ވެނެޒުއޭލާއަށް ހަމަލާދިނީ އެ ގައުމުގެ ތެލަށް ވެރިވެގަންނަން ކަމަށް ޓްރަމްޕް އަނެއްކާވެސް އެއްބަސްވެއްޖެ

އެމެރިކާއިން ވެނެޒުއޭލާއަށް އަސްކަރީ ހަމަލާދީ އެ ގައުމުގެ ވެރިކަން ބަދަލުކުރީ އެ ގައުމުގެ ތެލުގެ މުއްސަނދިކަން އަތުލައިގަތުމުގެ ބޭނުމުގައި ކަމަށް އެމެރިކާގެ ރައީސް ޑޮނަލްޑް ޓްރަމްޕް އަނެއްކާވެސް އިއުތިރާފުވެވަޑައިގެންފިއެވެ.

ޓްރަމްޕް ވިދާޅުވީ އެ އޮޕަރޭޝަނަކީ އެއްވެސް މީހެއްގެ ފުރާނަ ނުގެއްލި ކާމިޔާބުކުރި އަވަސް އަސްކަރީ ހަރަކާތެއް ކަމަށާއި، އޭގެ ސަބަބުން މިހާރު އެމެރިކާއަށާއި އެ ގައުމުގެ ތެޔޮ ކުންފުނިތަކަށް ދުވާލަކު އެތައް ބިލިއަން ޑޮލަރެއްގެ ފައިދާ ލިބެމުންދާ ކަމަށެވެ.

ފަހަކަށް އައިސް ދެއްވަމުން ގެންދަވާ ތަގުރީރުތަކާއި އިންޓަވިއުތަކުގައި މި މޭރުމުން ވާހަކަދައްކަވަމުން ޓްރަމްޕް މިވާހަކަ އައުކުރަށްވަމުން މިއަދު ވިދާޅުވީ، ވެނެޒުއޭލާގައި ކުރި ހަނގުރާމަ ނިމުނީ އެންމެ 48 މިނެޓުގެ ތެރޭގައި ކަމަށެވެ.

"ވެނެޒުއޭލާގައި ކުރި ހަނގުރާމަ އެއްވެސް މީހަކު މަރުނުވެ 48 މިނެޓުގެ ތެރޭގައި ވަނީ ނިމިފައި،" ޓްރަމްޕް ވިދާޅުވިއެވެ.

"އަޅުގަނޑުމެން މިހާރު ދުވާލަކު އެތައް ބިލިއަން ޑޮލަރެއް ހޯދަމުން އެބަ ގެންދަން، އަދި ތެޔޮ ކުންފުނިތަކަށް ވެސް ބޮޑެތި ފައިދާތަކެއް އެބަ ލިބޭ." ޓްރަމްޕް ވިދާޅުވިއެވެ.

މިއީ އެމެރިކާއިން ވެނެޒުއޭލާގެ ތެލުގެ ރިޒާވްތަކުގެ މައްޗަށް ބާރު ހިންގުމަކީ ލިބުނު ބޮޑު ސްޓްރެޓީޖިކް ކާމިޔާބީއެއްގެ ގޮތުގައި ދެއްކުމަށް ޓްރަމްޕް ވިދާޅުވި ވާހަކަފުޅެކެވެ.

މި އަސްކަރީ ހަރަކާތަކީ 2026 ވަނަ އަހަރުގެ ޖެނުއަރީ މަހު "އޮޕަރޭޝަން އެބްސޮލިއުޓް ރިޒޮލްވް" ގެ ނަމުގައި އެމެރިކާއިން ހިންގި އޮޕަރޭޝަނެކެވެ. ނިކޮލަސް މަދޫރޯގެ ވެރިކަން ވައްޓާލުމަށް އަމާޒުކޮށް ހިންގި މި އޮޕަރޭޝަނަށްފަހު، އެމެރިކާއިން އެކުލަވާލި ޝަރުތުތަކުގެ ދަށުން އެ ގައުމުގެ އިންތިގާލީ ލީޑަރަކަށް ހަމަޖެއްސީ ޑެލްސީ ރޮޑްރިގޭޒްއެވެ. އޭގެ ފަހުން ޓްރަމްޕްގެ ސަރުކާރުން ވަނީ ވެނެޒުއޭލާއާއެކު ދެފަރާތުގެ ހަކަތައިގެ އެއްބަސްވުމެއް އިއުލާނުކޮށް، އެމެރިކާގެ ސްޓްރެޓީޖިކް ޕެޓްރޯލިއަމް ރިޒާވް ފުރާލުމަށާއި އެމެރިކާގެ ރިފައިނަރީތަކަށް ވެނެޒުއޭލާގެ ތެޔޮ ނެގުމުގެ މަގު ފަހިކޮށްފައެވެ.

