އެމެރިކާ އާއި އީރާނާ ދެމެދު ހިނގަމުންދާ ހަނގުރާމައާއި ރަޝިއާ އަދި ޔޫކްރެއިންގެ ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ކުރިމަތިވަމުންދާ ލޮޅުންތަކާ ގުޅިގެން، ބައިނަލްއަގުވާމީ ބާޒާރުގައި ބްރެންޓް ކްރޫޑް ތެޔޮ ފީފާއެއްގެ އަގު ހުކުރު ދުވަހު 110 އެމެރިކާ ޑޮލަރަށް އަރައިފިއެވެ.
މިއީ މެއި މަހުގެ 20 ވަނަ ދުވަހަށް ފަހު ތެލުގެ އަގު މިހާ މައްޗަށް އުފުލުނު ފުރަތަމަ ފަހަރެވެ.
ހުކުރު ދުވަހުގެ މެންދުރުފަހުގެ ވަގުތެއްގައި ބްރެންޓް ކްރޫޑްގެ އަގު ހުރީ ގާތްގަނޑަކަށް 109.75 ޑޮލަރުގައެވެ. މީގެ އިތުރުން، އުތުރު އެމެރިކާގެ މައިގަނޑު މިންގަނޑު ކަމަށްވާ ވެސްޓް ޓެކްސަސް އިންޓަމީޑިއަޓް (ޑަބްލިއުޓީއައި) ގެ އަގު ވެސް ވަނީ ސެޕްޓެމްބަރު މަހުގެ 21 ވަނަ ދުވަހަށް ފަހު ފުރަތަމަ ފަހަރަށް ފީފާއެއް 100 ޑޮލަރަށް ވުރެ މައްޗަށް އުފުލިފައެވެ.
އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމަ ފެށިތާ ތިން މަސް ނުވަނީސް، ފާއިތުވި އޭޕްރީލް މަހުގެ ފަހުކޮޅު ބްރެންޓް ކްރޫޑްގެ އަގު ވަނީ ފީފާއެއް 120 ޑޮލަރަށް ވުރެ މައްޗަށް އަރައި، އެންމެ މަތީ ދަރަޖައަކަށް ރެކޯޑުކުރެވިފައެވެ. އޭގެ ފަހުން، އެމެރިކާއާއި އީރާނުން ހަމަލާތައް ހުއްޓާލުމުގެ އެއްބަސްވުމެއްގެ ދަށުގައި ތިބި ދުވަސްވަރު ކަމަށްވާ ޖޫން އަދި ޖުލައި މަހު ތެލުގެ އަގު ވަނީ ފީފާއެއް 80 ޑޮލަރަށް ވުރެ ދަށަށް ވެއްޓިފައެވެ. އެހެންނަމަވެސް، އެ އެއްބަސްވުމާ ހިލާފުވި ކަމުގެ ތުހުމަތު ދެފަރާތުން ވެސް ދިޔައީ ކުރަމުންނެވެ.
އީރާނުގެ ހަނގުރާމައަށް މިހާރު ގާތްގަނޑަކަށް އަށް މަސް ފުރެން ކައިރިވެފައިވާއިރު، ތެލުގެ އަގު އަނެއްކާވެސް މިވަނީ 100 ޑޮލަރުގެ މައްޗަށް އަރައިފައެވެ. މި ބަދަލާއެކު އެމެރިކާގެ އެތެރޭގެ ބާޒާރުގައި ޕެޓްރޯލާއި ޑީސަލްގެ އަގުތައް ވަނީ އިންތިހާއަށް އުފުލިފައެވެ. އެމެރިކާގެ އޭއޭއޭ އިން ރިޕޯޓުކޮށްފައިވާ ގޮތުގައި، ހުކުރު ދުވަހު އެ ގައުމުގައި އާދައިގެ ޕެޓްރޯލް ގަޔަލަނެއްގެ އެވްރެޖް އަގު ހުރީ 4.33 ޑޮލަރުގައެވެ. އަދި ޑީސަލް ގަޔަލަނެއްގެ އަގު 6.30 ޑޮލަރަށް ވުރެ މައްޗަށް ގޮސްފައިވާއިރު، މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު ގާތްގަނޑަކަށް 2.70 ޑޮލަރުގެ ބޮޑުވުމެކެވެ.
މިކަމާ ގުޅޭގޮތުން ގޭސްބަޑީގެ ޕެޓްރޯލިއަމް އެނަލިސިސްގެ އިސްވެރިޔާ ޕެޓްރިކް ޑި ހާން ސޯޝަލް މީޑިއާ ޕްލެޓްފޯމް އެކްސްގައި ވިދާޅުވީ، "މިދިޔަ އަހަރުގެ މި މުއްދަތާ އަޅާބަލާއިރު، މާޗް 1 އިން ފެށިގެން އެމެރިކާގެ ރައްޔިތުން ވަނީ ޕެޓްރޯލާއި ޑީސަލް ގަތުމަށް އިތުރަށް 135 ބިލިއަން ޑޮލަރު ހޭދަކޮށްފައި،" ކަމަށެވެ.
ދުނިޔޭގެ ބާޒާރުގައި އުފުލެމުންދާ ތެލުގެ އަގުތައް ކޮންޓްރޯލް ކުރުމަށްޓަކައި އެމެރިކާގެ ރައީސް ޑޮނަލްޑް ޓްރަމްޕް ވަނީ މަސައްކަތްތަކެއް ފަށްޓަވައިފައެވެ. އޭގެ ތެރޭގައި ދުނިޔޭގެ ބާޒާރަށް ސަޕްލައިކުރާ ޑީސަލްގެ މިންވަރު އިތުރުކުރުމަށް ރަޝިއާއެކު އެއްބަސްވުމެއް އެކުލަވައިލުން ހިމެނެއެވެ. ނަމަވެސް، ޓްރަމްޕް ހުށަހެޅުއްވި ހަކަތައާ ގުޅޭ ހަނގުރާމަ ހުއްޓާލުމުގެ ހުށަހެޅުމާ ދެ ގައުމުން ވެސް ދެކޮޅުހަދަމުންދާއިރު، ރަޝިއާ-ޔޫކްރެއިން ހަނގުރާމައިގެ ތެރޭގައި ޔޫކްރެއިންގެ ސިފައިން ދަނީ ރަޝިއާގެ ތެޔޮ ސާފުކުރާ ކާރުހާނާތަކަށް އަމާޒުކޮށް ހަމަލާތައް ދެމުންނެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!