އިސްރާއީލުގެ ފުޅާވަމުން އަންނަ އުދުވާންތަކާއި، ލުބުނާނާއި ފަލަސްތީނުގެ ހާލަތު ގޯސްވަމުންދާ މައްސަލައިގައި، ސައުދީ އަރަބިއްޔާ، ތުރުކީވިލާތް އަދި ޕާކިސްތާނުގެ އިސް ވަފުދުތައް އީރާނުގެ ވެރިރަށް ތެހެރާނަށް ގޮސް އީރާނުގެ ވެރިންނާ އެކު ސަލާމަތީ ގޮތުން ކުއްލި މަޝްވަރާތަކެއް ފަށައިފިއެވެ.
މި ބައްދަލުވުމަކީ އެމެރިކާ އާއި އިސްރާއީލުން އީރާނަށް ދެމުންދާ ހަމަލާތަކުގެ ނަތީޖާއާ ގުޅިގެން، އީރާނުގެ އިސްނެގުމަކަށް ބާއްވާ ބައްދަލުވުމެއް ކަމަށް އެ ގައުމުގެ ފޮރިން މިނިސްޓްރީން ވަނީ ބުނެފައެވެ.
ތެހެރާނުގައި ބާއްވާ މި މަތީ ފަންތީގެ ބައްދަލުވުމުގައި ސައުދީ އަރަބިއްޔާގެ ފަރާތުން ބައިވެރިވެވަޑައިގަންނަވަނީ ދިފާއީ ވަޒީރު ޕްރިންސް ޚާލިދު ބިން ސަލްމާނެވެ. އަދި ޕާކިސްތާނުގެ ފަރާތުން އަސްކަރިއްޔާގެ ވެރިޔާ ފީލްޑް މާޝަލް އާސިމް މުނީރު ބައިވެރިވެވަޑައިގަންނަވާއިރު، ތުރުކީވިލާތުން ބައިވެރިވެވަޑައިގަންނަވަނީ އެ ގައުމުގެ ޖާސޫސީ އިދާރާ (އެމްއައިޓީ) ގެ ވެރިޔާ އިބްރާހީމް ކަލިންއެވެ. މި ބައްދަލުވުމުގެ މެހެމާންދާރީ އަދާކުރައްވަނީ އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ޑެޕިއުޓީ ސެކްރެޓަރީ އަލީ ބާގިރީ ކަނީގެ އިތުރުން އެ ގައުމުގެ ސަލާމަތީ އިސް އޮފިޝަލުންނެވެ.
މި ބައްދަލުވުމުގައި ބައިވެރިވާ ސައުދީ، ތުރުކީ އަދި ޕާކިސްތާނަކީ މިދިޔަ އޮގަސްޓް މަހު ގުޅިފައިވާ ދިފާއީ އެއްބަސްވުމެއް ކަމަށްވާ "މައްކާ ޕެކްޓް" ގައި ސޮއިކޮށްފައިވާ ތިން ގައުމެވެ. މިއީ މައްކާ ޕެކްޓް އިއްތިހާދުގެ މެންބަރު ގައުމުތަކާއި އީރާނުގެ އިސް އޮފިޝަލުންނާ ދެމެދު މިފަދަ ގޮތަކަށް ބާއްވާ ފުރަތަމަ ސަމިޓެވެ. އަދި މިއީ މިދިޔަ މަހު ޔަމަނުގެ ހޫޘީންނާއި ސައުދީ އަރަބިއްޔާއާ ދެމެދު ހަމަލާތައް ވަރުގަދަވި ފަހުން މި ގައުމުތަކުގެ މެދުގައި ބޭއްވޭ ފުރަތަމަ ބައްދަލުވުން ވެސް މެއެވެ.
