ޕޯޗުގަލްގެ ގައުމީ ޓީމުގެ ކޭމްޕް ދޫކޮށް ދިޔަ ނަމަވެސް، ކްރިސްޓިއާނޯ ރޮނާލްޑޯ ބޭނުންވެއްޖެ ނަމަ އަލުން އެނބުރި ޓީމާ ގުޅުމުގެ ފުރުސަތު އެބައޮތް ކަމަށް އެ ޓީމުގެ ކޯޗު ޖޯޖް ޖީސަސް ބުނެފިއެވެ.

އުމުރުން 41 އަހަރުގެ ތަރިއާ ގުޅޭގޮތުން ކޯޗު މިހެން ބުނެފައި ވަނީ، ޔޫއެފާ ނޭޝަންސް ލީގުގެ ކުއާޓާ ފައިނަލުން ޕޯޗުގަލް ޖާގަ ކަށަވަރުކުރި މެޗަށް ފަހު އާދީއްތަ ދުވަހު ވާހަކަދައްކަމުންނެވެ.

Ad
rt

ނޯވޭއާ ދެކޮޅަށް ކުޅުނު މެޗުން ފަހަތުން އަރައި 2-1 އިން މޮޅުވެ، 2026-27 ވަނަ އަހަރުގެ ނޭޝަންސް ލީގުގެ ކުއާޓާ ފައިނަލަށް ދަތުރުކުރި ފުރަތަމަ ޓީމަކަށް ޕޯޗުގަލް ވަނީ ވެފައެވެ. މި މެޗުގައި ނޯވޭގެ ކްރިސްޓޮފާ އަޔާ ޕެނަލްޓީ އޭރިއާ ބޭރުން ޖެހި މޮޅު ގޯލުން އެ ޓީމު ކުރިހޯދާފައި ވަނިކޮށް، ޕޯޗުގަލްއަށް ނަތީޖާ ހަމަހަމަކޮށްދިނީ ޔާއޯ ކަންސޭލޯއެވެ. އަދި ޕޯޗުގަލް މޮޅުވި ލަނޑު މެޗުގެ 86 ވަނަ މިނެޓުގައި ކާމިޔާބުކޮށްދިނީ ގޮންސާލޯ ރާމޮސްއެވެ.

މެޗަށް ފަހު ވާހަކަދައްކަމުން ކޯޗު ޖީސަސް ބުނީ، ސައޫދީ އަރަބިއްޔާގެ އަލް ނަސްރަށް ރޮނާލްޑޯ ކުޅެމުންދާ ނަމަ، ކުރިއަށް އޮތް ސްކޮޑުން އޭނާއަށް ފުރުސަތު ދިނުމަށް ތައްޔާރަށް ހުރި ކަމަށެވެ.

"އަހަންނަށް ބަލާއިރު ކުރިއަށް އޮތް ކޯލް-އަޕްގައި އޭނާ އަލް ނަސްރަށް ކުޅޭ ނަމަ، އޭނާއަކީ ސްކޮޑަށް ނެގޭނެ ކުޅުންތެރިއެއް. އޭނާ ބޭނުން ނަމަ ގައުމީ ޓީމަށް އެނބުރި އަންނާނެ،" ޖީސަސް ބުންޏެވެ.

އަންނަ ނޮވެމްބަރު މަހު އޮންނަ މެޗުތަކުގެ ކުރިން ރޮނާލްޑޯ ބޭނުން ނަމަ އޭނާއާ މަޝްވަރާކުރާނެ ކަމަށާއި، ނަމަވެސް އެންމެ ފަހުގެ ނިންމުން ނިންމާނީ ރޮނާލްޑޯ އަމިއްލައަށް ކަމަށް ވެސް ކޯޗު ފާހަގަކުރިއެވެ.

ޕޯޗުގަލްގެ ތާރީޚުގައި އެންމެ ގިނަ މެޗު ކުޅެ އެންމެ ގިނަ ލަނޑު ޖަހާފައިވާ ރޮނާލްޑޯ ޓީމުގެ ކޭމްޕް ދޫކޮށް ސައޫދީއަށް ދިޔައީ، ޓީމު ނެގުމާ ގުޅޭގޮތުން ޖީސަސްއާ ދެމެދު އުފެދުނު ޚިޔާލުތަފާތުވުންތަކަކަށް ފަހު ފާއިތުވި ބުދަ ދުވަހުއެވެ. މިދިޔަ ސެޕްޓެމްބަރު 24 ގައި ވޭލްސްއާ ދެކޮޅަށް ކުޅުނު މެޗުގައި ރޮނާލްޑޯ ބަދަލުކުރިއިރު، ސެޕްޓެމްބަރު 27 ގައި ނޯވޭއާ ދެކޮޅަށް ކުޅުނު މެޗުގައި އޭނާ އިނީ ބެންޗުގައެވެ. އަދި ޑެންމާކާ ދެކޮޅަށް ކުޅޭ މެޗުގައި ވެސް ފަށާނީ ބެންޗުންކަން އެނގުމުން އޭނާ ވަނީ ޕްރައިވެޓް ފްލައިޓެއްގައި އަނބުރާ ގޮސްފައެވެ. ރޮނާލްޑޯ ނެތި ވެސް ޕޯޗުގަލް ވަނީ ބުރާސްފަތި ދުވަހު 4-2 އިން ޑެންމާކް ބަލިކޮށްފައެވެ.

