އައު ވޭރިއަންޓް އެންބީ.1.8.1 އިން ކޮވިޑް ކޭސްތައް މައްޗަށް ދާކަމަށް ޑަބްލިޔުއެޗްއޯއިން ބުނެފިއެވެ.

ދުނިޔޭގެ ސިއްޙަތު ޖަމްއިއްޔާ (ޑަބްލިޔުއެޗްއޯ) އިން ހާމަކޮށްފައިވާ ގޮތުގައި، ކޮވިޑް-19 ގެ އައު ވޭރިއަންޓެއް ކަމަށްވާ އެންބީ.1.8.1، އިރުމަތީ މެޑިޓަރޭނިއަން، ދެކުނު އިރުމަތީ އޭޝިއާ، އަދި ހުޅަނގު ޕެސިފިކް ސަރަޙައްދުތަކުގައި ކޭސްތައް އިތުރުވުމުގެ ފަހަތުގައި ވެދާނެއެވެ.

Ad
rt

މި ވޭރިއަންޓް ފުރަތަމަ ފާހަގަ ކުރެވިފައިވަނީ މެއި މަހުގެ މެދުތެރޭގައި، ދުނިޔޭގެ ފެންވަރުގައި ސީކުއެންސް ކުރެވުނު ސާމްޕަލްތަކުގެ ގާތްގަނޑަކަށް 11 އިންސައްތައިންނެވެ. އަދި އެންބީ.1.8.1 ވޭރިއަންޓް، އެމެރިކާގެ އެއަރޕޯޓްތަކުންވެސް ފެނިފައިވާއިރު، އަސަރުކޮށްފައިވާ ސަރަޙައްދުތަކުން ކެލިފޯނިއާ، ވޮޝިންޓަން، ވާޖީނިއާ، އަދި ނިއުޔޯކް ފަދަ ސްޓޭޓްތަކަށް ދަތުރުކުރި މީހުންގެ ފަރާތުން ވަނީ ފެނިފައެވެ.

ޑަބްލިޔުއެޗްއޯއިން ވަނީ މި ވޭރިއަންޓް "މޮނިޓަރ ކުރަމުންދާ ވޭރިއަންޓެއް"ގެ ގޮތުގައި ކަނޑައަޅާފައެވެ. އަދި މިވަގުތު އާންމު ސިއްޙަތަށް މީގެން ހުރި ނުރައްކާ ކުޑަކަމަށް ވަނީ ބުނެފައެވެ.

ފުރަތަމަ ލިބިފައިވާ މައުލޫމާތުތަކުން ދައްކާގޮތުގައި މިހާރު ބޭނުންކުރަމުންދާ ވެކްސިންތައް އަދިވެސް އެކަށީގެންވާ މިންވަރަށް މަސައްކަތްކުރެއެވެ. އަދި ކުރީގެ ވޭރިއަންޓްތަކަށްވުރެ މި ވޭރިއަންޓުން ބަލި ހާލުބޮޑުވާކަމުގެ އެއްވެސް ހެއްކެއް ލިބިފައެއް ނުވެއެވެ.

މިހާރު ދުނިޔޭގައި އެންމެ ގިނައިން ފެތުރެމުންދާ ވޭރިއަންޓަކީ އެލްޕީ.8.1 އެވެ.

ޑަބްލިޔުއެޗްއޯ އިން ވަނީ ބަލިމަޑުކަން މޮނިޓަރކުރުން ދެމެހެއްޓުމަށާއި، ޚާއްޞަކޮށް ކޭސްތަކާއި ހޮސްޕިޓަލްގައި އެނދުމަތިކުރާ މިންވަރު އިތުރުވަމުންދާ ގައުމުތަކުން ސަމާލުކަމާއެކު ތިބުމަށް އިލްތިމާސްކޮށްފައެވެ.