ވޯލްޑް ކަޕް ފުޓްބޯޅަ މުބާރާތުގައި ރޭ ކުޅުނު މެޗުގައި ސްކޮޓްލޭންޑްގެ މައްޗަށް 3-0 ގެ ނަތީޖާއަކުން ކުރިހޯދައި، ފަސް ފަހަރުގެ ޗެމްޕިއަން ބްރެޒިލުން މުބާރާތުގެ ނޮކްއައުޓް ބުރަށް ދަތުރުކޮށްފިއެވެ.
މި މެޗުގައި ބްރެޒިލްގެ ވިނީޝިއަސް ޖޫނިއާ ދެ ގޯލް ޖެހިއިރު، އަނެއް ލަނޑު ކާމިޔާބުކޮށްދިނީ މަތެއުސް ކުންހާއެވެ.
މެޗުގެ ހަތްވަނަ މިނެޓުގައި ވިނީޝިއަސް ފުރަތަމަ ލަނޑު ޖަހައި ބްރެޒިލަށް ލީޑު ހޯދައިދިންއިރު، ދެވަނަ ލަނޑު އޭނާ ކާމިޔާބުކުރީ ފުރަތަމަ ހާފު ނިމެން ކައިރިވެފައި ވަނިކޮށެވެ. މިއާއެކު ގްރޫޕް ސްޓޭޖުގެ ތިން މެޗުގައިވެސް އޭނާ ވަނީ ލަނޑު ޖަހާފައެވެ. މި މުބާރާތުގައި މިހާތަނަށް ވިނީޝިއަސް ހަތަރު ލަނޑު ޖަހާފައިވާއިރު، މިއީ ފްރާންސްގެ ކީލިއަން އެމްބާޕޭއާ އެއްވަރުގެ އަދަދެކެވެ. މިވަގުތު އެންމެ ގިނަ ލަނޑު ޖަހާފައިވަނީ ފަސް ލަނޑާއެކު ލިއޮނަލް މެސީއެވެ.
މި މެޗުގައި ބްރެޒިލްގެ ސަޕޯޓަރުންނަށް ލިބުނު އެންމެ ބޮޑު އުފަލަކީ އަނިޔާގެ ސަބަބުން ފުރަތަމަ ދެ މެޗުގައި ނުކުޅެވުނު ތަރި ނޭމާ ކުޅުމުގެ ތެރެއަށް އެނބުރި އައުމެވެ. މެޗުގެ 76 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި އޭނާ ދަނޑަށް އެރިއިރު، ހާޑް ރޮކް ސްޓޭޑިއަމްގައި ތިބި ގިނަ އަދަދެއްގެ ބްރެޒިލް ސަޕޯޓަރުން ވަނީ އޭނާގެ ނަމުން ގޮވާ، ވަރަށް ހޫނު މަރުހަބާއެއް ކިޔާފައެވެ.
އުމުރުން 34 އަހަރުގެ ނޭމާ އަކީ ބްރެޒިލްގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާއެވެ. އޭނާ ވަނީ މިހާތަނަށް ގައުމީ ޓީމަށް ކުޅުނު 130 މެޗުގައި 79 ލަނޑު ޖަހާފައެވެ. މިއީ އޭނާ ކުޅޭ ހަތަރުވަނަ ވޯލްޑް ކަޕް ކަމަށްވާއިރު، މީގެ ކުރިން ކުޅުނު ތިން މުބާރާތުގައި އޭނާ ވަނީ އަށް ލަނޑު ކާމިޔާބުކޮށްފައެވެ.
ސްކޮޓްލޭންޑަށް ބަލާއިރު، މިއީ 1998 ވަނަ އަހަރަށްފަހު އެ ގައުމުން ވޯލްޑް ކަޕްގައި ވާދަކުރާ ފުރަތަމަ ފަހަރެވެ. އެ ޓީމުގެ ސަޕޯޓަރުން، "ޓާޓަން އާމީ" ގެ ނަމުން މަޝްހޫރުވެފައިވާއިރު، އެމީހުން ވަނީ ބޮސްޓަން އަދި މިއާމީ ސަރަހައްދުގައި ފޯރިގަދަ މާހައުލެއް އުފައްދާފައެވެ. ނަމަވެސް، މިފަހަރުވެސް ސްކޮޓްލޭންޑަށް ގްރޫޕް ސްޓޭޖުން ކުރިއަށް ދެވޭގޮތެއް ނުވިއެވެ. މިއީ ވޯލްޑް ކަޕްގައި އެ ގައުމުން ވާދަކުރި 9 ފަހަރުގެ ތެރެއިން ގްރޫޕް ފަހަނައަޅައި ނުދެވުނު 9 ވަނަ ފަހަރެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!