އެކުވެރި ދައުލަތްތަކުގެ ޖަމްޢިއްޔާ (އދ.) ގެ އާންމު މަޖިލީހުގެ 81 ވަނަ ބައްދަލުވުމުގައި ތަގުރީރު ކުރުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ނިއުޔޯކަށް ކުރި ޒިޔާރަތާ ދެކޮޅަށް އެތައް ސަތޭކަ ބަޔަކު މަގުތަކަށް ނުކުމެ އިހުތިޖާޖުކޮށްފިއެވެ.
ޣައްޒާގައި އިސްރާއީލުން ހިންގަމުންދާ އަސްކަރީ ހަރަކާތްތަކާ ގުޅިގެން ނިއުޔޯކުގެ މަގުތަކަށް ނުކުމެ އިހުތިޖާޖުކުރި ފަރާތްތަކުން ވަނީ ނަތަންޔާހޫއަށް އެ ރަށުން މަރުހަބާ ނުކިޔާނެކަމުގެ ސާފު މެސެޖެއް ދީފައެވެ.
އިހުތިޖާޖުގެ ބައިވެރިން ވަނީ މެންހެޓަންގެ ފަސްޓް އެވެނިއުއާއި އދ. ގެ އޮފީސް ހުންނަ ސަރަހައްދުގެ ވަށައިގެންވާ މަގުތަކުގައި އިށީނދެގެން ތިބެ، މަގުތައް ބަންދުކޮށްފައެވެ. މި ކަމުގެ ސަބަބުން އދ. އަށް ދިޔަ ރަސްމީ މޮޓޯކޭޑްތަކުގެ ދަތުރުތަކަށް ބުރޫއަރައި، މަގު ބަދަލުކުރަން ޖެހުނެވެ.
މި އިހުތިޖާޖުތަކުގެ ތެރެއިން ނިއުޔޯކުގެ ފުލުހުން ވަނީ ދިހައަކަށްވުރެ ގިނަ މީހުން ހައްޔަރުކޮށްފައެވެ. ހައްޔަރުކުރި މީހުންގެ ތެރޭގައި ހޮލީވުޑްގެ މަޝްހޫރު އެކްޓަރުން ކަމަށްވާ ސޫޒަން ސަރަންޑަން، ހެނާ އައިންބައިންޑާ، އަދި ސިންތިއާ ނިކްސަންގެ އިތުރުން އާންމު ޝަޚުޞިއްޔަތެއް ކަމަށްވާ ޗެލްސީ މެނިންގްއާއި ނިއުޔޯކް ސިޓީ ކައުންސިލް މެންބަރު ޗީ އޮސޭ އަދި ސިޔާސީ ބައެއް ކެންޑިޑޭޓުން ހިމެނެއެވެ.
ނިއުޔޯކްގައި ނަތަންޔާހޫއާއި ދެކޮޅަށް މުޒާހަރާ ކުރަނީ، ފޮޓޯ: ރޮއިޓާސް
"ޖޫއިޝް ވޮއިސް ފޯ ޕީސް" (ޖޭވީޕީ) އާއި "ޕެލެސްޓީނިއަން ޔޫތު މޫވްމަންޓް" ފަދަ ޖަމްޢިއްޔާތަކުން އިންތިޒާމުކުރި މި އިހުތިޖާޖުގައި ޔަހޫދީ-އެމެރިކަން ގްރޫޕްތަކާއި، ފަލަސްޠީނުގެ އެކްޓިވިސްޓުންނާއި، އެ ސަރަހައްދުގެ ސިޔާސީ ފަރާތްތަކުގެ އިތުރުން ބޭރު ގައުމުތަކުގެ ރައްޔިތުންވެސް ބައިވެރިވިއެވެ. އިހުތިޖާޖުގެ ބައިވެރިން ތިބީ "ބޮންތަކަށް ނޫން، އިންސާނުންނަށް ޚަރަދުކުރޭ" ލިޔެފައިވާ އެއްގޮތް ޓީޝާޓުތަކެއް ލައިގެންނެވެ. އަދި އެމެރިކާއިން އިސްރާއީލަށް ދޭ އަސްކަރީ އެހީ ވަގުތުން ހުއްޓާލުމަށް ގޮވާލާ ބޯޑުތައްވެސް އެމީހުން ވަނީ އުފުލާފައެވެ.