މި އަހަރުގެ ވޯލްޑް ކަޕަށް ފަހު ރޮބާޓޯ މާޓިނޭޒްގެ ބަދަލުގައި ޕޯޗުގަލްގެ ކޯޗުކަމާ ހަވާލުވި އުމުރުން 72 އަހަރުގެ ޖީސަސް ބުނީ، މަގާމާ ހަވާލުވެ ނެގި ފުރަތަމަ ސްކޮޑުގައި ވެސް ރޮނާލްޑޯ ބޭނުންވާ ވާހަކަ ބުނެފައިވާނެ ކަމަށެވެ.

"ރޮނާލްޑޯ ގައުމީ ޓީމުގައި ހޭދަކުރާ ދުވަސްތައް ނިންމާލަންވާނީ އޭނާ އަމިއްލައަށް ބޭނުންވާ ގޮތަކަށް. އެކަން ނިންމާނީ އޭނާ،" ޖީސަސް ބުންޏެވެ.

"އަހަރެން ފުރަތަމަ ވެސް ބުނިން އަހަންނަށް ރޮނާލްޑޯ ބޭނުމޭ. ކުޅުނަސް ނުކުޅުނަސް އަހަންނާ ގާތުގައި ހުރުން މުހިންމޭ. މިހާރު ވެސް މި ބުނަނީ ހަމަ އެ ވާހަކަ." ކޯޗު ބުނެފަވެއެވެ.

ރޮނާލްޑޯ ޓީމު ދޫކޮށް ދިޔުމާ ގުޅިގެން އުފެދުނު ކަންބޮޑުވުންތަކާ ގުޅިގެން ޕޯޗުގަލްގެ މިޑްފީލްޑަރު ބްރޫނޯ ފެނާންޑޭސް ބުނީ ގައުމީ ޓީމުގެ ތެރޭގައި އެއްވެސް ބައިބައިވުމެއް ނެތް ކަމަށެވެ. އަދި ރޮނާލްޑޯއަކީ ޕޯޗުގަލްގެ ފުޓްބޯޅައިގެ އެންމެ ބޮޑު ރަމްޒު ކަމަށާއި އެންމެންގެ އިހުތިރާމް އޭނާއަށް ހައްގުވާ ކަމަށް ބްރޫނޯ ބުންޏެވެ.

"އޭނާއަށް އޮތީ ހަމައެކަނި ތާރީޚުގެ އެންމެ މޮޅު ކުޅުންތެރިންގެ ތެރޭގައި ޚާއްސަ ޖާގައެއް އެކަންޏެއް ނޫން. ހުރިހާ ޕޯޗުގީޒުންގެ ހިތްތަކުގައި ވެސް އޭނާއަށް ޚާއްސަ މަގާމެއް އޮވޭ. އެންމެ މުހިންމު ކަމަކީ މިކަމުގައި ބައިބައިނުވުން،" ބްރޫނޯ ފާހަގަކުރިއެވެ.

އުމުރުން 18 އަހަރުގައި 2003 ވަނަ އަހަރު ގައުމީ ޓީމަށް ކުޅެން ފެށި ރޮނާލްޑޯ ވަނީ ހަ ވޯލްޑް ކަޕެއްގައި ވާދަކޮށްފައެވެ. އަދި މިއީ ފުޓްބޯޅައިގައި އޭނާ ފެންނާނެ ފަހު އަހަރަށް ވުން އެކަށީގެންވާ ކަމަށް އޭނާ ކުރިން ވަނީ ބުނެފައެވެ. ޕޯޗުގަލް ދެން ކުޅޭ މެޗުތަކުގައި ނޮވެމްބަރު 14 ގައި އަމިއްލަ ދަނޑުގައި ޑެންމާކާ ދެކޮޅަށް ނުކުންނައިރު، ނޮވެމްބަރު 17 ގައި ކުޅޭނީ ވޭލްސްއާ ދެކޮޅަށެވެ.

މި ދަނޑިވަޅުގައި، ރޮނާލްޑޯއާ އެންމެ ވާދަވެރި ތަރި ލިއޮނަލް މެސީ ވެސް އާޖެންޓީނާ ގައުމީ ޓީމަށް ކުޅޭ ފަހު މެޗުގައި އަންގާރަ ދުވަހު ބުއެނޮސް އައިރިސްގައި ބެނިންއާ ދެކޮޅަށް ނުކުންނާނެއެވެ.