ތުރުކީގެ ސުޕަ ލީގުގައި ވާދަކުރާ ޓްރަބްޒޮންސްޕޯއަށް ކުޅެމުން އަންނަ މިސްރުގެ ތަރި މުހައްމަދު ސަލާހު، އެ ލީގުގައި ކުޅުނު ފުރަތަމަ ހަތް މެޗުން 10 ލަނޑު ޖެހުމުގައި ބައިވެރިވެ، ލީގުގެ އައު ރެކޯޑެއް ގާއިމުކޮށްފިއެވެ.

ސަލާހު މި ރެކޯޑު ހެދީ ހޮނިހިރު ދުވަހު ސަމްސުންސްޕޯއާ ދެކޮޅަށް ކުޅެ 3-0 ގެ ނަތީޖާއަކުން ޓްރަބްޒޮންސްޕޯ މޮޅުވި މެޗުގައެވެ.

Ad
rt

ސަމްސުންސްޕޯ ބަލިކުރި މެޗުގައި ސަލާހު ވަނީ ލަނޑެއް ޖަހަން ފުރުސަތު ތަނަވަސްކޮށްދީ، އެސިސްޓެއް ހަދާފައެވެ. މި އެސިސްޓާއެކު، ލިވަޕޫލް ދޫކޮށް ތުރުކީއަށް ބަދަލުވި ފަހުން ކުޅުނު ހަތް މެޗުގައި އޭނާ ވަނީ ހަތް ލަނޑު ޖަހައި، ތިން އެސިސްޓް ހަމަކޮށްފައެވެ. ކުޅުނު ފުރަތަމަ ހަތް މެޗުން 10 ލަނޑުގައި ހިއްސާވުމަކީ ތުރުކީ ސުޕަ ލީގުގެ ތާރީޚުގައި ވެސް ކުޅުންތެރިއަކު މިހާތަނަށް ހާސިލުކުރި ފުރަތަމަ ކާމިޔާބީއެވެ.

އުމުރުން 34 އަހަރުގެ މިސްރުގެ ގައުމީ ޓީމުގެ ކެޕްޓަން ޓްރަބްޒޮންސްޕޯއާ ގުޅުނީ މިދިޔަ އޯގަސްޓް މަހުގެ ތެރޭގައި ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އިނގިރޭސި ފުޓްބޯޅަ ސީޒަން ނިމުމަށްފަހު އެންފީލްޑްގެ ކްލަބު ދޫކޮށް، ހިލޭ ޓްރާންސްފާއެއްގައި ހުރި ސަލާހު ތުރުކީގެ ޓީމަކަށް ބަދަލުވުމަކީ ގިނަ ބަޔަކަށް ލިބުނު ހައިރާންކަމެއްގެ ގޮތުގައި އޭރު ބެލެވުނު ކަމެކެވެ.

ޓްރަބްޒޮންސްޕޯއަށް ބަދަލުވުމުގެ ކަންކަން ނިންމުމަށްފަހު ސަލާހު އިސްތަންބޫލަށް ދިޔަ ވަގުތު، އެ ގައުމުގެ ގިނަ އަދަދެއްގެ ސަޕޯޓަރުން ވަނީ އެއްވެ އޭނާއަށް ހޫނު މަރުހަބާއެއް ކިޔާފައެވެ. ސަލާހު އެ ޓީމަށް ކުޅުނު ފުރަތަމަ ރަސްމީ މެޗަކީ ސުޕަ ލީގު ހުޅުވި މެޗުގައި ކަސިމްޕާޝާއާ ދެކޮޅަށް ކުޅެ 1-1 އިން އެއްވަރުވި މެޗެވެ. އެ މެޗުގައި އޭނާ ކުޅެން ނުކުތީ ބަދަލު ކުޅުންތެރިއެއްގެ ގޮތުގައެވެ.

އޭގެ މަހެއްހާ ދުވަސް ފަހުން، އެންމެ ފަހުގެ ޗެމްޕިއަން ގަލަތަސަރާއީއާ ދެކޮޅަށް އަމިއްލަ ދަނޑުގައި ކުޅުނު މެޗުގައި ސަލާހު ވަނީ ތަފާތު މޮޅު ކުޅުމެއް ދައްކާފައެވެ. އެ މެޗުގައި އޭނާ ހެޓްރިކެއް ހަދައި، އެއް އެސިސްޓް ފޯރުކޮށްދިން އިރު، ޓްރަބްޒޮންސްޕޯއިން ވަނީ 4-0 ގެ ބޮޑު ތަފާތަކުން ގަލަތަސަރާއީ ބަލިކޮށް، މި ސީޒަނުގައި އެ ޓީމު ފުރަތަމަ ފަހަރަށް ބަލިކޮށްފައެވެ.

ތުރުކީގެ ލީގު ޗެމްޕިއަންކަން ހަތް ފަހަރު ހޯދާފައިވާ ޓްރަބްޒޮންސްޕޯއިން ނިމިދިޔަ ސީޒަން ނިންމާލީ ތާވަލުގެ ތިންވަނައިގައެވެ. ނަމަވެސް، ސަލާހު ޓީމާ ގުޅުމަށްފަހު ދައްކަމުން އަންނަ އާދަޔާޚިލާފު މޮޅު ކުޅުމާއެކު، އޭނާ ވަނީ ކުރު މުއްދަތެއްގެ ތެރޭގައި އެ ޓީމުގެ އިތުރުން މުޅި ލީގުގައި ވެސް ފާހަގަކޮށްލެވޭ ތަރިއަކަށް ވެފައެވެ.