ފުލުހުން ވަނީ ހައްޔަރުކުރި މީހުން ފުލުހުންގެ މައި އޮފީހަށް ގެންގޮސް، އާންމު އިޖުތިމާއީ ނިޒާމު ނަގާލުމުގެ ތުހުމަތު (ޑިސްއޯޑަރލީ ކޮންޑަކްޓް) ރަސްމީކޮށް އެމީހުންގެ މައްޗަށް ކުރަން ނިންމާފައެވެ. އެމެރިކާގެ ރައްޔިތުންގެ މެދުގައި އިސްރާއީލަށް އޮތް ތާއީދު ކުޑަވަމުންދާކަން ސާވޭތަކުން ދައްކަމުންދާ ދަނޑިވަޅެއްގައި، ނަތަންޔާހޫ ދިޔުމާއެކު ކުރީ ރޭ، އެހެން ޔަހޫދީ ގްރޫޕްތަކަކުންވެސް ވަނީ އދ. ގެ ބޭރުގައި އެއްވެފައެވެ. އެ ގްރޫޕްތަކުން ބުނެފައިވަނީ އިސްރާއީލަށް ތާއީދުކުރުމަކީ ސަރުކާރަށް ތާއީދުކުރުން ނޫން ކަމަށާއި، އެމީހުން ކަންބޮޑުވަނީ އިތުރުވަމުންދާ އެންޓި-ސެމިޓިޒަމް (ޔަހޫދީންނާ ދެކޮޅުވެރިކަން) އާމެދު ކަމަށެވެ.
މި ފަހަރުގެ ޒިޔާރަތަކީ ބޮޑުވަޒީރު ނަތަންޔާހޫ ނިއުޔޯކަށް ކުރި އާދަޔާޚިލާފު ކުރު ޒިޔާރަތެކެވެ. ނަތަންޔާހޫގެ އަރިސް މީހުން ބުނެފައިވާ ގޮތުގައި، އދ. ގެ އާންމު މަޖިލީހުގެ ހަވާސާގައި މަދު ބައްދަލުވުންތަކެއް ބޭއްވެވުމަށްފަހު، އެކަންކަން ނިންމަވައި، ނިއުޔޯކަށް ދިޔަ ދުވަހު އަނބުރާ އިސްރާއީލަށް ދިޔުމަށް ނަތަންޔާހޫ ވަނީ ނިންމާފައެވެ.
މަގުތަކުގައި އިހުތިޖާޖުތައް ކުރިއަށްދިޔަ ވަގުތު، އދ. ގެ އާންމު މަޖިލީހުގައި ނަތަންޔާހޫ ތަގުރީރު ކުރުމަށް ޕޯޑިއަމް ކައިރިއަށް ދިޔުމާއެކު، ބޭރު ގައުމުތަކުގެ ގިނަ އަދަދެއްގެ ޑެލިގޭޝަންތަކުން ވަނީ މާލަން ދޫކޮށް ނުކުމެފައެވެ. ނަތަންޔާހޫގެ ތަގުރީރުގައި ވަނީ އޭނާއަށް އަމާޒުވި ފާޑުކިއުންތަކަށް ސީދާ ރައްދެއް ދީ، އިސްރާއީލުގެ އަމަލުތައް ދިފާއުކޮށްފައެވެ. އަދި ނިއުޔޯކުގެ މަސްއޫލުވެރިންގެ ފަރާތުން ކުރިމަތިވި ދެކޮޅުވެރިކަމަށްވެސް އޭނާގެ ތަގުރީރުގައި އަލިއަޅުވާލިއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!