ގެވެށި އަނިޔާ އަކީ ކޮބާ؟

ގެވެށި އަނިޔާއަކީ އާއިލާގެ ތެރޭގައި ނުވަތަ ގާތް ގުޅުމެއް އޮންނަ ދެމީހުންގެ ދެމެދުގައި ހިނގާ އަނިޔާވެރި އަމަލުތަކެވެ.

މިއީ މުޖުތަމައުގައި ވަރަށް ބޮޑަށް ފެތުރިފައިވާ، ނަމަވެސް ގިނަފަހަރު ވަންހަނާކޮށް ބޭއްވޭ މައްސަލައެކެވެ. ގެވެށި އަނިޔާ އަކީ ޖިސްމާނީ އަނިޔާއަކަށް ވާކަށް ނުޖެހެއެވެ. އޭގެ ތެރޭގައި ނަފްސާނީ އަނިޔާ، މުދަލަށް ގެއްލުންދިނުން، ޖިންސީ ފުރައްސާރަ، އަނގަބަހުން ފުރައްސާރަކުރުން، މާލީގޮތުން ދަތިކުރުން އަދި ބިރުދެއްކުންފަދަ އެތައް ކަމެއް ހިމެނެއެވެ.

ގެވެށި އަނިޔާގެ ޝިކާރައަކަށްވާ މީހުންނަކީ ގިނަފަހަރު އަނިޔާކުރާ މީހާއާ އެކު ދިރިއުޅޭ ނުވަތަ އޭނާގެ ބެލުމުގެ ދަށުގައި ތިބޭ މީހުން ކަމުން، މި މައްސަލަ ރިޕޯޓުކުރަން އެމީހުން ޖެހިލުންވެއެވެ. ނަމަވެސް ގެވެށި އަނިޔާއަކީ ގާނޫނީގޮތުން މަނާކަމެކެވެ. އަދި އެކަން ހުއްޓުވުމަށް ސަރުކާރުންނާއި މުޖުތަމައުން މަސައްކަތްކުރަމުންދެއެވެ.

ގެވެށި އަނިޔާގެ މައްސަލައެއް ދިމާވެއްޖެނަމަ، އެކަން ވަގުތުން ފުލުހުންނަށް ރިޕޯޓުކުރުމަކީ މުހިންމު ކަމެކެވެ. އެގޮތުން 119 އަށް ގުޅައިގެން ނުވަތަ އެހެނިހެން ގޮތްގޮތުން ފުލުހުންނަށް މައްސަލަ ހުށަހެޅިދާނެއެވެ. އަދި މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިންވެސް މިފަދަ މައްސަލަތަކުގައި އެހީތެރިކަން ފޯރުކޮށްދެއެވެ.

ގެވެށި އަނިޔާގެ މައްސަލައެއް ހުށަހަޅާނީ ކިހިނެތް؟

އަޅުގަނޑުމެންގެ ތިރީގައިވާ ނަމްބަރުތަކަށް ގުޅުއްވައިގެން 24/7 ގައި ގެވެށި އަނިޔާގެ މައްސަލަ ހުށަހެޅުއްވޭނެއެވެ.

އިމަރޖެންސީ 119
އާއްމު ނުވަތަ ނޮން އިމަރޖެންސީ 2111 332

މި ދެ ނަމްބަރުގެ އިތުރުން ފެމެލީ އެންޑް ޗައިލްޑް ޕްރޮޓެކްޝަންގެ ތިރީގައިވާ ނަމްބަރުތަކަށްވެސް މައްސަލަ ހުށަހެޅުއްވޭނެއެވެ.

ފުލުހުންގެ އިތުރުން ތިރީގައި ފަރާތްތަކަށްވެސް ގެވެށި އަނިޔާގެ މައްސަލަތައް ހުށަހެޅުއްވޭނެއެވެ.

0600 300

0163 979

މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް 8393 332

ކުޑަކުދިންގެ ހެލްޕްލައިން 1412

ގެވެށި އަނިޔާގެ މައްސަލައެއް ހުށަހެޅުމުން، ފުލުހުން އެކަން ވަރަށް ސީރިއަސްކޮށް ބަލައި ތަޙުޤީޤުކުރާނެއެވެ. އަނިޔާ ލިބުނު ފަރާތަށް ރައްކާތެރިކަން ފޯރުކޮށްދިނުމަށްޓަކައި އެކި ފިޔަވަޅުތައް އެޅޭނެއެވެ. އޭގެ ތެރޭގައި ވަގުތީ ހިޔާވަހިކަން ހޯދައިދިނުމާއި، އަނިޔާކުރި ފަރާތުގެ މައްޗަށް ރައްކާތެރިކަމުގެ އަމުރެއް ނެރުން ހިމެނެއެވެ.

ގެވެށި އަނިޔާއަކީ އެއްވެސް ހާލެއްގައި ގަބޫލުކުރެވޭނެ ކަމެއް ނޫނެވެ. އެއީ އިންސާނީ ޙައްޤުތަކާ ޚިލާފު، އިސްލާމްދީނުގައިވެސް މަނާކުރެވިފައިވާ ކަމެކެވެ. އެހެންކަމުން، މުޖުތަމައުގެ ހުރިހާ ފަރުދުންވެސް ގެވެށި އަނިޔާ ހުއްޓުވުމަށް މަސައްކަތްކުރުމަކީ މުހިންމު ކަމެކެވެ. އަދި އެފަދަ އަނިޔަދަ އަނިޔާއެއްގެ ޝިކާރައަކަށްވާ މީހުންނަށް އެހީތެރިވެ، އެމީހުން ރައްކާތެރިކުރުމަށް އެންމެން ގުޅިގެން މަސައްކަތްކުރަންވާނެއެވެ.