އެމެރިކާ އާއި އީރާނާ ދެމެދު ގަތަރު މެދުވެރިވެގެން ކުރިއަށްގެންދާ ނުސީދާ މަޝްވަރާތަކުގައި ކުރިއެރުންތަކެއް ލިބި، ދެ ގައުމުގެ ދެމެދުގައި އެއްބަސްވުމަކަށް އާދެވިދާނެ ކަމުގެ އަލިމަގެއް ފެނިފައިވާ ކަމަށް ޑިޕްލޮމެޓިކް ރިޕޯޓްތަކުން ހާމަކޮށްފިއެވެ.
އަލުން ފެށި މި މަޝްވަރާތަކުގެ މައިގަނޑު އަމާޒަކީ ދެ ގައުމުގެ ދެމެދުގައި އުފެދިފައިވާ ފުޅާ ދެބަސްވުންތަކަށް ހައްލެއް ހޯދުމާއި، ހިފަހައްޓާފައިވާ އީރާނުގެ ފައިސާތައް ދޫކޮށްލުމުގެ އިތުރުން ނިއުކްލިއާ މައްސަލަ އަލުން މަޝްވަރާގެ މޭޒަށް ގެނައުމެވެ.
ބްލޫމްބާގާއި ސަރަހައްދީ އެކި މީޑިއާތަކުން ރިޕޯޓްކޮށްފައިވާ ގޮތުގައި، ޚާރިޖީ އޮނިގަނޑެއްގެ ތެރެއިން އީރާނުގެ ނިއުކްލިއާ ޕްރޮގްރާމުގެ ވަކި ބައިތަކަކާ މެދު މަޝްވަރާކުރުމަށް ތެހެރާނުން މިހާރު ވަނީ ތައްޔާރުކަން ހާމަކޮށްފައެވެ. މިއީ މީގެ ކުރިން އީރާނުން ގެންގުޅުނު ހަރުކަށި ސިޔާސަތުތަކާ އަޅާބަލާއިރު ފެނިގެންދިޔަ ބޮޑު ބަދަލެކެވެ. މި މަޝްވަރާތައް ބައްޓަންކުރެވެމުން ދަނީ މަރުހަލާތަކަކަށް ބަހާލައިގެން، ކަނޑުގެ ދަތުރުފަތުރަށް އަޅާފައިވާ ހުރަސްތަކާއި ތެޔޮ ވިއްކުމުގެ ހުއްދަތަކާއި ދަތިކުރުމުގެ ފިޔަވަޅުތަކަށް ލުއިދިނުމުގެ ބަދަލުގައި ސަލާމަތީ އަދި ނިއުކްލިއާ ލުއިތަކެއް ލިބިދޭނެ ގޮތަކަށެވެ.
ގަތަރުގެ ދޯހާގައި ކުރިއަށްދާ ވާހަކަތަކުގެ ތެރެއިން ހުށަހެޅިފައިވާ ޕްލޭނުގައިވާ ގޮތުން، ބައިނަލްއަގުވާމީ އާގުބޯޓުފަހަރަށް ހޮރްމުޒް ކަނޑުއޮޅި އަލުން ހުޅުވާލައި، ކަނޑުމަތީގެ ދަތުރުފަތުރަށް ހުރަސްއެޅުން އީރާނުން ހުއްޓާލަން ޖެހެއެވެ. އޭގެ ބަދަލެއްގެ ގޮތުން، އީރާނުގެ ބަނދަރުތަކަށް އަޅާފައިވާ ކަނޑުގެ ބްލޮކޭޑް ނިމުމަކަށް ގެނައުމަށާއި، އެ ގައުމުގެ ކަނޑުގެ އިންފްރާސްޓްރަކްޗާތަކަށް އަމާޒުކޮށް އެމެރިކާއިން ދޭ އަސްކަރީ ހަމަލާތައް ހުއްޓާލުމަށް ވަނީ ޝަރުތުކޮށްފައެވެ. ފައިނަލް އެއްބަސްވުމުގައި ސޮއިކުރާތާ 48 ގަޑިއިރުގެ ތެރޭގައި މި ފިޔަވަޅުތައް އެޅުމަށް އީރާނުން ވަނީ ހުށަހަޅާފައެވެ.