ވެނެޒުއޭލާގެ ތެލަށް ބާރުފޯރުވުން ދިފާއުކުރައްވަމުން ޓްރަމްޕް ވަނީ މާޒީގައި ވެނެޒުއޭލާއިން އެކްސަންމޮބިލް އަދި ކޮނޮކޯފިލިޕްސް ފަދަ އެމެރިކާގެ ތެޔޮ ކުންފުނިތައް އެއްވެސް ބަދަލަކާ ނުލައި ދައުލަތަށް ނެގުމަކީ އެމެރިކާގެ މުދާތައް "ވަގަށް ނެގުން" ކަމަށް ސިފަކުރައްވާފައެވެ. އަދި މިހާރު ގެންގުޅޭ އިންތިޒާމަކީ އެ ގެއްލުންތައް އަނބުރާ ހޯދުން ކަމަށް ވެސް އޭނާ ވިދާޅުވިއެވެ. މީގެ އިތުރުން މިއީ އެމެރިކާގެ ހަކަތައިގެ ސަޕްލައި ވަރުގަދަކޮށް، ޕެޓްރޯލްގެ އަގު ހަމައަކަށް އަޅުވައި، އެމެރިކާގެ ކުންފުނިތަކަށާއި އުމްރާނީ މަޝްރޫއުތަކަށް އާމްދަނީ ހޯދުމަށް ކުރި ކަމެއް ކަމަށް ވެސް ސަރުކާރުގެ އޮފިޝަލުން ފާހަގަކުރެއެވެ.

ނަމަވެސް އެމެރިކާގެ މި އަމަލުތަކާ ގުޅިގެން ބައިނަލްއަގުވާމީ ގާނޫނީ މާހިރުންނާއި އިންސާނީ ހައްގުތަކަށް މަސައްކަތްކުރާ ޖަމާއަތްތަކުން އަންނަނީ ވަރަށް ބޮޑަށް ފާޑުކިޔަމުންނެވެ. އދ. ގެ ޗާޓަރުގެ 2 ވަނަ މާއްދާގެ 4 ވަނަ ނަންބަރާ ހިލާފަށް، ސަލާމަތީ މަޖިލީހުގެ ހުއްދައެއް ނެތި އަދި އަމިއްލަ ދިފާއުގައި ނޫން ގޮތަކަށް ބާރުގެ ބޭނުންކޮށްފައިވާ ކަމަށް ޗެތަމް ހައުސް އާއި އިންޓަނޭޝަނަލް ފެޑެރޭޝަން ފޯ ހިއުމަން ރައިޓްސް (އެފްއައިޑީއެޗް) ފަދަ އިދާރާތަކުން ބުނެއެވެ. މީގެ އިތުރުން މިނިވަން ދައުލަތެއްގެ އިސްވެރިޔާ ދުރުކޮށް، އެ ގައުމުގެ މައިގަނޑު އިގްތިސާދީ ވަސީލަތްތައް އަތުލައިގަތުމާއި، ތެލުން ލިބޭ ފައިސާ ގަތަރު ފަދަ ތިންވަނަ ގައުމުތަކުގެ އޮފްޝޯ އެކައުންޓްތަކަށް ޖަމާކުރުމަކީ ބައިނަލްއަގުވާމީ މިންގަނޑުތަކާ ހިލާފު ކަންކަން ކަމަށް މާހިރުން ފާހަގަކުރެއެވެ.

އެމެރިކާގެ އެތެރޭގައި ވެސް ކޮންގްރެސްގެ ގާނޫނުހަދާ މަޖިލީހުގެ މެންބަރުންގެ ބޮޑެތި ފާޑުކިޔުންތަކެއް ވަނީ ޓްރަމްޕްގެ ސަރުކާރަށް އަމާޒުވެފައެވެ. ކޮންގްރެސްގެ ހުއްދައަކާ ނުލައި އަސްކަރީ ހަމަލާދިނުމަކީ 1973 ވަނަ އަހަރުގެ 'ވޯ ޕަވާސް ރިޒޮލިއުޝަން' އާ ހިލާފުވުން ކަމަށް ބުނެ ޓްރަމްޕް މަގާމުން ވަކިކުރުމުގެ މައްސަލަތައް ވެސް ވަނީ ހުށަހަޅާފައެވެ. އަދި އެގްޒެކެޓިވް އޯޑަރު 14373 ގެ ދަށުން އެމެރިކާގެ ޓްރެޜަރީގެ ބެލުމުގެ ބޭރުން ތެލުގެ އާމްދަނީ ބޭނުންކުރުމާއި، ކޭސް-ޒަބްލޮކީ އެކްޓާ އެއްގޮތަށް މި އެއްބަސްވުންތަކުގެ މައުލޫމާތު ކޮންގްރެސްއަށް ހާމަނުކުރާ މައްސަލައިގައި ހައުސް އޯވާސައިޓް ކޮމިޓީން ވަނީ ތަހުގީގުތައް ފަށާފައެވެ.