ހަތަރު ގައުމު އެކުވެގެން މިފަދަ ބައްދަލުވުމެއް ބޭއްވުމުގެ ހިޔާލު އެންމެ ފުރަތަމަ ހުށަހެޅުއްވީ ތެހެރާނުގައި ކުރިން ބޭއްވުނު ޑިޕްލޮމެޓިކް މަޝްވަރާތަކެއްގެ ތެރެއިން ޕާކިސްތާނުގެ ފީލްޑް މާޝަލް އާސިމް މުނީރެވެ. އީރާނުގެ ސަލާމަތީ އިސް އޮފިޝަލް މުހްސިން ރިޒާއީއާ އެކު މިދިޔަ ހަފުތާގައި ބޭއްވި ބައްދަލުވުމެއްގައި ޖެނެރަލް މުނީރު ވަނީ މި ބައްދަލުވުން ބާއްވާނެކަން ކަށަވަރުކޮށްދެއްވާފައި ކަމަށް އީރާނުގެ އޮފިޝަލުން ވިދާޅުވެއެވެ.
މި މަޝްވަރާތަކުގެ މައިގަނޑު އަމާޒަކީ މުޅި މެދުއިރުމަތީގައި އުފެދިފައިވާ ނުތަނަވަސްކަން ކުޑަކުރުމާއި، އެމެރިކާ، އިސްރާއީލު އަދި އީރާން ހިމެނޭ ގޮތަށް ސަރަހައްދީ ފުޅާ ހަނގުރާމައެއް ފެށިދާނެ ކަމުގެ ބިރު ނައްތާލުމެވެ. މީގެއިތުރުން ބޭރުގެ އެއްވެސް ބާރަކަށް ބަރޯސާނުވެ، ސަރަހައްދުގެ ގައުމުތަކުން އިސްނަގައިގެން އަމިއްލަ ސަރަހައްދީ ސަލާމަތީ ނިޒާމެއް ގާއިމުކުރުމަށާއި، ކަނޑުގެ މުހިންމު މަގުތަކުގެ ސަލާމަތްތެރިކަން ކަށަވަރުކޮށް، ހަމަނުޖެހުންތައް އިތުރަށް ފެތުރިގެން ދިޔަ ނުދިނުމަށް އަޅަންޖެހޭ ފިޔަވަޅުތަކާ ގުޅޭގޮތުން ވެސް މި ބައްދަލުވުމުގައި ދަނީ މަޝްވަރާކުރަމުންނެވެ.
މި ބައްދަލުވުމާ ގުޅޭގޮތުން ވާހަކަދައްކަވަމުން އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ޑެޕިއުޓީ ސެކްރެޓަރީ އަލީ ބާގިރީ ވިދާޅުވީ، އީރާނާއެކު މި ބައްދަލުވުމުގައި ބައިވެރިވާ ތިން ގައުމަށް ވެސް އަމިއްލަ ސަރަހައްދީ ސަލާމަތެއް ބިނާކުރުމުގައި ފައިދާހުރި ފިޔަވަޅުތަކެއް އެޅިދާނެ ކަމަށެވެ. އަދި އެކަން ކުރެވޭނީ ސަރަހައްދީ ފަރާތްތަކުން އިސްނަގައިގެން ސަލާމަތް ގާއިމުކުރުމަށް އީރާނުން ގެންގުޅޭ ތަސައްވުރާއި، އަމިއްލަ ގައުމީ ސަލާމަތް ބިނާކުރުމުގައި އީރާނަށް ލިބިފައިވާ ކާމިޔާބު ތަޖުރިބާގެ އަލީގައި ކަމަށް ވެސް އޭނާ ފާހަގަކުރެއްވިއެވެ.
އެމެރިކާއިން އީރާނާ ދެކޮޅަށް ކުރަމުންދާ ހަނގުރާމަ ހުއްޓުވުމަށްޓަކައި ޕާކިސްތާނުން ގަތަރާ ގުޅިގެން މެދުވެރިއެއްގެ ދައުރު މީގެކުރިން އަދާކުރިއެވެ. ނަމަވެސް، މިދިޔަ ހޫނުމޫސުމުގައި ޑޮނަލްޑް ޓްރަމްޕް ސޮއިކުރައްވާފައިވާ ފަހުމުނާމާ (އެމްއޯޔޫ) ޓްރަމްޕްގެ ޓީމުން ދޫކޮށްލުމާ ގުޅިގެން، އެ މުއާމަލާތްތައް މިހާރު ވަނީ ހުއްޓުމަކަށް އައިސްފައެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!