ފަލަސްތީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ގަތުލުއާންމާއި ޣައިރުގާނޫނީ އިސްތިއުމާރާ ދެކޮޅަށް އަޑުއުފުލުމަށް އިއްޔެ (10 އޮކްޓޫބަރު) ކުރިއަށްގެންދިޔަ "ގްލޯބަލް ޑޭ އޮފް އެކްޝަން ފޯ ޕަލަސްތީން" ގައި ދުނިޔޭގެ 60 ގައުމަކުން އެތައް ހާސް ބަޔަކު ބައިވެރިވެ ވަރުގަދަ އިހުތިޖާޖުތަކެއް ކޮށްފިއެވެ.

ގްލޯބަލް އެލަޔަންސް ފޯ ޕަލަސްތީނުން އިސްނަގައިގެން، އެންޓި-އަޕާތައިޑް މޫވްމަންޓް (އޭއޭއެމް) އަދި ސަނަދްގެ އެހީތެރިކަމާއެކު ބޭއްވި މި ތާރީޚީ ހަރަކާތުގައި ދުނިޔޭގެ ހަ ބައްރެއް ހިމެނޭހެން 200 އަށް ވުރެ ގިނަ ޖަމިއްޔާ އިންތިޒާމުވެ، ޖުމްލަ 325 އިވެންޓް ވަނީ ބާއްވާފައެވެ. މި ހަރަކާތްތަކުގައި ބައިވެރިވި މީހުން ވަނީ އިސްރާއީލުގެ އަނިޔާވެރިކަން ދުވަހަކު ވެސް އާދައިގެ ކަމަކަށް ނުހެދޭނެ ކަމަށް ބުނެ އަޑުއުފުލާފައެވެ.

Ad
rt

މި ހަރަކާތްތައް އިންތިޒާމުކުރި ފަރާތްތަކުން ނެރުނު ބަޔާނެއްގައި ބުނީ، މިއަދުގެ ހަރަކާތްތަކުން ދައްކުވައިދެނީ ފަލަސްތީނުގެ ހައްގުގައި ކުރާ ވަކާލާތަކީ އެއްވެސް އިމެއް ނެތި މުޅި ދުނިޔެއަށް ފުޅާވެފައިވާ ވަރުގަދަ ހަރަކާތެއް ކަމެވެ. މިގޮތުން ޔޫރަޕްގެ 24 ގައުމެއްގައި 176 ހަރަކާތެއް ވަނީ ހިންގާފައެވެ. އޭގެ ތެރޭގައި އިޓަލީގައި ކުރިއަށްދިޔަ 64 ހަރަކާތާއި ސްޕެއިންގެ 38 ހަރަކާތުގެ އިތުރުން، ރޯމްގެ ކޮލޯސިއަމް، ބާލިންގެ ބްރެންޑަންބާގް ގޭޓް އަދި ބްރަސަލްސްގައި ހުންނަ އިސްރާއީލުގެ އެމްބަސީ ކައިރީގައި ބޭއްވި ބޮޑެތި މުޒާހަރާތައް ހިމެނެއެވެ.

އޯޝޭނިއާ ސަރަހައްދުގައި 45 ހަރަކާތެއް ކުރިއަށްދިޔައިރު، އޮސްޓްރޭލިއާ އަދި ނިއުޒީލެންޑުގައި ދުވަހުގެ ކުރީކޮޅު ވަނީ އިހުތިޖާޖުތައް ފަށާފައެވެ. އެގޮތުން ނިއުޒީލެންޑުގެ ޕާލިމަންޓުން ފެށިގެން ސިވިކް ސްކުއާއާ ހަމައަށް "ހީކޮއި ފޯ ޕަލަސްތީން" ގެ ނަމުގައި ވަރުގަދަ ހިނގާލުމެއް ވަނީ ބާއްވާފައެވެ. މީގެ އިތުރުން ލެޓިން އެމެރިކާ އަދި ކެރީބިއަން ސަރަހައްދުގެ 8 ގައުމެއްގައި 36 ހަރަކާތެއް ކުރިއަށްދިޔައިރު، ޗިލީގެ ސެންޓިއާގޯގައި އެފްއީސީއެޗް، ކޯޑިނޭޑޯރާ ފެމިނިސްޓާ 8އެމް އަދި ސީއައިޕީން އިސްނަގައިގެން ބޮޑު ހިނގާލުމެއް ބޭއްވިއެވެ. އަދި މެކްސިކޯ ސިޓީ، ކޮލަމްބިއާ، ޕެރޫ އަދި އުރުގުއާއީގައި ވެސް ފާހަގަކޮށްލެވޭ ހަރަކާތްތަކެއް ކުރިއަށްގެންދިޔައެވެ.

