ޔުއެފާ ޗެމްޕިއަންސް ލީގުގައި ރޭ ކުޅުނު ފޯރިގަދަ މެޗު ފަހު ވަގުތު 4-2 އިން ކާމިޔާބުކޮށް، ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން ވާދަވެރި ބާސެލޯނާގެ މައްޗަށް ކުރިހޯދައިފިއެވެ.

ޕާކް ޑެސް ޕްރިންސަސް ސްޓޭޑިއަމްގައި ކުޅުނު މި ކުރިމަތިލުމުގައި ޕީއެސްޖީން މޮޅު ހޯދީ މެޗުގެ ފަހުކޮޅު ވިޓީނިއާ އަދި ފަބިއަން ރުއީޒް ޖެހި ލަނޑުތަކުންނެވެ. މިއީ ޖެހިޖެހިގެން ތިންވަނަ ފަހަރަށް މި މުބާރާތުގެ ތަށި އުފުލައިލުމަށް އަމާޒު ހިފާފައިވާ ޕީއެސްޖީން މި ސީޒަނުގެ ޗެމްޕިއަންސް ލީގުގައި ކުޅުނު ތިން މެޗުން ހޯދި ތިންވަނަ މޮޅެވެ.

Ad
rt

ދެ ޓީމު 2-2 އިން އެއްވަރުވެފައި އޮއްވައި، މެޗުގެ 81 ވަނަ މިނެޓުގައި ޕީއެސްޖީއަށް ދެވަނަ ފަހަރަށް ލީޑު ނަގައިދިނީ ޕޯޗުގަލްގެ މިޑްފީލްޑަރު ވިޓީނިއާއެވެ. ވޭތުވެދިޔަ އަހަރުގެ ބެލޮންޑިއޯ ރޭންކިންގެ ތިންވަނަ ހޯދި ވިޓީނިއާ މި ލަނޑު ޖެހީ ޕެނަލްޓީ އޭރިއާ ބޭރުން މޭމަތިން ބޯޅަ ކޮންޓްރޯލް ކުރުމަށްފަހު ފޮނުވާލި ހިތްގައިމު ހަމަލާއަކުންނެވެ. އޭގެ އިރުކޮޅެއް ފަހުން، މެޗު ނިމެން ދަނިކޮށް ގޯލާ ކައިރިން ފަބިއަން ރުއީޒް ކާމިޔާބުކުރި ލަނޑާއެކު ޕީއެސްޖީން ވަނީ މޮޅު ކަށަވަރުކޮށްފައެވެ.

މިދިޔަ ހަފުތާގައި މެންޗެސްޓާ ސިޓީ ދަނޑުގައި 4-2 އިން މޮޅުވި ޕީއެސްޖީން ރޭގެ މެޗު ފެށީ ވެސް ވަރަށް ވަރުގަދަކޮށެވެ. މެޗު ފެށިގެން ފުރަތަމަ 90 ސިކުންތުގެ ތެރޭގައި ޚްވިޗާ ކްވަރަޓްސްކޭލިއާ ފޮނުވާލި ބޯޅައެއް ގޯލުގެ ދަނޑިއަށް އަމާޒުވިއެވެ. ނަމަވެސް މެޗުގެ 20 ވަނަ މިނެޓުގައި، މިދިޔަ އަހަރުގެ ބެލޮންޑިއޯ ކާމިޔާބުކުރި އުސްމާން ޑެމްބެލޭގެ ފަލަމަސްގަނޑަށް އަނިޔާވެ ކުޅުމުން ބާލަން ޖެހުމަކީ ޕީއެސްޖީއަށް ލިބުނު ބޮޑު ގެއްލުމެކެވެ. ޑެމްބެލޭގެ ބަދަލުގައި ކުޅެން ނުކުތީ މިދިޔަ ހޫނުމޫސުމުގައި ބާސެލޯނާ ދޫކޮށް ޕީއެސްޖީއާ ގުޅުނު ފެރާން ޓޮރޭޒްއެވެ. މި ވަގުތުކޮޅުގެ ތެރޭގައި ބާސެލޯނާގެ ޑެނީ އޮލްމޯއަށް ވެސް އަނިޔާވެ ބަދަލުކުރަން ޖެހުނެވެ.

މެޗުގެ ފުރަތަމަ ލަނޑު 38 ވަނަ މިނެޓުގައި ޕީއެސްޖީއަށް ޖަހައިދިނީ މުޅި މެޗުގައިވެސް ފާހަގަކޮށްލެވޭ މޮޅު ކުޅުމެއް ދެއްކި ޑެސިރޭ ޑޫއޭއެވެ. މި ލަނޑު އޭނާ ކާމިޔާބުކުރީ ބާސާގެ ހާފް ތެރެއިން ލަމީން ޔަމާލް އަތުން ގެއްލުނު ބޯޅައެއް ހޯދައި، ހުނަރުވެރިކަމާއެކު އޭރިއާ ބޭރުން ތިރިތިރިން ގޯލުގެ ތިރީ ކަނަށް ވައްދާލައިގެންނެވެ. އެހެންނަމަވެސް، ދެވަނަ ހާފު ފެށިގެން މާގިނައިރުތަކެއް ނުވެ، ފާމިން ލޮޕޭޒް ދިން ބޯޅައަކުން އޭރިއާ ތެރެއަށް ވަދެ ޒަވީ އެސްޕާޓް ވަނީ ބާސެލޯނާއަށް ނަތީޖާ ހަމަހަމަކޮށްދީފައެވެ. މިއީ ސީނިއާ ޓީމަށް އޭނާ ޖަހައިދިން ދެވަނަ ލަނޑެވެ.

