ޣައްޒާއަށް އިންސާނީ އެހީ ފޯރުކޮށްދިނުމަށް ދަތުރުކުރި ގްލޯބަލް ސުމޫދު ފްލޮޓިލާގެ 13 އުޅަނދެއް އިސްރާއީލު ސިފައިން ހުއްޓުވައި، 37 ޤައުމުގެ 200 އަށްވުރެ ގިނަ ހަރަކާތްތެރިން ހައްޔަރުކޮށްފިއެވެ.

މިހާދިސާ ހިނގާފައިވަނީ މެޑިޓަރޭނިއަން ކަނޑު މަތީގައި، ޣައްޒާގެ އައްސޭރިއާ ގާތްކުރަމުންދަނިކޮށެވެ. ނަމަވެސް ހައްޔަރުކުރި ފަރާތްތަކުން ބުނަމުންދަނީ އެމީހުންގެ ހިތްވަރަށް އެއްވެސް ބަދަލެއް ނާންނާނެ ކަމަށާއި، މިޝަން ކުރިއަށްދާނެ ކަމަށެވެ.

Ad
rt

އިސްރާއީލު ސިފައިން ވަނީ ޣައްޒާއަށް ދަތުރުކުރަމުންދިޔަ ގްލޯބަލް ސުމޫދު ފްލޮޓިލާގައި ތިބި ހަރަކާތްތެރިން، އޭގެ ތެރޭގައި ތަޖުރިބާކާރު މަސައްކަތްތެރިޔާ ގްރެޓާ ތުންބަރގްވެސް ހިމެނޭގޮތަށް، އެމީހުންގެ އުޅަނދުތައް އިންޓަރސެޕްޓް ކުރުމަށްފަހު ހައްޔަރުކޮށްފައެވެ. މި ހާދިސާ ހިނގާފައިވަނީ މިއަދު ފަތިސް ވަގުތު އެވެ.

ގްލޯބަލް ސުމޫދު ފްލޮޓިލާގެ ޚަބަރު ފަތުރާ ފަރާތްކަމުގައިވާ ސައިފް އަބޫކެޝެކް ވަނީ އިންސްޓަގްރާމްގައި ޕޯސްޓެއް ކޮށް "މިޝަންގެ އަޕްޑޭޓެއް" ދީފައެވެ. އޭނާ ކަށަވަރުކޮށްދިންގޮތުގައި އިސްރާއީލު ސިފައިން ވަނީ ކަނޑުމަތީގައި 13 އުޅަނދު އިންޓަރސެޕްޓްކޮށްފައެވެ.

އަބޫކެޝެކް ބުނިގޮތުގައި އެ އުޅަނދުތަކުގައި 37 ޤައުމުގެ 201 އަށްވުރެ ގިނަ މީހުން ތިބިއެވެ. އޭގެ ތެރޭގައި ސްޕެއިންގެ 30 ބައިވެރިން، އިޓަލީގެ 22 މީހުން، ތުރުކީގެ 21 މީހުން އަދި މެލޭޝިއާގެ 12 މީހުން ހިމެނެއެވެ.

އަބޫކެޝެކް ބުނިގޮތުގައި ހައްޔަރުކުރުންތަކާ އެކުވެސް ގްރޫޕްގެ "މިޝަން ކުރިއަށްދަނީ"އެވެ. އަދި އުޅަނދުތައް "މެޑިޓަރޭނިއަން މެދުވެރިކޮށް ޣައްޒާގެ ބްލޮކޭޑް ނައްތާލުމަށް" ދަތުރުކުރަމުން ދަނީއެވެ.

"އަޅުގަނޑުމެންގެ ގާތްގަނޑަކަށް 30 އުޅަނދު އަދިވެސް އޮކިއުޕޭޝަން ފޯސްގެ ހަނގުރާމަވެރި އުޅަނދުތަކުން ދުރަށް ދެވޭތޯ މަސައްކަތްކުރަމުން ދަނީ ޣައްޒާގެ އައްސޭރިއަށް ވާސިލުވުމަށެވެ. އެމީހުން ވަރަށް ޢަޒުމްކަން ބޮޑެވެ. އެމީހުން ވަރަށް ފޯރިއާއެކު މަސައްކަތްކުރަމުންދަނީ މިއަދު ފަތިހު އަވަހަށް މި [ބްލޮކޭޑް] ނައްތާލައި، އެންމެން އެކުގައި [ޣައްޒާއަށް] ވާސިލުވުމަށެވެ،" އޭނާ ބުންޏެވެ.

މިކަމުން ދައްކުވައިދެނީ ފަލަސްތީނުގެ ރައްޔިތުންނަށް އެހީތެރިވުމަށް އެކްޓިވިސްޓުންގެ ހިތްވަރާއި ހިމަތިވެތިކަމަށް އެއްވެސް ބަދަލެއް ނާންނަކަމެވެ.

މިކަމާ ގުޅިގެން، މީގެ ކުރިން އދ.ގެ ސްޕެޝަލް ރެޕޯޓަރ ފްރަންޗެސްކާ އަލްބަނީސް އަދި ކޮލަމްބިއާގެ ރައީސް ގުސްޓާވޯ ޕެޓްރޯ ވަނީ ފްލޮޓިލާއަށް އެއްވެސް ގެއްލުމެއް ނުދީ ކުރިއަށްދާން ދޫކޮށްލުމަށް ގޮވާލާފައެވެ. ނަމަވެސް އިސްރާއީލުން ވަނީ މި ގޮވާލުންތަކަށް ބީރު ކަންފަތެއް ދީފައެވެ.

އުޅަނދުތައް ޣައްޒާއާ ކައިރިވަމުންދިޔައިރު، ސުމޫދު ފްލޮޓިލާއިން ވަނީ އުޅަނދުގައި ތިބި މީހުންގެ ރައްކާތެރިކަމަށްޓަކައި ލައިވް ވީޑިއޯ ލިބެންހުރި ކަމަށް ބުނެފައެވެ. މިއީ އިސްރާއީލު ސިފައިންގެ އަމަލުތައް މޮނިޓަރކުރުމުގެ ގޮތުން އެޅި ފިޔަވަޅެކެވެ.

އިސްރާއީލުން ވަނީ ޣައްޒާއަށް ދަތުރުކުރާ ފްލޮޓިލާ ހުއްޓުވާނެކަމަށް ހުވާކޮށްފައެވެ. އެމީހުން ބުނާގޮތުގައި ހަރަކާތްތެރިން މަސައްކަތްކުރަނީ "ޤާނޫނީ ކަނޑުގެ ބްލޮކޭޑެއް" ނިގުޅައިގަންނާށެވެ. ނަމަވެސް ބައިނަލްއަޤްވާމީ ޤާނޫނުގައި އިންސާނީ އެހީ ފޯރުކޮށްދިނުމަށް ހުއްދަދޭންޖެހޭނެކަން ސާފުކޮށް ބަޔާންކޮށްފައިވެއެވެ.