ސީޕްލޭން ޓާމިނަލް ހިންގުން އެއްވެސް ބަޔަކަށް ސަރުކާރުން ދިނުމަކީ ކުރަންހެޔޮވާވަރު ކަމެއް ނޫންކަމަށް ކެނދޫ ދާއިރާގެ ރައްޔިތުންގެ މަޖިލިސްގެ މެމްބަރު ޢަލީ ޙުސައިން ވިދާޅުވެއްޖެއެވެ.

އެމްއޭސިއެލްގެ ސީޕްލޭން ޓާމިނަލް ހިންގުން އެއްވެސް ބަޔަކަށް ސަރުކާރުން ދިނުމަކީ ދިވެހި ދައުލަތަށް އިންތިހާޔަށް ގެއްލުންވާނެ ކަމެއްކަމަށްވެސް މެމްބަރު ޢަލީވަނީ ވިދާޅުވެފައެވެ.

Ad
rt

މެމްބަރު އަލީ ހުސައިން ވަކާލާތު ކުރައްވަމުން ގެންދަވަނީ، އެފަދަގޮތަކަށް އަމަލުކޮށްފިނަމަ ދައުލަތަށް ފޫނުބެދޭ ގެއްލުމެއް ލިބިދާނެ ކަމަށްޓަކައެވެ.

މެމްބަރު ޢަލީ އެމޭރުމުން ވިދާޅުވީ، އެމައްސަލާގައި ދާންދޫ ދާއިރާގެ މަޖިލިސްމެމްބަރު ޔައުޤޫބް އަބުދުﷲ، "ސީޕްލޭން ޓާމިނަލް ޓީއެމްއޭ އަށް ވަރަށް އަވަހަށް ދޭނެ" ކަމަށް ދައްކަވާފައިވާ ވާހަކައާއި ގުޅިގެން މިހާރު ނޫހުން ގެނެސްދީފައިވާ ޚަބަރެއް ހިއްސާ ކުރައްވަމުންނެވެ.

ދާންދޫ ދާއިރާގެ މެމްބަރު ޔައުޤޫބު ވަނީ މިމައްސަލާގައި ނުރުހި ވަޑައިގެން ޓްވީޓްވެސް ކުރަށްވާފައެވެ. އެ ޓުވީޓުގައި ޔައުޤޫބު ވިދާޅުވެފައި ވަނީ އެމްއޭސިއެލްގެ ސީޕްލޭން ޓާމިނަލް ވަރަށް އަވަހަށް ޓީއެމްއާއި ހަވާލުކުރަން އުޅޭކަމަށް މައުލޫމާތު ލިބިފައިވާކަމަށެވެ. ދައުލަތަށް ގެއްލުންވާ ގޮތަށް އެތަން ޓީއެމްއެއާއި ހަވާލުކޮށްފިނަމަ އެބަޔަކު ޖަވާބުދާރީ ކުރަން ފަސްނުޖެހޭނެ ކަމަށް ޔައުޤޫބް ވިދާޅުވެފައި ވެއެވެ. އަދި އެބަޔަކު މާލިއްޔަތު ކޮމެޓީއަށް ހާޒިރުކޮށް ފިޔަވަޅު އަޅާނެކަމަށްވެސް ޔައުޤޫބް ވިދާޅުވިއެވެ.

މާލިއްޔަތު ކޮމެޓީގައި ހިމެނިވަޑައިގަންނަވާ މެމްބަރު ޔައުޤޫބަކީ ސީޕްލޭން އޮޕަރޭޓް ކުރާ ދިވެހި ކުންފުނިތައް ވެސް އޮއްވައި، އެ ފަރާތްތަކަށް މާކެޓްގެ ވާދަވެރިކަން ހަނިވާ ގޮތަށް ހަމައެކަނި ޓީއެމްއޭއަށް، އާ ސީޕްލޭން ޓާމިނަލް ދިނުމާ ދެކޮޅަށް އެންމެ ބޮޑަށް އަޑުއުފުއްލަވަމުން ގެންދަވާ އެއް މެމްބަރެވެ.

އެމްއޭސިއެލްގެ ސީޕްލޭން ޓާމިނަލް ޓީއެމްއޭއަށް ދޭން ނުފެންނަކަމަށް ރައްޔިތުންގެ މަޖިލިސްގެ މާލިއްޔަތު ކޮމެޓީއިންވެސްވަނީ ނިންމާފައެވެ. އެކަމަށް އޭސީސީއިން ހުއްދަ ދީފައި ނުވާއިރު، އޮޑިޓަރ ޖެނެރަލްވެސް ވަނީ އެކަމާ ދެކޮޅަށް ލަފާދީފައެވެ.