ކެރިއަރުގައި 1،000 ލަނޑު ހަމަކުރުމުގެ ތާރީޚީ އަމާޒަށް ވާސިލުވުމުގެ މަސައްކަތް ކުރަމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ، ބައިނަލްއަޤްވާމީ ފުޓްބޯޅައިން ރިޓަޔާކުރުމުގެ އެއްވެސް ވިސްނުމެއް މިވަގުތު ނެތް ކަމަށް ބުނެފިއެވެ.

ޔޫއެފާ ނޭޝަންސް ލީގުގައި ވޭލްސްއާ ދެކޮޅަށް ޕޯޗުގަލްގެ އެސްޓާޑިއޯ ޖޯސޭ އަލްވާލާޑޭ ސްޓޭޑިއަމްގައި ކުޅޭ މެޗުގެ ކުރިން ވާހަކަދައްކަމުން، އުމުރުން 41 އަހަރުގެ ރޮނާލްޑޯ ބުނީ ޤައުމީ ޓީމުގެ އާ ކޯޗު ޖޯޖް ޖީސަސްގެ އިރުޝާދުގެ ދަށުން ޓީމަށް އެހީތެރިވެދެވޭނެކަމުގެ ފުރިހަމަ އިޢުތިބާދު އެބައޮތް ކަމަށެވެ.

Ad
rt

ލިސްބަންގެ ބޭރުގައިވާ ޕޯޗުގަލްގެ ފުޓްބޯޅަ އެސޯސިއޭޝަންގެ ހެޑްކުއާޓަރުގައި ބޭއްވި ޕޯޗުގަލް ފުޓްބޯލް ސަމިޓުގައި މީޑިއާއާ ވާހަކަދެއްކި ރޮނާލްޑޯ ވަނީ މިހާތަނަށް ކެރިއަރުގައި 979 ލަނޑު ޖަހާފައެވެ. އޭގެ ތެރޭގައި ކްލަބުތަކަށް ޖަހައިދިން 833 ލަނޑާއި ޕޯޗުގަލް ޤައުމީ ޓީމަށް ޖަހައިދިން 146 ލަނޑު ހިމެނެއެވެ. 1،000 ލަނޑުގެ ތާރީޚީ އަމާޒާ ހަމައަށް ވާސިލުވުމަށް އޭނާއަށް މިހާރު މަދުވަނީ އެންމެ 21 ލަނޑެވެ. މި މެޗަކީ ވޯލްޑް ކަޕްގެ ގަދަ 16 ގެ ބުރުގައި ސްޕެއިން އަތުން ބަލިވުމާ ގުޅިގެން ރޮބާޓޯ މާޓިނޭޒް ވަކިވުމުން، ޕޯޗުގަލްގެ ކޯޗުކަމާ ހަވާލުވި ޖޯޖް ޖީސަސްގެ އިރުޝާދުގެ ދަށުން އެ ޓީމު ކުޅޭ ފުރަތަމަ މެޗެވެ.

ނޭޝަންސް ލީގު ކާމިޔާބުކުރުމާއި 1،000 ލަނޑު ހަމަކުރުމާ ދެމެދުން އިސްކަންދެނީ ކޮން ކަމަކަށްތޯ ސުވާލުކުރުމުން ހިނިތުންވުމާއެކު ރޮނާލްޑޯ ބުނީ، އެ ދެ ކަންތައްވެސް ހާސިލުކުރުމަކީ އޭނާގެ އަމާޒެއް ކަމަށެވެ.

"ޤައުމީ ޓީމުގެ ޖާޒީގައި 1،000 ވަނަ ލަނޑު ޖެހިއްޖެނަމަ އެއީ ވަރަށް ރީތި ވާހަކައެއްގެ ނިމުން ނުވަތަ ކަންކަން ފުރިހަމަވެގެންދާނެ ގޮތް،" ރޮނާލްޑޯ ބުންޏެވެ. ނަމަވެސް އެއީ މާ ބޮޑު ބޯހާސްކަމެއް ނޫން ކަމަށާއި، ކޮންމެ ދުވަހަކު ކުޅުމުގެ ތެރެއިން އުފާހޯދުން މުހިންމު ކަމަށް އޭނާ ފާހަގަކުރިއެވެ.

