މެކްސިކޯގެ ޗިއަޕާސްގެ އައްސޭރިފަށަށް ރިކްޓަރ މިންގަނޑުން 7.3 ގެ ބާރުގަދަ ބިންހެލުމެއް އަތުވެއްޖެއެވެ.

ޔޫ.އެސް ޖިއޮލޮޖިކަލް ސާވޭ (ޔޫ.އެސް.ޖީ.އެސް) އާ ހަވާލާދީ ސްކައި ނިއުސްއިން ރިޕޯޓްކޮށްފައިވާ ގޮތުގައި، މި ބިންހެލުން އައިސްފައިވަނީ ބިމުގެ 10 ކިލޯމީޓަރު (6.21 މޭލު) އަޑިއަށެވެ.

Ad
rt

ފުރަތަމަ މި ބިންހެލުމުގެ ބާރުމިން 7.4 ގައި ހުރިކަމަށް ރެކޯޑް ކުރެވުނު ނަމަވެސް، ފަހުން ވަނީ އެއީ 7.3 ގެ ބިންހެލުމެއް ކަމަށް އިސްލާހުކޮށްފައެވެ. އާންމުގޮތެއްގައި ތިލަ ސަރަހައްދުތަކަށް އަންނަ މިފަދަ ބާރުގަދަ ބިންހެލުންތަކުގެ ސަބަބުން ބޮޑެތި ގެއްލުންތަކެއް ލިބުމުގެ ފުރުސަތު ބޮޑެވެ.

މި ބިންހެލުމާ ގުޅިގެން ޕެސިފިކް ސުނާމީ ވޯނިންގ ސެންޓަރުން ވަނީ ބިންހެލުން އައި ސަރަހައްދުން ފެށިގެން 300 ކިލޯމީޓަރު (186 މޭލު) ރޭޑިއަސްގެ ސަރަހައްދުތަކަށް ސުނާމީގެ އިންޒާރު ނެރެފައެވެ. މީގެ ތެރޭގައި މެކްސިކޯ އާއި ގުއަޓެމާލާގެ ބައެއް އައްސޭރިފަށުގެ ސަރަހައްދުތައް ހިމެނެއެވެ.

ނަމަވެސް، މި ބިންހެލުމުގެ ސަބަބުން ދިވެހިރާއްޖެއަށް އެއްވެސް ކަހަލަ ނުރައްކަލެއް ނެތް ކަމަށް މޫސުމާބެހޭ ގައުމީ އިދާރާއިން ވަނީ ބުނެފައެވެ. ބިންހެލުން އައިސްފައިވަނީ މެކްސިކޯގެ ޕެސިފިކް ކަނޑުގެ ފަރާތަށް ކަމަށްވާތީ، އެމެރިކާ ބައްރުގެ ބޮޑު ބިންގަނޑު ހުރަހަކަށް އޮތުމުގެ ސަބަބުން، އުފެދޭ އެއްވެސް ލޮޅުމެއް ނުވަތަ ރާޅެއް އިންޑިއާ ކަނޑާ ހަމައަށް ފޯރުމުގެ ފުރުސަތެއް ނެތެވެ.

މިފަދަ ބާރުގަދަ ބިންހެލުންތަކަށްފަހު އާންމުކޮށް ސުނާމީ އާއި ބިންގަނޑު ކަނޑައިގެން ދިއުން ފަދަ ނުރައްކާތެރި ހާދިސާތައް ހިނގުން އެކަށީގެންވެއެވެ. އެހެންކަމުން ބިންހެލުން އައި ސަރަހައްދުގެ ގައުމުތަކުން މިހާރު ދަނީ ރައްކާތެރިކަމުގެ ފިޔަވަޅުތައް އަޅަމުންނެވެ.