ޔުއެފާ ޗެމްޕިއަންސް ލީގުގައި ތުރުކީގެ ފެނަބާޗޭ އަތުން 3-2 އިން ބަލިވެ ލިވަޕޫލަށް ހައިރާންކަން ލިބުނުއިރު، ފްރާންސްގެ ލެންސްގެ މައްޗަށް 1-9 ގެ ބޮޑު ކާމިޔާބީއެއް ހޯދައި އިޓަލީގެ ކޮމޯ އިން މުބާރާތުގެ ތާރީޚީ ރެކޯޑަކާ ހަމަކޮށްފިއެވެ. މި މުބާރާތުގައި ކުޅުނު އެހެން މެޗުތަކަށް ބަލާއިރު، ރެއާލް މެޑްރިޑާއި މެންޗެސްޓާ ސިޓީ އަދި އާސެނަލް ވެސް ވަނީ މޮޅުވެފައެވެ.
އިސްތަންބޫލްގައި ކުޅުނު މެޗަކީ ފެނަބާޗޭގެ ކޯޗު އިސްމާއިލް ކާރްތާލް އިސްތިއުފާ ދިނުމާ ގުޅިގެން އެ ޓީމުގެ ވަގުތީ ކޯޗުކަމާ ހަވާލުވި ލިވަޕޫލްގެ ކުރީގެ ފޯވާޑް ޑާކް ކައިޓްގެ އިރުޝާދުގެ ދަށުން އެ ޓީމު ކުޅުނު ދެވަނަ މެޗެވެ. މެޗުގެ 25 ވަނަ މިނެޓުގައި ޓްރޭ ނިއޯނީ ފޮނުވާލި ހަމަލާއެއް ކޯޖޯ ޕެޕްރާ އޮޕޮންގް ގައިގައި ޖެހިފައި މިސްރާބު ބަދަލުވެގެން ގޮސް ގޯލަށް ވަދެ ލިވަޕޫލަށް ލީޑު ލިބުނެވެ. ނަމަވެސް އޭގެ ހަތަރު މިނެޓު ފަހުން މޭސަން ގްރީންވުޑް ފޮނުވާލި ހިލޭޖެހުމެއް ޖެރެމީ ޖަކޭ ގައިގައި ޖެހި ބޯޅަ ގޯލަށް ވަދެ ފެނަބާޗޭ އިން ނަތީޖާ ހަމަހަމަކުރިއެވެ.
ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ކޯޑީ ގަކްޕޯ، ކޮސްޓަސް ސިމިކާސްއާ އެކު ބޯޅަ ބަދަލުކުރުމަށްފަހު ނަގައިދިން ހުރަހަކުން އެލެކްޒެންޑާ އިސާކް ވަނީ 69 ވަނަ މިނެޓުގައި ބޮލުން ލަނޑު ޖަހައި އަލުން ލިވަޕޫލަށް ކުރިހޯދައިދީފައެވެ. އެހެން ނަމަވެސް އެންގޯލޯ ކާންޓޭ ނަގައިދިން ހުރަހެއް ގަކްޕޯގެ ބޮލުގައި ޖެހިފައި އައުމުން، 73 ވަނަ މިނެޓުގައި އާޗީ ބްރައުން ވަނީ ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައި ފެނަބާޗޭއަށް އެއްވަރުކޮށްދީފައެވެ.
ފެނަބާޗޭ މޮޅުވި ލަނޑު 79 ވަނަ މިނެޓުގައި ކާމިޔާބުކޮށްދިނީ ވެދާތު މުރީގީއެވެ. މިއީ ބްރައުން އޭރިއާ ތެރެއަށް ހުރަސްކޮށްދިން ބޯޅައެއް ލިވަޕޫލްގެ ތިން ޑިފެންޑަރުންގެ ވަށައިގެން ހުރެ ބޮލުން ގޯލަށް ވައްދައިލައިގެން އޭނާ ޖެހި ލަނޑެކެވެ. މެޗަށްފަހު ކައިޓް ބުނީ މިފަދަ މުއުޖިޒާތެއް ފަދަ ކަމެއް ހަގީގަތަކަށް ހަދައިދިން ހުރިހާ ކުޅުންތެރިންނާމެދު އުފާކުރާ ކަމަށާއި ލިވަޕޫލް އަތުން މޮޅުވާނެ ކަމަށް ގިނަ ބަޔަކު އުންމީދު ނުކުރާ ކަމަށެވެ. މި ބައްޔާއެކު އެންޑޯނީ އިރައޯލާގެ ލިވަޕޫލް ވަނީ 9 ޕޮއިންޓާއެކު ތާވަލުގެ އަށްވަނައަށް ވެއްޓިފައެވެ. ފެނަބާޗޭ އޮތީ ފަސް ޕޮއިންޓާއެކު 19 ވަނައިގައެވެ.
