ޔުއެފާ ޗެމްޕިއަންސް ލީގުގައި މެންޗެސްޓާ ސިޓީގެ މައްޗަށް ޕެރިސް ސެއިންޓް ޖާމަން (ޕީއެސްޖީ) އިން 4-2 އިން ހޯދި މޮޅަށް ފަހު، ކޯޗު ލުއިސް އެންރީކޭ ކައިރިން އަދިވެސް އިތުރު ޗުއްޓީއަކަށް އެދިދާނެ ކަމަށް ބުނެ އުސްމާން ޑެމްބެލޭ މަޖާ ސަމާސާއެއް ކޮށްފިއެވެ. ބެލޮންޑިއޯ އެވޯޑު ހޯދާފައިވާ ޑެމްބެލޭ ވަނީ ބުދަ ދުވަހުގެ ރޭ ކުޅުނު މި މެޗުގައި މޮޅު ކުޅުމެއް ދައްކައި، ލަނޑެއް ޖެހުމުގެ އިތުރުން އިތުރު ލަނޑެއް ޖަހަން އެހީތެރިވެދީފައެވެ.

ފަހުގެ ބައިނަލްއަގުވާމީ މެޗުތަކުގެ ބްރޭކަށް ފަހު އެންރީކޭ ވަނީ ހޮނިހިރު ދުވަހު ލެ މާންސްއާ ދެކޮޅަށް އަމިއްލަ ދަނޑުގައި ކުޅުނު މެޗުގައި ޑެމްބެލޭއަށް އަރާމުކުރަން ފުރުސަތު ދީފައެވެ. ސިޓީއާ ދެކޮޅަށް ވަރަށް ތޫނުފިލި ކުޅުމެއް ދެއްކުމަށްފަހު ބްރޯޑްކާސްޓަރު ކެނަލް ޕްލަސްއަށް ވާހަކަދައްކަމުން ޑެމްބެލޭ ބުނީ، އިންޓަނޭޝަނަލް ބްރޭކަށް ފަހު އޭނާ ދިޔައީ ޗުއްޓީއަކަށް ކަމަށާއި، އަދިވެސް އިތުރު ޗުއްޓީތަކަކަށް އެދިދާނެ ކަމަށެވެ. އަދި ހާއްސަކޮށް ޗުއްޓީއަށް ފަހު އެނބުރި އައިސް އަންގާރަ އަދި ބުދަ ދުވަހު ކުޅުމަކީ ވަރަށް ބޮޑު އުފަލެއް ކަމަށް އޭނާ ފާހަގަކުރިއެވެ. އަލުން ޗުއްޓީއަކަށް ދާނަންތޯ ސުވާލުކުރުމުން ހިނިތުންވެ ހުރެ އޭނާ ބުނީ، މާޗު މަހާ ހަމައަށް އެކަން ވުމަކީ ވެސް އެކަށީގެންވާ ކަމެއް ކަމަށާއި ނަމަވެސް އެކަން ނިންމާނީ ކޯޗު ކަމަށެވެ.

Ad
rt

ލީގު 1 ގައި އަންނަ ހޮނިހިރު ދުވަހު ސްޓްރާސްބޯގްއާ ދެކޮޅަށް ޕީއެސްޖީ ނުކުންނަން ޖެހޭއިރު، އަންނަ އަންގާރަ ދުވަހު އެ ޓީމު އަމިއްލަ ދަނޑުގައި ޗެމްޕިއަންސް ލީގުގައި ނުކުންނާނީ ގިނަ ލަނޑުތަކެއް ޖަހަމުން އަންނަ ލަމީން ޔަމާލް ހިމެނޭ ބާސެލޯނާއާ ދެކޮޅަށެވެ. އެހެންކަމުން އެންރީކޭ އަނެއްކާވެސް ބައެއް ކުޅުންތެރިންނަށް އަރާމުދިނުމަކީ އެކަށީގެންވާ ކަމެކެވެ. ލެ މާންސްއާ ދެކޮޅަށް ކުޅުނު މެޗުގައި ލެފްޓް ބެކް ނޫނޯ މެންޑޭޒް ވެސް ސްކޮޑުން ބާކީކުރިއިރު، މި ސީޒަނުގެ ކުރީކޮޅު ލީގުގައި ލިއްލްއާ ދެކޮޅަށް ކުޅުނު މެޗުގައި ޑެމްބެލޭ ވެސް ކުޅެފައެއް ނުވެއެވެ.

