ސަޢޫދީ ޢަރަބިއްޔާގެ ވެރިރަށް ރިޔާޟްގެ ކިންގް ޚާލިދު އިންޓަނޭޝަނަލް އެއާޕޯޓް ކައިރިން ބޯ ކަޅު ދުން އަރަމުންދާ ކަމަށް ރޮއިޓާސްއިން ރިޕޯޓްކޮށްފިއެވެ.

ވީޑިއޯ އަދި ފޮޓޯތަކުން ފެންނަ ގޮތުގައި މި ދުން އަރަމުންދަނީ އެ ސަރަޙައްދުގައި ހުންނަ ތެޔޮ ރައްކާކުރާ ޑިޕޯއަކާ ދިމާލުންނެވެ. މި ޙާދިސާއާ ގުޅިގެން ސަޢޫދީގެ ރަސްމީ އިދާރާތަކުން އަދި މިހާތަނަށް އެއްވެސް ބަޔާނެއް ނެރެފައެއް ނުވެއެވެ.

އެއާޕޯޓުގެ އޮޕަރޭޝަންތަކަށް ބޮޑެތި ބުރޫއެރުންތަކެއް

Ad
rt

މި ޙާދިސާއާ ގުޅިގެން ރިޔާޟް އެއާޕޯޓުގެ ގިނަ ފްލައިޓްތައް ކެންސަލްވެ އަދި ޑިލޭވުމުގެ ސަބަބުން ބޮޑެތި ދަތިތަކަކާ ވަނީ ކުރިމަތިލާން ޖެހިފައެވެ. ފްލައިޓްރޭޑާރ24 އިން ވަނީ މި އެއާޕޯޓުގެ ޑިސްރަޕްޝަން އިންޑެކްސް އެންމެ މަތީ ދަރަޖަ ކަމަށްވާ 5.0 އަށް މަތިކޮށްފައެވެ.

ރިޔާޟް އެއާޕޯޓްކައިރިން ދުންއަރާކަމުގެ ރިޕޯޓާއެކު ރޮއިޓާސްއިން އާންމުކުރި ފޮޓޯއެއް

ވައިގެ ނުރައްކަލުގެ އިންޒާރާއި ގޮވުންތަކުގެ އަޑު

ދުން ފެނުމުގެ ކުރިން، ސަޢޫދީ ސިވިލް ޑިފެންސުން ވަނީ ރިޔާޟް އަދި އަލް-ޚަރްޖް ސަރަޙައްދަށް "ޢަދާވާތްތެރި ވައިގެ ނުރައްކަލެއް" އޮތް ކަމަށް ބުނެ ރައްޔިތުންގެ ފޯނުތަކަށް އިންޒާރުގެ މެސެޖުތައް ފޮނުވާފައެވެ. އަދި ގޭގައި ތިބުމަށް އިރުޝާދު ދިނުމަށްފަހު، ގާތްގަނޑަކަށް ބައިގަޑިއިރު ފަހުން އެ އިންޒާރު ވަނީ އުވާލާފައެވެ. ނަމަވެސް، ވެރިރަށުގެ ރައްޔިތުންނާއި ނޫސްވެރިންނަށް ހޮނިހިރު ދުވަހުގެ ހެނދުނުގެ ވަގުތެއްގައި ބާރުގަދަ ގޮވުންތަކެއްގެ އަޑު އިވިފައިވާ ކަމަށް ވަނީ ރިޕޯޓްކޮށްފައެވެ.

ސަރަޙައްދީ ހަމަނުޖެހުން

މި ޙާދިސާ ހިނގާފައިވަނީ ސަޢޫދީގެ މަދަދު ލިބޭ ފައުޖުތަކާއި އީރާނުގެ މަދަދު ލިބޭ ޙޫޘީ ހަނގުރާމަވެރިންނާ ދެމެދު ކުރިމަތިލުންތައް ވަރުގަދަވެފައިވާ ދަނޑިވަޅެއްގައެވެ. ޔަމަނުގައިވާ އެމީހުންގެ މަޤާމުތަކަށް ސަޢޫދީން ވައިގެ ޙަމަލާތަކެއް ދީފައިވާ ކަމަށް ޙޫޘީން ދާދިފަހުން ވަނީ ތުހުމަތުކޮށްފައެވެ. ސަޢޫދީ ސަރުކާރުން އަދި މިހާތަނަށް އަލިފާނުގެ ޙާދިސާ ހިނގަން މެދުވެރިވި ސަބަބު ނުވަތަ ރޭގަނޑު ކުރިމަތިވި ނުރައްކަލުގެ މަސްދަރާ ގުޅޭގޮތުން ރަސްމީ އެއްވެސް މަޢުލޫމާތެއް ހާމަކޮށްފައެއް ނުވެއެވެ.