ޔުއެފާ ނޭޝަންސް ލީގުގައި ނޯވޭއާ ދެކޮޅަށް ކުޅުނު މެޗަށްފަހު ކްރިސްޓިއާނޯ ރޮނާލްޑޯ ކުއްލި ގޮތަކަށް ގައުމީ ޓީމުގެ ކޭމްޕު ދޫކޮށް ދިއުމާ ގުޅިގެން، ޓީމުގެ ނިންމުންތައް ނިންމުމުގެ ފުރިހަމަ އިޚްތިޔާރު އޮތީ އޭނާގެ އަތުގައި ކަމަށް ބުނެ ޕޯޗުގަލްގެ ކޯޗު ޖޯޖް ޖީސަސް އޭނާގެ ނިންމުން ދިފާއުކޮށްފިއެވެ.

ޖީސަސް ބުނީ ނޯވޭ މެޗުގައި ރޮނާލްޑޯ ނުކުޅުވަން ނިންމި ނިންމުމުގައި ސާބިތުވެ ހުރި ކަމަށެވެ.

Ad
rt

ޕޯޗުގަލް އިން 2-1 ގެ ނަތީޖާއަކުން ނޯވޭ ބަލިކުރި މި މެޗުގެ ފުރިހަމަ 90 މިނެޓުގައި ވެސް ޖީސަސް ވަނީ ރޮނާލްޑޯ ބެންޗުގައި ބައިންދާފައެވެ. އޭނާގެ ބަދަލުގައި އެ މެޗުގެ ހަމަލާތައް އުފެއްދުމަށް ކޯޗު އިސްކަންދިނީ ގޮންސާލޯ ރާމޮސް އަށެވެ.

މެޗު ނިމުމާއެކު، އުމުރުން 41 އަހަރުގެ ފޯވާޑް ވަނީ ޓީމު ތިބި ހޮޓަލުން ނުކުމެ، ޕްރައިވެޓް ޖެޓެއްގައި ފުރައިގެން ގޮސްފައެވެ. އަދި އޭގެ ފަހުން ރޮނާލްޑޯ ވަނީ މިކަމާ ގުޅޭގޮތުން އޭނާގެ ވާހަކަތައް ވަރަށް އަވަހަށް ހާމަކުރާނެ ކަމަށް ބުނެ ސޯޝަލް މީޑިއާގައި މެސެޖެއް ވެސް އާންމުކޮށްފައެވެ.

މި މައްސަލައިގައި ވާހަކަދައްކަމުން ޖީސަސް ސާފުކޮށްދިނީ ޓެކްޓިކަލް ނިންމުންތަކަކީ ހަމައެކަނި އޭނާގެ ބާރުގެ ދަށުގައި އޮންނަ ކަމެއް ކަމަށެވެ.

"އަހަރެން ކުޅުންތެރިޔާ ގާތު ބުނިން އޭނާ ނުކުޅޭނެ ވާހަކަ. ކޯޗެއްގެ ގޮތުގައި އަހަރެންގެ ވިސްނުން ބަދަލުކުރެވޭނީ ކްރިސްޓިއާނޯއަކަށް ވެސް، އަދި އެހެން ކުޅުންތެރިއަކަށް ވެސް ނޫން. ދުވަހަކު ވެސް ނޫން. އޭނާއަކަށް ވެސް، އަދި އެހެން މީހަކަށް ވެސް. ރައީސަކަށް ވެސް ނޫން،" އޭނާ ބުންޏެވެ.

ނޭޝަންސް ލީގުގައި ކުރިއަށް އޮތް މެޗުތަކުގައި ވެސް ޓީމުގެ އެޓޭކުގައި މައިގަނޑު އިޚްތިޔާރެއްގެ ގޮތުގައި ގޮންސާލޯ ރާމޮސް ބަހައްޓަން ގަސްދުކުރާ ކަން ޖީސަސް ވަނީ ކަށަވަރުކޮށްދީފައެވެ.

ކޯޗުގެ މި ނިންމުމާއެކު، ގައުމީ ޓީމުގައި ރޮނާލްޑޯގެ މުސްތަގުބަލާ މެދު މިހާރު ވަނީ ނުތަނަވަސްކަމާއި ސުވާލުތައް އުފެދިފައެވެ. ރޮނާލްޑޯ ވަނީ މިހާތަނަށް ޕޯޗުގަލްގެ ގައުމީ ޓީމަށް ކުޅެދިން 234 މެޗުގައި 146 ލަނޑު ކާމިޔާބުކޮށްދީފައެވެ.