ވޯލްޑް ކަޕަށްފަހު ޤައުމީ ޓީމުން މޫނުއަނބުރާލުމާމެދު ވިސްނި ކަމަށާއި، ނަމަވެސް އެސޯސިއޭޝަނާއި ކޯޗު ޖީސަސްއާއެކު ދެކެވުނު ވާހަކަތަކަށްފަހު މަޑުކުރަން ނިންމީ ޓީމަށް އެހީތެރިވެވޭނެކަމުގެ އިތުބާރު އޮތުމުން ކަމަށް ރޮނާލްޑޯ ބުންޏެވެ.

"ކޯޗު އަހަންނަށް އިތުބާރު ނުކުރާނަމަ، ނުވަތަ ދަނޑުމަތީގައި އެއްވެސް ކަމެއް ނުކުރެވޭކަން އިހުސާސްވާނަމަ، އެންމެ ފުރަތަމަ ޓީމު ދޫކޮށްދާނީ އަހަރެން،" ރޮނާލްޑޯ ބުންޏެވެ. އަދި އޭނާގެ އުމުރުގެ ފަހުކޮޅުގައި ދަސްވި އެންމެ މުހިންމު ކަމަކީ މާދަމާއާމެދު ނުވިސްނައި، މިވަގުތުގެ ބޭނުން ހެޔޮގޮތުގައި ހިފުން ކަމަށާއި، މީޑިއާއިން އޭނާގެ ކެރިއަރު ނިންމާލަން އުޅުނަސް އެކަން ނުކުރެވޭނެ ކަމަށްވެސް އޭނާ ބުންޏެވެ.

ޕޯޗުގަލްއަކީ އެންމެ ފަހުން 2025 ވަނަ އަހަރުގެ ޖޫން މަހު ބޭއްވި ނޭޝަންސް ލީގުގެ ފައިނަލްގައި ސްޕެއިންއާ 2-2 އިން އެއްވަރުވެ، ޕެނަލްޓީ ޖަހައިގެން 5-3 އިން މޮޅުވެ މުބާރާތުގެ ތަށި ނެގި ޓީމެވެ. އެ ފައިނަލް މެޗުގައިވެސް ރޮނާލްޑޯ ވަނީ ޕޯޗުގަލްގެ ދެވަނަ ލަނޑު ޖަހާފައެވެ. ޕޯޗުގަލްއާއި ވޭލްސްގެ ކުރިމަތިލުންތަކަށް ބަލާއިރު، މިއީ މި ދެ ޓީމު ބައްދަލުކުރާ 5 ވަނަ މެޗެވެ. މީގެ ކުރިން ކުޅުނު 4 މެޗުގެ ތެރެއިން 3 މެޗުން ޕޯޗުގަލް މޮޅުވެފައިވާއިރު، ވޭލްސް މޮޅުވީ އެންމެ މެޗަކުންނެވެ. އެންމެ ފަހުން މިއިން ދެ ޓީމު ބައްދަލުކުރީ 2016 ވަނަ އަހަރުގެ ޔޫރޯ މުބާރާތުގެ ސެމީ ފައިނަލްގައެވެ. އެ މެޗު 2-0 އިން ޕޯޗުގަލް ކާމިޔާބުކުރީ ރޮނާލްޑޯއާއި ނާނީގެ ލަނޑުތަކުންނެވެ.

ބުރާސްފަތި ދުވަހުގެ ރޭ 18:45 ޖީއެމްޓީ (ރާއްޖޭ ގަޑިން ދަންވަރު 23:45) ގައި ކުޅޭ މި މެޗަށް ނުކުންނައިރު ޕޯޗުގަލް އޮތީ ފުރިހަމަ ފިޓްނަސްގައެވެ. އެ މޭރުމުން، ވޯލްޑް ކަޕްގެ ކުއާޓާ ފައިނަލްގައި ސްޕެއިން އަތުން 1-0 އިން ބަލިވި މެޗުގައި ކުޅުނު ފުރަތަމަ އެގާރަ (ކޮސްޓާ، ކަންސެލޯ، ޑިއަސް، ވޭގާ، މެންޑޭސް، ވިޓީންހާ، ޖޭ ނެވޭސް، ނެޓޯ، ފެރްނާންޑޭސް، ފެލިކްސް އަދި ރޮނާލްޑޯ) މި މެޗުގައިވެސް ނެރޭނެ ކަމަށް ބެލެވެއެވެ. އަނެއްކޮޅުން ވޭލްސް ޓީމަށް ވަނީ އަނިޔާގެ ސަބަބުން ހެރީ ވިލްސަންއާއި ނޭތަން ބްރޯޑްހެޑްގެ އިތުރުން ކާލް ޑާލޯ ނުކުޅެވޭނެކަން ކަށަވަރުވެފައެވެ.