ނިމިދިޔަ ސީޒަނުގައި ޕީއެސްޖީން ލީގު ކާމިޔާބުކުރި އިރު ޑެމްބެލޭ ފުރަތަމަ އެގާރައިގައި ކުޅެފައިވަނީ އެންމެ ނުވަ މެޗު ނަމަވެސް، އޭނާއަށް ވަނީ ފްރެންޗް ލީގުގެ މޮޅު ކުޅުންތެރިޔާގެ އެވޯޑު ލިބިފައެވެ. މާ ގިނަ މެޗުތައް ކުޅުނު އެހެން ކުޅުންތެރިން ތިއްބައި އޭނާއަށް އެ އެވޯޑު ދިނުމުން އޭރު ފާޑުކިޔުންތައް ވެސް އަމާޒުވިއެވެ. މިކަމާ ގުޅޭގޮތުން މެންޗެސްޓާ ސިޓީގެ ކޯޗު އެންޒޯ މަރެސްކާ ބުނީ، ޕްރިމިއާ ލީގުގެ ޓީމުތަކާ ހިލާފަށް، ފްރެންޗް ލީގުގެ އާދައިގެ ޓީމުތަކާ ދެކޮޅަށް ކުޅޭއިރު ކުޅުންތެރިން ރޮޓޭޓްކުރުމުގެ ފުރުސަތު ނުވަތަ "ލަގްޒަރީ" ޕީއެސްޖީއަށް ލިބޭ ކަމަށެވެ. ޗެމްޕިއަންސް ލީގު މެޗުތަކުގެ ކުރިން ކުޅުންތެރިން މެނޭޖްކުރުމުގެ ފުރުސަތު ޕީއެސްޖީއަށް އޮތް ނަމަވެސް، ހާއްސަކޮށް އެންފީލްޑް ފަދަ ދަނޑަކަށް ދާންޖެހޭ ހާލަތުގައި ސިޓީއަށް އެކަން ވަރަށް ބޮޑަށް ތަފާތުވާ ކަމަށް އޭނާ ފާހަގަކުރިއެވެ.

ސިޓީން މި މެޗަށް ނުކުތީ އާދީއްތަ ދުވަހު ޕްރިމިއާ ލީގުގެ ވާދަވެރި ލިވަޕޫލާ ދެކޮޅަށް ހޫނުގަދަ މާހައުލެއްގައި ކުޅުމަށް ފަހުގައެވެ. މީގެ ސަބަބުން ޕީއެސްޖީ މެޗަށް ތައްޔާރުވާން މަރެސްކާގެ ޓީމަށް ލިބުނީ އެއް ދުވަސް މަދުންނެވެ. މީގެއިތުރުން، މިދިޔަ ސީޒަނުގައި ލިވަޕޫލާ ދެކޮޅަށް ކުޅުނު ޗެމްޕިއަންސް ލީގުގެ ކުއާޓާ ފައިނަލަށް ރަނގަޅަށް ތައްޔާރުވުމަށްޓަކައި، ލީގުގެ ވާދަވެރި ލެންސްއާ ދެކޮޅަށް ކުޅެން އޮތް މެޗު ފަސްކޮށްދިނުމަށް ޕީއެސްޖީން އެދުނު އެދުމަށް ފްރެންޗް ލީގުން ވަނީ އެއްބަސްވެފައެވެ. މިއީ ވަކި ޓީމަކަށް ހާއްސަ އިނާޔަތެއް ދިނުން ކަމަށް ބައެއް ފަރާތްތަކުން އޭރު ސިފަކުރިއެވެ. ޕީއެސްޖީން ވަނީ އެ ސީޒަނުގެ ފައިނަލުގައި ޕެނަލްޓީ ޖަހައިގެން އާސެނަލް ބަލިކޮށް، ޖެހިޖެހިގެން ދެވަނަ އަހަރަށް ތަށި އުފުލައިލާފައެވެ.

މި ސީޒަނުގެ ޗެމްޕިއަންސް ލީގުގައި ޑެމްބެލޭ ތިން ލަނޑު ޖަހާފައިވީ ނަމަވެސް، ލީގު 1 ގައި ކުޅުނު ހަތަރު މެޗުގައި އޭނާއަށް އަދި ލަނޑެއް ކާމިޔާބުކުރެވިފައެއް ނުވެއެވެ. ލީގުގެ ހަ މެޗަށް ފަހު ޕީއެސްޖީ މިވަގުތު އޮތީ ހަވަނައިގައި ކަމަށްވާއިރު، އެ ޓީމުގެ ބައެއް ކުޅުންތައް ފެނިފައިވަނީ އުއްމީދުކުރި ވަރަށް ވުރެ ދަށުންނެވެ. މިކަމާ ގުޅޭގޮތުން ޑެމްބެލޭ ބުނީ، މީހުން އެ ޓީމާ މެދު ޝައްކު އުފެއްދިޔަސް އެކަމާ އެއްވެސް ވަރަކަށް އަޅާނުލާ ކަމަށެވެ. އަދި މިއީ އަދި ކިރިޔާ އޮކްޓޫބަރު މަސް ކަމަށާއި، މިއީ ޗެމްޕިއަންސް ލީގުގެ ދެވަނަ މެޗު ކަމަށްވުމުން، އެންމެ މުހިންމީ ސީޒަނުގެ ފުރަތަމަ ބައިގައި ރަނގަޅު މިސްރާބެއްގައި ދެމިއޮވެ ދެވަނަ ބަޔަށް ތައްޔާރުވުން ކަމަށް އޭނާ ބުންޏެވެ.

އެހެން ނަމަވެސް، ސިޓީއާ ދެކޮޅަށް ކުޅުނު މެޗުގެ ދެވަނަ ހާފުގައި ޕީއެސްޖީގެ ފޯކަސް ދަށްވިކަމަށް ޑެމްބެލޭ ވަނީ އިއުތިރާފުވެފައެވެ. އޭނާ ބުނީ ދެވަނަ ހާފުގައި ކުޑަކޮށް ދޫދީ ފަރުވާކުޑަކޮށްލެވުނު ކަމަށާއި، ސިޓީ ފަދަ މޮޅެތި ކުޅުންތެރިން ތިބި ޓީމަކާ ދެކޮޅަށް އެގޮތަށް ކަންތައް ކުރުމުން އޭގެ ގެއްލުމާ ކުރިމަތިލާން ޖެހޭނެ ކަމަށެވެ.