ޗައިނާއިން އެމެރިކާއަށް އެތެރެކުރާ މުދަލުގެ ޓެރިފް 125 އިންސައްތައަށް އިތުރުކުރުމަށް ނިންމާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. މިއީ ދެ ގައުމުގެ ދެމެދުގައި ހިނގަމުންދާ ވިޔަފާރީގެ ހަނގުރާމައިގެ އާ ބާބެއް ކަމަށް ބެލެވެއެވެ.
ޓްރަމްޕް މި ވާހަކަ ވިދާޅުވެފައިވަނީ އޭނާގެ ސޯޝަލް މީޑިއާ ޕްލެޓްފޯމް "ޓްރޫތް ސޯޝަލް" ގައި ކުރެއްވި ޕޯސްޓެއްގައެވެ. އޭނާ ވިދާޅުވީ، "ދުނިޔޭގެ މާކެޓްތަކަށް ޗައިނާއިން ދައްކާފައިވާ ހުތުރު އަދަބުގެ ސަބަބުން، އެމެރިކާއިން ޗައިނާގެ މުދަލަށް ނަގާ ޓެރިފް 125 އިންސައްތައަށް މިހާރުން މިހާރަށް އިތުރުކުރަން ނިންމައިފި." ކަމަށެވެ.
ޓްރަމްޕް އިތުރަށް ވިދާޅުވީ، "އެމެރިކާއާއި އެހެން ގައުމުތަކުގެ އަތުން ފައިދާ ނެގުމުގެ ދުވަސްތައް ނިމުމަކަށް އައިސްފައިވާކަން ޗައިނާއިން ގަބޫލުކުރާނެ ދުވަހެއް އަންނާނެ ކަމަށް އުއްމީދުކުރަން."
އެހެންނަމަވެސް، ޗައިނާއަށް މި ހަރުކަށި ފިޔަވަޅު އަޅުއްވަމުން، ޓްރަމްޕް ވަނީ އެހެން 75 އަށްވުރެ ގިނަ ގައުމަކަށް ލުޔެއް ދެއްވާފައެވެ. މި ގައުމުތަކަށް 90 ދުވަހުގެ މުއްދަތެއް ދެއްވައި، އެ މުއްދަތުގައި ޓެރިފް 10 އިންސައްތައަށް ތިރިކުރައްވާފައިވެއެވެ. މިއީ މި ގައުމުތަކުން އެމެރިކާއާ އެކު ވިޔަފާރީގެ މައްސަލަތައް ހައްލުކުރުމަށް މަސައްކަތްކުރަމުންދާތީ ދެއްވި ލުޔެއް ކަމަށް ޓްރަމްޕް ވިދާޅުވިއެވެ.
މި ނިންމުމަކީ އެމެރިކާއާއި ޗައިނާގެ ދެމެދުގައި ހިނގަމުންދާ ވިޔަފާރީގެ ހަނގުރާމައިގެ އައު ކޯޅުމެކެވެ. މި ނިންމުމުގެ ސަބަބުން ދެ ގައުމުގެ ދެމެދުގައި އޮތް ގުޅުން އިތުރަށް ގޯސްވެ، ދުނިޔޭގެ އިގްތިސާދަށް ނޭދެވޭ އަސަރުތަކެއް ކުރާނެ ކަމަށް ބެލެވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!