އެފްރިކާ ބައްރުގެ 10 ގައުމެއްގައި 32 ހަރަކާތް ބޭއްވިއިރު، އޭގެ ތެރެއިން މައިގަނޑު ހަރަކާތަކަށް ވެގެންދިޔައީ ކޭޕް ޓައުންގެ ތާރީޚީ ޑިސްޓްރިކްޓް ސިކްސްގެ މުއިރް ސްޓްރީޓް މަސްޖިދުން ފެށިގެން ވެސްޓާން ކޭޕް ޕްރޮވިންޝަލް ޕާލިމަންޓާ ހަމައަށް ކުރިއަށްގެންދިޔަ ބޮޑު ހިނގާލުމެވެ. އުތުރު އެމެރިކާ އަދި އޭޝިއާގައި ވެސް ގިނަ ހަރަކާތްތަކެއް ވަނީ ހިންގާފައެވެ. އެގޮތުން އެމެރިކާގެ ލޮސް އެންޖެލިސްގައި ހުންނަ އިސްރާއީލުގެ ކޮންސިއުލޭޓް ކައިރީގައި ކޯޑްޕިންކް ޖަމާއަތުން މުޒާހަރާކުރިއިރު، ތައިލެންޑުގެ ބެންކޮކްގައި ހުންނަ އިސްރާއީލް އެމްބަސީ ކައިރިއަށް ވެސް މީހުން އެއްވިއެވެ. އަދި މެލޭޝިއާގެ ކުއާލަ ލަމްޕޫރުގައި ހުންނަ އެމެރިކާ އެމްބަސީ ކައިރިއަށް އެއްވެ މެމޮރެންޑަމެއް ހަވާލުކުރުމުގެ އިތުރުން، މައިކެއާ އަދި ޕޭސް އިން އިސްނަގައިގެން ފޯރަމްތަކާއި ހޭލުންތެރިކުރުމުގެ ޕްރޮގްރާމްތައް ކުރިއަށްގެންދިޔައެވެ.

އާންމު ހިނގާލުންތަކުގެ އިތުރުން، ފަންނީ އަދި ސަގާފީ ތަފާތު ވަސީލަތްތައް ބޭނުންކޮށްގެން ވެސް އިހުތިޖާޖުތައް ކުރިއަށްގެންދިޔައެވެ. އެގޮތުން ޣައްޒާގައި އިސްރާއީލުން ޝަހީދުކޮށްލި ކުޑަކުދިންގެ ނަންތައް ލިޔެފައިވާ 25 މީޓަރާއި 20 މީޓަރުގެ ދިގު ކަފުނާއެކު އިޓަލީގެ އެލެސަންޑްރިއާ އަދި ދެކުނު އެފްރިކާގެ ކޭޕް ޓައުންގައި ހިނގާލުންތައް ވަނީ ބާއްވާފައެވެ. މީގެ އިތުރުން މެކްސިކޯގައި "ބާޑްވޮޗިން ފޯ ޕަލަސްތީން" ގެ ނަމުގައި ހަރަކާތެއް ކުރިއަށްދިޔައިރު، ޓެންޒޭނިއާގެ ދާރުއްސަލާމްގައި "މަޝާހިދީ ވަ ޣައްޒާ" ގެ ނަމުގައި ތަމްސީލެއް ދެއްކިއެވެ. ފްރާންސްގެ ސްޓްރާސްބޯގްގައި ކަށުކަމާކެމީގެ ރަމްޒީ ހަރަކާތެއް، ގްރީސްގެ އެތެންސްގައި ދެ ދުވަހުގެ ފެސްޓިވަލެއް އަދި އީރާނުގެ ތެހެރާންގައި ކުޑަކުދިންގެ ގުޑިއެރުވުމުގެ ހަރަކާތެއް ވެސް ބޭއްވިއެވެ.

ހަނގުރާމައާ ދެކޮޅު އިއްތިހާދުތަކާއި، ޓްރޭޑް ޔޫނިއަންތަކާއި ދަރިވަރުންގެ ޖަމިއްޔާތައް ގުޅިގެން ހިންގި މި ހަރަކާތުގައި، އިސްރާއީލުގެ އަނިޔާވެރިކަން ވަގުތުން ހުއްޓުވުމަށް ވަނީ ގޮވާލާފައެވެ. އެގޮތުން ދުނިޔޭގެ ސަރުކާރުތަކުން ހަމައެކަނި ކަންބޮޑުވުން ފާޅުކުރުމުގެ ބަދަލުގައި، އިސްރާއީލަށް ހަތިޔާރު ފޯރުކޮށްދިނުން ވަގުތުން ހުއްޓާލައި އަސްކަރީ ދަތިކުރުމުގެ ފިޔަވަޅުތައް އަޅަންޖެހޭ ކަމަށް ބައިވެރިން ބުންޏެވެ. އަދި ހަނގުރާމައިގެ ޖަރީމާތަކަށް ޒިންމާވާ ފަރާތްތަކަށް އަދަބު ދިނުމަށް ވެސް ވަނީ ގޮވާލާފައެވެ. އިންތިޒާމުކުރި ފަރާތްތަކުން ފާހަގަކުރި ގޮތުގައި މިއީ ވަގުތީ ރާޅެއް ނޫން ކަމަށާއި، ފަލަސްތީނުގެ ރައްޔިތުންނަށް ފުރިހަމަ މިނިވަންކަމާއި އިންސާފު ލިބެންދެން ބައިނަލްއަގުވާމީ މި ވަކާލާތު ކުރިއަށްދާނެއެވެ.