ޔޫއެފާ ނޭޝަންސް ލީގުގައި ހޯމަ ދުވަހުގެ ރޭ ކުޅުނު މެޗުގައި މައިކަލް އޮލީސޭ މެޗު ނިމެން ދަނިކޮށް ކާމިޔާބުކުރި ރީތި ލަނޑާއެކު 1-0 އިން ބެލްޖިއަމް ބަލިކޮށް ފްރާންސުން ތާވަލުގެ ކުރިއަށް ޖެހިލައިފިއެވެ.

ބެލްޖިއަމްގެ ބްރަސެލްސްގައި ހުންނަ ކިންގް ބޯޑޮއިން ސްޓޭޑިއަމްގައި ކުޅުނު މި މެޗުން ފްރާންސް މޮޅުވުމާއެކު، އާ ކޯޗު ޒައިނުއްދީން ޒިދާނުގެ އިރުޝާދުގެ ދަށުން އެ ޓީމުން ވަނީ ޖެހިޖެހިގެން ދެވަނަ މެޗު ކާމިޔާބުކޮށްފައެވެ.

Ad
rt

މެޗުގެ އެއްވެސް ޓީމަކަށް ލަނޑެއް ނުޖެހި ނިމެން ދަނިކޮށް ފްރާންސް މޮޅުކޮށްދިން ލަނޑު އޮލީސޭ ކާމިޔާބުކުރީ މެޗުގެ 88 ވަނަ މިނެޓުގައެވެ. ބަޔާން މިއުނިކްގެ ތަރި އޮލީސޭ ކުޅެން ނުކުތީ މެޗުގެ 77 ވަނަ މިނެޓުގައި ބްރެޑްލީ ބާކޯލާގެ ބަދަލުގައެވެ. އޭނާ މި ލަނޑު ޖެހީ އަމިއްލަ ހާފުގެ ތެރެއިން ބޯޅަ ހިފައިގެން ކުރިއަށް އަރައި، ބެލްޖިއަމްގެ އޭރިއާގެ އަރިމަތިން ފޮނުވާލި ހިތްގައިމު ބޯޅަ ގޯލްކީޕަރަށް ނުހިފެހެއްޓޭނެހެން ގޯލުގެ ތިރީ ކަނަށް އަމާޒުކޮށްލައިގެންނެވެ.

މި މޮޅާއެކު ފްރާންސް އޮތީ ނޭޝަންސް ލީގުގެ ގްރޫޕް އޭ1 ގެ އެއްވަނައިގައި ކުޅުނު ދެ މެޗުން ލިބުނު ހަ ޕޮއިންޓާއެކުގައެވެ. ތާވަލުގެ ދެވަނައިގައި އޮތް ބެލްޖިއަމް އަދި ތިންވަނައިގައި އޮތް އިޓަލީއަށް ލިބިފައިވަނީ ތިން ޕޮއިންޓެވެ. އިޓަލީން ވަނީ ހޯމަ ދުވަހުގެ ރޭ ތުރުކީއާ ދެކޮޅަށް ކުޅުނު މެޗު 4-1 އިން ކާމިޔާބުކޮށްފައެވެ. ވޯލްޑް ކަޕަށްފަހު ދިދިއޭ ދެޝޯމްޕްސްގެ ބަދަލުގައި ފްރާންސްގެ ކޯޗުކަމާ ޒިދާން ހަވާލުވިފަހުން ކުޅުނު ފުރަތަމަ މެޗުގައި އެ ޓީމުން ވަނީ ވޭތުވެދިޔަ ހުކުރު ދުވަހު ތުރުކީ އަތުން 1-0 އިން މޮޅުވެފައެވެ.

މި މެޗަށް ފްރާންސް ނުކުތީ އެ ޓީމުގެ ކެޕްޓަން ކިލިއަން އެމްބާޕޭއާ ނުލާއެވެ. ރިއާލް މެޑްރިޑަށް ކުޅެމުންދާ އެމްބާޕޭއަށް ތުރުކީއާ ދެކޮޅަށް ކުޅުނު މެޗުގައި މޮޅުވި ލަނޑު ޖެހި މެޗުގައި ލިބުނު ވާތް ކަކުލުގެ އަނިޔާއަކަށް ފަރުވާ ހޯދުމަށް ވަނީ ކްލަބަށް އެނބުރި ގޮސްފައެވެ. މި މެޗުގައި ފްރާންސްގެ ފުރަތަމަ އެގާރައަށް ނުވަ ބަދަލެއް ޒިދާން ގެނެސްފައިވާއިރު، މަގާމު ދަމަހައްޓާފައިވަނީ ގޯލްކީޕަރު މައިކް މައިގްނާން އާއި ޗެލްސީގެ ޑިފެންޑަރު މެކްސެންސް ލެކްރޮއިކް އެކަންޏެވެ.

މި މެޗުގައި ފްރާންސްގެ މިޑްފީލްޑަށް އިޓަލީގެ ކޯމޯއަށް ކުޅޭ ލޫކަސް ޑަ ކުންހާ އަދި އެޓެކަށް މިދިޔަ ސީޒަނުގައި ފްރާންސްގެ ލީގު 1 ގެ އެންމެ ގިނަ ލަނޑު ޖެހި ރެންސްގެ ފޯވާޑް އެސްޓެބާން ލެޕޯލް ވަނީ ޤައުމީ ޓީމަށް ފުރަތަމަ މެޗު ކުޅެދީފައެވެ. އަނެއްކޮޅުން، އާ ކޯޗު މާކް ވަން ބޮމެލްގެ އިރުޝާދުގެ ދަށުން އަމިއްލަ ގައުމުގައި ފުރަތަމަ މެޗު ކުޅުނު ބެލްޖިއަމް ޓީމުން ފެނުނީ، ހުކުރު ދުވަހު އިޓަލީ އަތުން 2-0 އިން މޮޅުވި މެޗުގެ ފުރަތަމަ އެގާރައަށް ދެ ބަދަލެއް އެކަނި ގެނެސްގެން ނުކުތް ތަނެވެ.

މުޅި މެޗަށް ބަލާއިރު ގިނަ ފުރުސަތުތައް ތަނަވަސްކުރީ ފްރާންސުންނެވެ. އެގޮތުން ފުރަތަމަ ހާފުގައި ޕެރިސް ސެއިންޓް ޖާމަން (ޕީއެސްޖީ) ގެ ޑެސިރޭ ދޫއޭ ފޮނުވާލި ހަމަލާއެއް ގޯލުގެ ހުރަސް ދަނޑިއަށް އަމާޒުވިއިރު، ދެވަނަ ހާފުގެ ކުރީކޮޅު ދާ ކުންޔާ ފޮނުވާލި ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. ނޭޝަންސް ލީގުގައި ފްރާންސް ދެން އެންމެ އަވަހަށް ނުކުންނާނީ އަންނަ ހުކުރު ދުވަހު ސްޓޭޑް ދެ ފްރާން