މާފަރު އެއާޕޯޓުން ޖެޓް ފިއުލް ވިއްކަން ފަށައިފި

މާފަރު އިންޓަނޭޝަނަލް އެއަރޕޯޓުން ޖެޓް ފިއުލް ވިއްކަން ފަށައިފި އެވެ.

އައިލެންޑް އޭވިއޭޝަން ސަރވިސް (އައިއޭއެސް) އިން ބުނީ އެ އެއަރޕޯޓަށް އަންނަ ޖެޓްތަކަށް ބޭނުންވާ ތެޔޮ ދާއިމީކޮށް ފޯރުކޮށްދިނުމަށް ހަދަން ޖެހޭ ސެޓަޕްގެ މަސައްކަތް ވެސް ވަރަށް އަވަހަށް ނިމޭނެ ކަމަށެވެ. އަދި މިވަގުތު އެކަން ފެށީ އެކަމަށް އޮތް ޑިމާންޑު ބޮޑުވަމުން އަންނާތީ ކަމަށެވެ.

އެ އެއަރޕޯޓަށް ފައިބެއަހަރު 228 ޖެޓް ބަނދަރުކޮށްފައިވާއިރު، ބައިނަލްއަގުވާމީ ފްލައިޓުތަކުން އެ އެއަރޕޯޓަށް 1،571 ޓޫރިސްޓުން ވަނީ ދަތުރުކޮށްފައެވެ. އަދި 1،493 ޓޫރިސްޓުން ފުރާފައިވެ އެވެ.

މާފަރު އިންޓަނޭޝަނަލް އެއާޕޯޓް ބޮޑުކުރުމުގެ މަސައްކަތް އެމްޓީސީސީ އާ ހަވާލުކޮށްފައިވަނީ 8 ޑިސެމްބަރ 2022 ގައެވެ.

ޕްލޭނިން މިނިސްޓްރީގައި ބޭއްވި ރަސްމިއްޔާތެއްގައި އެކަމުގެ އެއްބަސްވުމުގައި އެ މިނިސްޓްރީގެ ފަރާތުން ސޮއިކުރެއްވީ ޑިރެކްޓަރު ޖެނެރަލް ފާތުމަތު ޝާނާ ފާރޫގެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމެވެ.

އެއް އަހަރު ތެރޭގައި މަސައްކަތް ނިންމާ ގޮތަށް އެމްޓީސީސީއާ މި މަޝްރޫއު ހަވާލުކޮށްފައިވަނީ 27 މިލިއަން އެމެރިކާ ޑޮލަރު (419 ދިވެހި ރުފިޔާ) އަށެވެ.

މި މަޝްރޫއަކީ އަބޫދާބީ ފަންޑް ފޯ ޑިވެލޮޕްމަންޓުން ފަންޑު ލިބިގެން ކުރިއަށްގެންދާ މަޝްރޫއެކެވެ.

މި މަޝްރޫއުުގެ ދަށުން މިހާރުގެ ރަންވޭއަށް އިތުރު 650 މީޓަރު ބޮޑުކުރުމާއި 1 މިލިއަން ކިއުބިކް މީޓަރުގެ ސަރަހައްދެއްގެ ބިން ހިއްކުމާއި 5700 މީޓަރުގެ ސަރަހައްދެއްގައި ރިވެޓްމަންޓް ޖެހުމާއި 32،300 އަކަ މީޓަރުގެ ސަރަހައްދެއްގައި ތާރު އެޅުމާއި ޓެކްސީވޭ ފުޅާކުރަން 5,600 އަކަ މީޓަރުގެ ސަރަހައްދެެއްގައި ތާރު އެޅުމާއި ޕަވާ ސިސްޓަމް އަޕްގުރޭޑް ކުރުމާއި އޭޖީއެލް އަޕްގުރޭޑް ކުރުމުގެ މަސައްކަތް ކުރާނެއެވެ.

މި މަޝްރޫއު ނިމުމުން މާފަރު އެއާޕޯޓަށް ބޮއިން-777 އީއާރު300 މަރުކާގެ މަތިންދާބޯޓު ޖެއްސޭނެއެވެ.