އީރާނާއެކުވި ހަނގުރާމަ ހުއްޓާލުމަށް އެއްބަސްވިތާ 24 ގަޑިއިރުވެސް ނުވަނީސް، އެމެރިކާ ސަރުކާރުން އެ އެއްބަސްވުމަށް ބޮޑެތި ބަދަލުތަކެއް ގެންނަން ފަށައިފިއެވެ.
މި ބަދަލުތަކުގެ ސަބަބުން، ސަރަހައްދީ ހަމަޖެހުމަށް ލިބުނު އުންމީދުތައް އޮޅުންބޮޅުންގަނޑެއްގެ ތެރެއަށް މިހާރު ވަނީ ވެއްޓިފައެވެ. އަދި ސުލްހައަށް އޮތް އުންމީދު ވެސް ވަނީ ހަނިވެފައެވެ.
މީގެ ކުރިން ޕާކިސްތާނުން ކަށަވަރުކޮށްދީފައިވާ ގޮތުގައި، އެއްބަސްވުމުގެ ތެރޭގައި ލުބުނާން ހިމެނުމަށް އެމެރިކާއިން އޮތީ އެއްބަސްވެފައެވެ. ނަމަވެސް، ދެ ހަފުތާގެ މުއްދަތަށް އިޢުލާންކުރި ހަނގުރާމަ ހުއްޓާލުމުގެ އެއްބަސްވުމުގެ ދެލިގަނޑު ހިކުމުގެ ކުރިން، އެކި ކަންކަން "ސާފުކޮށްދިނުމުގެ" ނަމުގައި އެމެރިކާއިން އަމަލުކުރަން ފެށި ގޮތުން މި އެއްބަސްވުން މިހާރު ވަނީ ސިޔާސީ ކުޅިގަނޑަކަށް ބަދަލުވެފައެވެ. ބުދަ ދުވަހުގެ މެންދުރުފަހާ ހަމައަށް އައިއިރު، ޓްރަމްޕްގެ ސަރުކާރާއި ތެހެރާނުން ދަނީ އެއްބަސްވުމުގައި އެއްބަސްވި ކަންކަމާ މެދު އިންތިހާއަށް ތަފާތު މާނަކުރުންތަކެއް ނެރެމުންނެވެ.
އަންނަ ހުކުރު ދުވަހު އިސްލާމްއާބާދުގައި ބޭއްވުމަށް ހަމަޖެހިފައިވާ މަޝްވަރާތަކަށް ހިޔަނި އެޅިގެންދިޔަ މި ބަދަލުތަކުގެ ތަފްސީލުތަކަކީ:
1. "އޮޅުވާލުމެއްގެ" ގޮތުގައި ސިފަކުރި 10 ނުކުތާގެ ޕްލޭންއެންމެ ބޮޑު ބަދަލެއް އައީ، އީރާނުން ހުށަހެޅި 10 ނުކުތާގެ ޕްލޭނަކީ "އަމަލުކުރެވިދާނެ" އެއްޗެއް ކަމަށް ރައީސް ޓްރަމްޕް ކުރިން ބުނުމަށްފަހު، އެއަށް ފަސްޖެހުމުންނެވެ. އީރާނުން ޔުރޭނިއަމް މުއްސަނދިކުރުން ކުރިއަށް ގެންދެވޭނެ ކަމަށް ދޭހަވާ ގޮތަށް އެ ޕްލޭންގެ ފާރިސީ ތަރުޖަމާއެއް ފެތުރެން ފެށުމުން، ޓްރަމްޕް ވަނީ އެއީ "އޮޅުވާލުމެއް" ކަމަށް 'ޓްރުތް ސޯޝަލް' ގައި ބުނެފައެވެ. މިހާރު އެމެރިކާއިން ބާރުއަޅަނީ އީރާނުގައި ހުރި މުއްސަނދިކުރި ޔުރޭނިއަމްގެ ހުރިހާ މާއްދާތަކެއް އެމެރިކާގެ އަސްކަރިއްޔާއާ ގުޅިގެން "ކޮނެގެން ނަގައި ބޭރުކުރުމަށެވެ."
