އީރާނާއި އެމެރިކާއާ ދެމެދު އުފެދިފައިވާ ނުތަނަވަސްކަން ހައްލުކުރުމަށްޓަކައި، ގިނަ ބަޔަކު "ފަހު ފުރުސަތުގެ" ގޮތުގައި ސިފަކުރާ މުހިންމު ޑިޕްލޮމެޓިކް މަޝްވަރާތަކެއް ޕާކިސްތާނުގެ އިސްލާމްއާބާދުގައި ފެށިއްޖެއެވެ.

މި މަޝްވަރާތަކަށް އީރާނުގެ ޚާރިޖީ ވަޒީރު އައްބާސް އަރާގްޗީ ރޭ ދަންވަރު އިސްލާމްއާބާދަށް ވަޑައިގެންފައިވަނީ ޚާރިޖީ ވުޒާރާގެ ތަރުޖަމާނު އިސްމާއީލް ބަގާއީ ހިމެނޭ ގޮތަށް މަތީ ފަންތީގެ ވަފުދަކާއެކުގައެވެ.

Ad
rt

މި ބައްދަލުވުންތަކުގައި އެމެރިކާގެ ފަރާތުން ބައިވެރިވުމަށް ޚާއްސަ މަންދޫބު ސްޓީވް ވިޓްކޮފް އަދި ޖެރެޑް ކުޝްނާ ހިމެނޭ މަތީ ފަންތީގެ ޓީމެއް މިއަދު އިސްލާމްއާބާދަށް އައުމަށް ވަނީ ހަމަޖެހިފައެވެ. ނަމަވެސް، އީރާނުން ވަނީ އެމެރިކާއާއެކު ސީދާ ބައްދަލުވުންތަކެއް ނުބާއްވާނެ ކަމަށް ބުނެ "ސީދާ މުއާމަލާތް ނުކުރުމުގެ" ސިޔާސަތެއް އިޚްތިޔާރުކޮށްފައެވެ. މިކަމުގެ ސަބަބުން ޕާކިސްތާނުގެ ޚާރިޖީ ވަޒީރު އިސްހާގު ދާރު އިސްކޮށް ހުންނަވައިގެން އެ ގައުމުން ދަނީ ދެ ފަރާތުގެ މެދުގައި މެދުވެރިއެއްގެ ދައުރު އަދާކުރަމުންނެވެ.

މަޝްވަރާގެ މައިގަނޑު ހުށަހެޅުންތައް

ރޮއިޓާސްއަށް މައުލޫމާތު ދެމުން އެމެރިކާގެ ޓްރަމްޕް ބުނެފައިވާ ގޮތުގައި، އީރާނުން ތައްޔާރުވަމުންދަނީ އެމެރިކާގެ "ރެޑް ލައިންތަކަށް" ފެތޭ ފަދަ ހުށަހެޅުމެއް ހުށަހެޅުމަށެވެ. މި ހުށަހެޅުމުގައި މައިގަނޑު ދެ ކަމަކަށް ބާރުއަޅާނެ ކަމަށް ބެލެވެއެވެ. އެއީ ބައިނަލްއަގުވާމީ ހުރިހާ އުޅަނދުފަހަރަކަށް ކަނޑުއޮޅި ދާއިމީކޮށް ހުޅުވާލުމާއި، އީރާނުގައި ހުރި މަތީ މިންވަރަކަށް ފައްކާކޮށްފައިވާ ޔުރޭނިއަމްގެ ރިޒާވް ހަވާލުކުރުން ނުވަތަ ނައްތާލުމެވެ.

ޓްރަމްޕް އިތުރަށް ބުނެފައިވާ ގޮތުގައި، އީރާނުގެ ބަނދަރުތަކަށް ދީފައިވާ ކަނޑުގެ ބްލޮކޭޑް އުވާލުމުގެ މައިގަނޑު ޝަރުތަކީ "ހުރިހާ ފިއުލްއެއް (ޔުރޭނިއަމް) ފޮނުވާލުން" ކަމަށެވެ. ވައިޓް ހައުސްއިން މި ހުށަހެޅުމަށް މަރުހަބާ ކިޔާފައިވީ ނަމަވެސް، އެއްބަސްވުމުގައި ރަސްމީކޮށް ސޮއިކުރެވެންދެން އީރާނުގެ ބަނދަރުތަކަށް ދީފައިވާ ބްލޮކޭޑް ދެމިއޮންނާނެ ކަމަށް ވަނީ ބުނެފައެވެ.

ތެހެރާންގެ ލީޑަޝިޕް ބައިބައިވެފައިވާ ކަމަށް އިޝާރާތް ކުރަމުން ޓްރަމްޕް ބުނީ، އެމެރިކާއިން މަޝްވަރާ ކުރަމުންދަނީ މުޅި ސަރުކާރާ ނޫން ކަމަށާއި، މިވަގުތު ބާރުގައި ތިބި ވަކި ފެކްޝަންތަކަކާ ކަމަށެވެ. މިއީ އޭޕްރިލް މަހުގެ މެދުތެރޭގައި ބޭއްވި "އިސްލާމްއާބާދު ޓޯކްސް" ނާކާމިޔާބުވުމަށްފަހު، ހާލަތު އިތުރަށް ގޯސްވެފައިވާ ދަނޑިވަޅެއްގައި ކުރިއަށްދާ މުހިންމު މަސައްކަތްތަކެކެވެ.

މި މަޝްވަރާތަކުގެ ނަތީޖާއަށް މުޅި ދުނިޔެ އިންތިޒާރު ކުރަމުންދާއިރު، މިއީ ސަރަހައްދީ ހަމަޖެހުމަށް ލިބޭނެ އެންމެ ފަހު ފުރުސަތު ކަމަށް ގިނަ މުހައްލިލުން ދެކެއެވެ.