އޭގެ ފަހުން ޓޮރޭޒް ފޮނުވާލި ބޯޅައެއް ބާސާގެ ގޯލުގެ ދަނޑިއަށް އަމާޒުވިތާ ކުޑައިރުކޮޅެއްގެ ތެރޭގައި، ކޯނަރަކުން ލޫކަސް ހެނާންޑޭޒް ބޮލުން ޖެހި ލަނޑުން ޕީއެސްޖީން ދެވަނަ ފަހަރަށް ކުރިހޯދިއެވެ. މިއީ ޕީއެސްޖީއަށް ކުޅެދިން 100 އަށް ވުރެ ގިނަ މެޗުގައި އޭނާ ޖެހި ތިންވަނަ ލަނޑުގެ އިތުރުން ފެބްރުއަރީ 2024 ގެ ފަހުން ޖެހި ފުރަތަމަ ލަނޑެވެ. އާންމުކޮށް ކުޅޭ ލެފްޓް ބެކް ނޫނޯ މެންޑޭޒް ނެތުމުން ޔަމާލް ހުއްޓުވުމަށް ނެރުނު ހެނާންޑޭޒް މޮޅު ކުޅުމަކަށްފަހު ކޯޗު ލުއިސް އެންރީކޭ ބަދަލުކުރިއެވެ. ނަމަވެސް އޭނާގެ ބަދަލުގައި ކުޅެން އެރި ވޮރެން ޒައިރޭ-އެމެރީ އަށް މަތިން އައި ބޯޅައެއް ދިފާއުކުރުމުގައި ހެދުނު ގޯހެއްގެ ފައިދާ ނަގައި، ޔަމާލް ވަނީ ބާސާއަށް ދެވަނަ ފަހަރަށް ނަތީޖާ ހަމަހަމަކޮށްދީފައެވެ. މިއީ މި ސީޒަނުގައި ޔަމާލް ޖެހި 10 ވަނަ ލަނޑުގެ އިތުރުން ހުރިހާ މުބާރާތެއްގައި ބާސެލޯނާއިން ކާމިޔާބުކުރި 50 ވަނަ ލަނޑެވެ.

މި ނަތީޖާއާއެކު، ސީޒަން ފެށިގެން މިހާތަނަށް ހުރިހާ މުބާރާތެއްގައި ޖެހިޖެހިގެން 11 މެޗުން މޮޅުވެ ބާސެލޯނާއިން ދަމަހައްޓަމުން އައި ރެކޯޑު މިވަނީ ނިމުމަކަށް އައިސްފައެވެ. އަނެއްކޮޅުން ފްރެންޗް ލީގާއި ޗެމްޕިއަންސް ލީގު ހިމެނޭހެން ޕީއެސްޖީން މިހާރު ވަނީ ވިދިވިދިގެން ހަތް މެޗުން މޮޅުވެފައެވެ. އެހެންނަމަވެސް، ޑެމްބެލޭގެ އިތުރުން ކްވަރަޓްސްކޭލިއާއަށް ވެސް ރޭގެ މެޗުގައި އަނިޔާވުމަކީ ޕީއެސްޖީއަށް އޮތް ކަންބޮޑުވުމެކެވެ. އެ ދެ ކުޅުންތެރިންގެ އަނިޔާގެ ސީރިއަސްމިން އަދި ސާފެއް ނުވެއެވެ.

ވޭތުވެދިޔަ 13 އަހަރު ތެރޭގައި ޗެމްޕިއަންސް ލީގުގައި މި ދެ ޓީމު ބައްދަލުކުރި 14 ވަނަ މެޗަށް ނުކުތްއިރު، ބާސެލޯނާއަށް ކުރިއަށް އޮތީ މާ މުހިންމު ކުރިމަތިލުމެކެވެ. އެއީ އަންނަ އާދީއްތަ ދުވަހު އަމިއްލަ ދަނޑުގައި ވާދަވެރި ރެއާލް މެޑްރިޑާ ދެކޮޅަށް ކުޅޭ މެޗެވެ. އެ މެޗުން މޮޅުވެއްޖެނަމަ ލަލީގާ ތާވަލުގެ އެއްވަނައިގައި ނުވަ ޕޮއިންޓުގެ ލީޑެއް ލިބެން އޮތުމުން، 2024 ވަނަ އަހަރުގެ ބެލޮންޑިއޯ ހާސިލްކުރި ރޮޑްރީ ރޭގެ މެޗު ފެށީ ބެންޗުންނެވެ. އޭނާ ކުޅެން އެރީ ފަހު ހާފުގައެވެ. ނަމަވެސް އަނިޔާއިން ސަލާމަތްވެ ރަފީނިއާ ވަނީ ބާސާގެ ފުރަތަމަ އެގާރައިގައި ހިމެނިގެން ކުޅެފައެވެ.