ވެމްކޯއިން ކުނި ނަގާ ގަޑިއަށް ބަދަލެއް

ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން މާލޭ ސިޓީއަށް ދެމުން ގެންދާ ކުނި އުކާލުމުގެ ވަގުތައް ބަދަލު ގެނެސްފިއެވެ.

މިއަދު ބޭއްވި ނޫސްވެރިން ބައްދަލުވުމެއްގައި ވާހަކަ ދައްކަވަމުން ވެމްކޯގެ މެނޭޖިން ޑިރެކްޓަރު އާދަމް މުހައްމަދު ވިދާޅުވީ ޓާގެޓަކީ ފަތިސް ނަމާދަށް މާލޭ ރައްޔިތުން ހޭލަންވާއިރަށް މާލޭގެ މަގުތަކުގެ ހުރި ކުނި ނަގާ، ކުނި ކަހާފަ ބޭއްވުން ކަމަށެވެ.

"ރީތި މަގެއްގަ ހިނގާލާފަ ނަމާދަށް ދެވޭ ވަރަށް އަޅުގަނޑުމެންނަށް ކުރެވޭނެ ކަމަށް ޔަގީންކަން އެބަ އޮތް،"

އާދަމް މުހައްމަދު ވިދާޅުވި އެވެ.

މީގެއިތުރުން އެކުންފުނިން ނެރުނު ދެންނެވުމެއްގައި ވެސް ވަނީ އެ ބަދަލު ގެންނަން ނިންމާފައިވާކަން ހާމަކޮށްފައެވެ.

މިގޮތުން ވެމްކޯއިން ބުނީ، ކޯވިޑް-19 އާއި ގުޅިގެން ފުރަމާލެ ސަރަހައްދުގައި އިޢުލާންކޮށްފައިވާ ސިއްޙީ ކުއްލި ނުރައްކަލުގެ ހާލަތާއި، ކާފިއުގެ ވަގުތަށް ގެނެވުނު ބަދަލަށް ރިޢާޔަށްކުރުމަށްފަހު، މާލެ ސިޓީ ކައުންސިލްގެ އިސްނެގުމަކަށް އެ ކޯޕަރޭޝަންއިން މާލޭ ސިޓީގެ ގޭބިސީތަކަށް ފޯރުކޮށްދެމުންދާ ކުނި ނެގުމުގެ ޙިދުމަތްތަކަށް ބަދަލުގެނައުމަށް ނިންމާފައިވާ ކަމަށެވެ.

"މިގޮތުން، ކުނި ނެގުމުގެ މަސައްކަތް މިވަގުތު ފޯރުކޮށްދެމުންދާ މެންދުރުގެ ވަގުތަކީ، މާލޭގެ މަގުތަކުގައި ދުއްވާ އުޅަނދާއި، އާންމުން ގިނަ އަދަދަކަށް ހަރަކާތްތެރިވާ ވަގުތެއްކަމަށް މިކޯޕަރޭޝަން އަށް ވަނީ ފާހަގަކުރެވިފައެވެ. ހަމަ މިއާއިއެކު،ކުނި ބޭލުމަށް ހަމަޖެހިފައިވާ ވަގުތުތައް ފިޔަވައި އެހެންވަގުތު ތަކުގައި މާލޭގެ ބައެއް ސަރަހައްދުތަކުގައި ކުނި ގިނަ އަދަދަކަށް ޖަމާކޮށްފައި ހުންނަ މައްސަލަ ވަނީ ފާހަގަކުރެވިފައެވެ. އަދި ކުރިޔަށް އޮތް ދުވަސްތަކުގައި ސަރުކާރުން ސިއްހީ ކުއްލި ނުރައްކަލުގެ ހާލަތާއި ގުޅިގެން އަޅާފައިވާ ފިޔަވަޅުތަކަށް އިތުރު ލުއިދިނުމަށް މަޝްވަރާކުރަމުންދިޔުމާއި އެކު، ވެމްކޯގެ އޮޕަރޭޝަނަށް އަންނަނިވި ބަދަލުތައް ގެނެއައުމަށް ވަނީ ނިންމާފައެވެ."

ވެމްކޯއިން ބުނެފައި ވެއެވެ.

މިގޮތުން 11 ޖަނަވަރީ، 2021 އިން ފެށިގެން ވެމްކޯގެ ހައުސްހޯލްޑް ޔުނިޓްއިން މާލޭ ސިޓީގެ ގޭބިސީތަކުން ކުނި ނެރެންވާނީ 22:00 އިން 00:00 އާއި ދެމެދު ކަމަށް އެ ކުންފުނިން ވަނީ ބުނެފައެވެ.

" By changing our collection hours to midnight, we expect to have an even more efficient system of collection and cleaning as our teams will be working simultaneously. Moreover, streets will be clear of any signs of waste during the daytime" - MD @AdamMhmd_ pic.twitter.com/CpWLIZj4gX

— Waste Management Corporation Limited (WAMCO) (@WAMCOmv) December 24, 2020

މިގެނެވުނު ބަދަލާއި ގުޅިގެން ކަސްޓަމަރުން ސަމާލުކަމަށް ވެމްކޯއިން އެދިފައިވާ ކަންކަން:

- މި އައު އުސޫލަށް އަމަލުކުރަން ވާނީ ފުރަމާލެ ސަރަހައްދުގެ ތެރެއިން، މާލެ ސިޓީގެ ގެބީސީތައް އެކަންޏެވެ.
- ވެމްކޯއިން ހިދުމަތްތައް ފޯރުކޮށްދޭނީ ކުރިއެކޭވެސް އެއްފަދައިން އިމާރާތުގެ ބޭރުން، ދޮރުމަތިންނެވެ.
- އަދި މިކޯޕަރޭޝަންގެ އެއްވެސް މުވައްޒަފަކު އިމާރާތެއްގެ ވަކިވަކި ފަންގިފިލާތަކުން ކުނި ނެގުމަށް ހަމަޖެހިފައި ނުވާ ވާހަކަ ދަންނަވަމެވެ.

ސަރުކާރުގެ ފަރާތުން ފުރަބަންދަށް ބޮޑެތި ލުއިތަކެއް ދީފައިވީނަމަވެސް، މިހާލަތުގައި ވެސް ރައްކާތެރިގޮތުގައި ކުނި ބަންދުކުރުމަށާއި އެންގިފައިވާ ވަގުތުގައި ކުނި ބަންދުކޮށްފައި ނެރުމަށް ވެސް ވެމްކޯއިން ވަނީ އިލްތިމާސްކޮށްފައެވެ.