް ނުދެއްކުނު ކަން އެނގޭ ކަމަށެވެ. "އަހަރެމެންނަށް މިއަށްވުރެ ރަނގަޅަށް ކުޅެވޭނެކަން އެނގުނު. އަދި އޭރު އަމިއްލަ ނަފްސަށް ބުނިން، 'އެންމެ ރަނގަޅޭ، ދެން އޮތް މެޗާ ހަމައަށް ހުރިހާ މެޗަކުން މޮޅުވަމާ ހިނގާށޭ، އެއަށްފަހު ވާގޮތެއް ބަލާނީއޭ.' އާދީއްތަ ދުވަހަކީ އަހަރެމެންގެ ފެންވަރު ސާބިތުކޮށްދޭން ލިބޭ ވަރަށް ފުރިހަމަ ފުރުސަތެއް،" ކޭން ބުންޏެވެ.

ނޭޝަންސް ލީގުގައި ކުޅުނު އެހެން މެޗުތަކަށް ބަލާއިރު، ދުނިޔޭގެ ޗެމްޕިއަން ސްޕެއިނުން ވަނީ 2-0 ގެ ނަތީޖާއަކުން ޗެކް ރިޕަބްލިކް ބަލިކޮށްފައެވެ. އަދި ފަހަތުން އަރައި 3-1 ގެ ނަތީޖާއަކުން ފްރާންސް ބަލިކޮށް އިޓަލީން ވެސް ވަނީ މުހިންމު މޮޅެއް ހޯދާފައެވެ.