ހއ. މުރައިދޫ ބަނދަރު ހެދުމުގެ މަސައްކަތް ޑިޒައިން އެންޑް ބިލްޑުގެ އުސޫލުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާހަވާލުކޮށްފިއެވެ.
ޕްލޭނިން މިނިސްޓްރީގައި މިއަދު ބޭއްވި ރަސްމިއްޔާތެއްގައި މިއެއްބަސްވުމުގައި އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އަާދަމް އާޒިމެވެ.
މި މަސައްކަތް އެކުންފުންޏާ ހަވާލު ކުރީ 33.7 މިލިއަން ރުފިޔާ އަށް 365 ދުވަސް ތެރޭގައި ނިންމާ ގޮތަށެވެ.
މި މަޝްރޫއުގެ ދަށުން 29841 ކިއުބިކް މީޓަރުގެ ބަނދަރު ފުން ކުރުމާއި 3546 ކިއުބިކް މީޓަރުގެ ނެރު ފުން ކުރުމާއި ގްރޮއިން ޖެހުމާއި އެއްގަމު ތޮށި ލުމާއި ބްރޭކްވޯޓާ ރިޕްރޮފައިލް ކުރުމާއި އެއްގަމު ތޮށިން ބޭރު ތޮއްޓަށް ދިއުމަށް ބްރިޖެއް ހަދާނެއެވެ. އަދި ރިވެޓްމަންޓް ޖަހައި ނެވިގޭޝަން ލައިޓު ހަރުކުރުމާއި ބޮޑު ހިލައިގެ ބޭރުތޮށި ލުމުގެ މަސައްކަތް ވެސް ކުރާނެއެވެ.
މީގެ އިތުރުން ރޭމްޕަކާއި ޕޭވްމަންޓެއްގެ އިތުރުން މަގު ބައްތި ހަރުކުރުމުގެ މަަސައްކަތް ވެސް މި މަޝްރޫއުގެ ދަށުން ކުރާނެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!