އަނެއްކޮޅުން، އަލަށް ޗެމްޕިއަންސް ލީގުގައި ވާދަކުރާ އިޓަލީގެ ކޮމޯ އިން ވަނީ ލެންސްގެ ދަނޑުގައި 1-9 އިން މޮޅުވެ، މުބާރާތުގެ ތާރީޚުގައި އެންމެ ބޮޑު ތަފާތަކުން މޮޅުވުމުގެ ރެކޯޑާ ހަމަކޮށްފައެވެ. މީގެ ކުރިން އަށް ލަނޑުގެ ތަފާތުން މޮޅުވެފައިވަނީ ބެސިކްޓަސް އަތުން 8-0 އިން މޮޅުވި ލިވަޕޫލާއި މަލްމޯ އަތުން 8-0 އިން މޮޅުވި ރެއާލް މެޑްރިޑެވެ. މީގެ އިތުރުން ކޮމޯ ވެފައިވަނީ 1971 ވަނަ އަހަރުގެ ފަހުން ޔޫރަޕިއަން ކަޕް ނުވަތަ ޗެމްޕިއަންސް ލީގުގެ މެޗެއްގައި ރަށުން ބޭރުގައި ނުވަ ލަނޑު ޖެހި ފުރަތަމަ ޓީމަށެވެ. އަދި ބަޔާން މިއުނިކަށްފަހު ޗެމްޕިއަންސް ލީގު މެޗެއްގައި ނުވަ ލަނޑު ޖެހި ދެވަނަ ޓީމަކީ ވެސް އެއީއެވެ.
ހަތަރު މެޗުން ތިން މޮޅާއެކު ޖުމްލަ ނުވަ ޕޮއިންޓް ހޯދައި، 19 ލަނޑު ޖަހައިގެން ކޮމޯ މިހާރު އޮތީ ތާވަލުގެ ހަތަރުވަނައިގައެވެ. ކޮމޯގެ ކެޕްޓަން ލޫކަސް ޑަ ކުންހާ ބުނީ މިއީ އާދަޔާޚިލާފު އަދި މޮޔަވާ ކަހަލަ ނަތީޖާއެއް ކަމަށާއި އެހެން ނަމަވެސް މި ކާމިޔާބީއާއެކު މާ ބޮޑަށް ހެއްލިގެން ނުވާނެ ކަމަށެވެ.
ގްރީސްގައި ކުޅުނު މެޗުގައި ރެއާލް މެޑްރިޑުން ވަނީ ދެ ފަހަރު ފަހަތުން އަރައި، އިތުރު ވަގުތުގައި ފެޑެރީކޯ ވަލްވާޑޭ ޖެހި ލަނޑުން އޭއީކޭ އެތެންސް އަތުން 3-2 އިން މޮޅުވެފައެވެ. އެތެންސްގެ ލަނޑުތައް އަބޫބަކަރީ ކޮއިޓާ އާއި ސްޓަވްރޮސް ޕިލިއޯސް ކާމިޔާބުކުރިއިރު، ރެއާލްގެ އަނެއް ދެ ލަނޑު ޖެހީ ޖޫޑް ބެލިންހަމް އަދި ކިލިއަން އެމްބާޕޭއެވެ. މި މޮޅާއެކު ރެއާލް އޮތީ ކުޅުނު ހަތަރު މެޗުން ވެސް މޮޅުވެ 12 ޕޮއިންޓާއެކު ތާވަލުގެ ދެވަނައިގައެވެ.
މެންޗެސްޓާ ސިޓީން ވަނީ އާރްބީ ލައިޕްޒިގްގެ މައްޗަށް 3-2 އިން ކުރިހޯދާފައެވެ. އެ މެޗުގައި ކަސްޓެއްލޯ ލުކޭބާ އަތުން ބައިކޮޅަށް ވަން ލަނޑަކުން ސިޓީ ކުރީގައި އޮއްވައި ރިޑްލް ބާކޫ ވަނީ އެއްވަރުކޮށްދީފައެވެ. އޭގެ ފަހުން އެންޒޯ ފެނާންޑޭޒް ސިޓީއަށް އަލުން ކުރިހޯދައިދިން ނަމަވެސް އެންޓޯނިއޯ ނޫސާ ވަނީ ލައިޕްޒިގަށް އަނެއްކާވެސް އެއްވަރުކޮށްދީފައެވެ. ސިޓީ މޮޅުވީ އެލިއަޓް އެންޑަސަން ނަގައިދިން ބޯޅައަކުން އާލިން ހާލަންޑް ޖެހި ލަނޑުންނެވެ. އަދި އާސެނަލުން ވަނީ ނޯނީ މަޑުއޭކޭ އަދި ވިކްޓަ ގިޔޮކެރެސް ކާމިޔާބުކުރި ލަނޑުތަކުން ސްލާވިއާ ޕްރާގް އަތުން 2-1 އިން މޮޅުވެފައެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!