2. ލުބުނާން އެއްބަސްވުމުން ބޭރުކުރުންއެއްބަސްވުމަށް އައި އެންމެ ނުރައްކާތެރި ބަދަލަކީ އޭގެ ދާއިރާއަށް އައި ބަދަލެވެ. ޕާކިސްތާނުގެ ބޮޑުވަޒީރު ޝެހްބާޒް ޝަރީފް ފުރަތަމަ އިޢުލާންކުރެއްވީ ލުބުނާން ހިމެނޭހެން ހުރިހާ ތަނެއްގައި ހަނގުރާމަ ހުއްޓާލުމަށެވެ. ނަމަވެސް، ވައިޓް ހައުސްއާއި އިސްރާއީލުން ފަހުން ބުނެފައިވަނީ މި އެއްބަސްވުން ހިނގާނީ ހަމައެކަނި އީރާނުގެ ބިމަށް ކަމަށެވެ. މީގެ ނަތީޖާއެއްގެ ގޮތުން އިސްރާއީލުން ބެއިރޫތަށް ދޭ ހަމަލާތައް ވަރުގަދަކުރުމާ ގުޅިގެން، އީރާނުން ވަނީ ބުދަ ދުވަހު ހޯރްމުޒް ކަނޑުއޮޅި ކުރު މުއްދަތަކަށް ބަންދުކޮށްފައެވެ.
3. ހަތިޔާރު ފޯރުކޮށްދޭ ފަރާތްތަކުގެ އަތުން 50 އިންސައްތައިގެ ޓެރިފް ނެގުންޓްރަމްޕް ވަނީ ހަނގުރާމަ ހުއްޓާލުމުގެ އެއްބަސްވުމަށް އިގްތިސާދީ ބޮޑު ޝަރުތެއް އިތުރުކުރައްވާފައެވެ. އެގޮތުން އީރާނަށް އަސްކަރީ ހަތިޔާރު ފޯރުކޮށްދޭ ކޮންމެ ގައުމަކުން އެތެރެކުރާ މުދަލުން ވަގުތުން 50 އިންސައްތައިގެ އިމްޕޯޓް ޑިއުޓީ ނަގާނެ ކަމަށް އޭނާ އިޢުލާންކުރެއްވިއެވެ. މިއީ އީރާނަށް ޓެކްނޮލޮޖީ ފޯރުކޮށްދޭ ކަމަށް ތުހުމަތުކުރެވޭ ޗައިނާއަށް އަމާޒުކޮށް ފޮނުވާލި އިންޒާރެއް ކަމަށް ބެލެވެއެވެ.
4. ހޯރްމުޒް ކަނޑުއޮޅީގެ "ޓޯލް ގޭޓް"މިހާރު އެންމެ ބޮޑު ޚިޔާލުތަފާތުވުމެއް އުފެދިފައިވަނީ ހޯރްމުޒް ކަނޑުއޮޅިން ދަތުރުކުރާ އުޅަނދުފަހަރުގެ އަތުން ފީ ނެގުމާ މެދުގައެވެ. އީރާނުން ބުނާ ގޮތުގައި އެއްބަސްވުމުގެ ދަށުން އުޅަނދަކަށް 2 މިލިއަން ޑޮލަރާ ހަމައަށް "ޓްރާންސިޓް ފީ" ނެގުމުގެ ބާރު އެގައުމަށް ލިބެއެވެ. ނަމަވެސް ޕެންޓަގަންއިން ވަނީ މިކަން ދޮގުކޮށްފައެވެ. އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ބުނީ، އެމެރިކާއަށް ލިބުނީ ބޮޑު ކާމިޔާބީއެއް ކަމަށާއި، އެ ކަނޑުއޮޅި އޮންނަންވާނީ އެއްވެސް ފީއަކާ ނުލައި ހުޅުވާލެވިފައި ކަމަށެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!