އިގްތިސާދީ ލުއިތަކުގެ ތެރޭގައި، އީރާނުން ތެޔޮ ވިއްކުމަށް އެމެރިކާއިން ހާއްސަ ހުއްދަތަކެއް ދިނުމާއި، އަލަށް އަޅާފައިވާ ދަތިކުރުމުގެ ފިޔަވަޅުތައް އުވާލުން ހިމެނެއެވެ. މީގެ އިތުރުން، އެކި ގައުމުތަކުގައި ފްރީޒްކޮށް ހިފަހައްޓާފައިވާ އީރާނުގެ 6 ބިލިއަނަށް ވުރެ ގިނަ އެމެރިކާ ޑޮލަރު ދޫކޮށްލުން ވެސް މި ހުށަހެޅުމުގެ ތެރޭގައި ހިމެނޭ މުހިންމު ކަމެކެވެ.
ނިއުކްލިއާ މައްސަލައާ ގުޅޭގޮތުން އީރާނުގެ ޚާރިޖީ ވަޒީރު އައްބާސް އަރަގްޗީ އަދި އެ ގައުމުގެ އިސް އޮފިޝަލުން ވިދާޅުވެފައިވަނީ، ނިއުކްލިއާ ބެލެހެއްޓުމުގެ މަޝްވަރާތައް އަލުން ފެށޭނީ ހޮރްމުޒް ކަނޑުއޮޅިއާއި، ބަނދަރުތަކުގެ ބްލޮކޭޑް އަދި ދަތިކުރުމުގެ ފިޔަވަޅުތަކާ ގުޅޭ ކަންކަމަށް ފުރަތަމަ ހައްލެއް ލިބުމުން ކަމަށެވެ. ގަތަރު މެދުވެރިކޮށް އީރާނުން އެމެރިކާއަށް ހުށަހެޅި ޕްރޮޕޯސަލްގައި، އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ) ގެ އިންސްޕެކްޝަންތަކާއި މޮނިޓަރިން އަލުން ފެށުމާއި، މަތީ ދަރަޖައަށް ޔުރޭނިއަމް މުއްސަނދިކުރާ މިންވަރު ކަނޑައެޅުމާއި، ސްޓޮކް މަދުކުރުމާ ބެހޭ ކަންކަން ހިމަނާފައިވެއެވެ.
މަޝްވަރާތަކަށް ކުރިއެރުން ލިބުނު ނަމަވެސް، ދެފަރާތުގެ ދެމެދުގައި އޮތް އިތުބާރު ކުޑަވުމުގެ ސަބަބުން އަދިވެސް ބޮޑެތި ގޮންޖެހުންތަކެއް އެބަހުއްޓެވެ. އީރާނުން ވަނީ ކުރިމަގުގައި އެމެރިކާއިން ދީފާނެ އަސްކަރީ ހަމަލާތަކުން ސަލާމަތްވުމުގެ ޔަގީންކަމާއި، އާންމު އުސޫލުން ސާފުނުކުރާ ތެޔޮ އެކްސްޕޯޓްކުރުމުގެ ހުއްދަ ހޯދުމަށް ޝަރުތުކޮށްފައެވެ. ގަތަރުގެ އޮފިޝަލުން ބުނެފައިވަނީ ހޮރްމުޒް ކަނޑުއޮޅި އަލުން ހުޅުވާލުމުގެ އޮޕަރޭޝަނަލް ފިޔަވަޅުތަކާ މެދު ދެ ގައުމުން އެއްބަސްވުމަކާ ގާތަށް ގޮސްފައިވާ ކަމަށެވެ. އެހެންނަމަވެސް، ވޮޝިންޓަނުން އަދިވެސް ދަނީ އީރާނުން ހުށަހެޅި ނިއުކްލިއާ ޕްރޮޕޯސަލް މުރާޖައާކުރަމުންނެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!