ބައްޝާރު އަލް އަސަދުގެ ރެޖީމުގެ އަނިޔާވެރިކަމާއި ފާރަވެރިކަމުން ސަލާމަތްކުރުމުގެ ގޮތުން ސީރިއާގެ ގެއެއްގެ ތެރޭގައި ހެދި ކޮންކްރީޓް ފާރެއްގެ އެތެރޭގައި ފޮރުވި ސައްތޭކަ އަށްވުރެ ގިނަ ފޮތްތަކާއި މުހިންމު ލިޔެކިޔުންތައް ނަގައިފިއެވެ.
މި ތާރީޚީ އަދި އަސަރުގަދަ މަންޒަރުން ފެނިގެންދިޔައީ އަބޫ ބިލާލް ނަމަކަށް ކިޔާ އުމުރުން ދުވަސްވީ ސީރިއާގެ ރައްޔިތަކު، ކުވެއިތުގައި 15 އަހަރު ހޭދަކުރުމަށްފަހު އެނބުރި ޤައުމަށް އައިސް، މި އަހަރުގެ އޯގަސްޓް މަހު އެ މީހާގެ އަމިއްލަ ގޭގެ ފާރު ބޮޑު މަރުތޭލަކުން ތަޅާލައިގެންނެވެ.
އަބޫ ބިލާލް އެ ފާރު އަމިއްލައަށް ރާނާކޮށް، އޭނާގެ ފިރިހެން ދަރިފުޅުގެ އަމިއްލަ ކުތުބުޚާނާ ކޮންކްރީޓާއި ސިމެންތީގެ ފާރެއްގެ ފަހަތުގައި ބަންދުކުރީ 2011 ވަނަ އަހަރުގެ އޮކްޓޯބަރު މަހުގެ ފަހުކޮޅުގައެވެ. ސީރިއާގެ ސިޓީތަކަށް އަސަދުގެ ސެކިއުރިޓީ ބާރުތަކުން ވެރިވެގަންނަމުން ދިޔަ ދަނޑިވަޅުގައި، އެ ފޮތްތައް މުޅިން ފޮރުވައި ނިމެންދެން ޤައުމު ދޫކޮށް ދާން އަބޫ ބިލާލް އިންކާރުކުރިއެވެ. ހަފީޒު އަލް އަސަދު 1971 އިން 2000 އަށް އަދި އޭނާގެ ފިރިހެން ދަރިފުޅު ބައްޝާރު އަލް އަސަދު 2024 ގައި ރެޖީމް ވެއްޓެންދެން ކުރި ވެރިކަމުގައި، ސިޔާސީ، ދީނީ ނުވަތަ އިދިކޮޅު ފޮތެއް ގެންގުޅުމަކީ މުޅި އާއިލާ ޖަލަށް ދާންޖެހޭފަދަ ނުރައްކާތެރި ކުށެކެވެ.
ސީރިއާގެ ހުޅަނގު ސަރަހައްދެއްގައި (ދިމަޝްޤު ނުވަތަ ހޯމްސްގައި) ހުރި އެ ގޭގެ ފާރުގެ ފަހަތުގައި ފޮރުވާފައިވަނީ ސިޔާސީ ގޮތުން ހައްސާސް އަދި ދީނީ ގޮތުން މުހިންމު އެތައް ސައްތޭކަ އަށްވުރެ ގިނަ ފޮތްތަކާއި މަޖައްލާތަކާއި އަތުލިޔުންތަކެވެ. އޭގެ އިތުރުން ޤުރުއާން ކިޔެވުމުގެ އިޖާޒާތްތަކާއި، އަކަޑެމިކް ސަނަދުތަކާއި، އާއިލީ މުހިންމު ލިޔެކިޔުންތަކުގެ އިތުރުން ކޮންމެވެސް ވަރެއްގެ ފައިސާވެސް އެ ފާރުގެ އެތެރޭގައި ފޮރުވާފައި ހުއްޓެވެ. 15 އަހަރަށްފަހު ފާރު ތަޅާލިއިރު، އެއްވެސް ތެތްކަމެއް ނުވަތަ ފޮތްތައް ހަލާކުނުވެ ރައްކާތެރިކަމާއެކުގައި ހުއްޓެވެ.
އަބޫ ބިލާލްގެ ފިރިހެން ދަރިފުޅު، ސީރިއާގެ ލިޔުންތެރިޔާ އަދި އެކްޓިވިސްޓް ބިލާލް އަައްލޫން، ފާރު ތަޅާލާ މަންޒަރު ވީޑިއޯކޮށް މީޑިއާއަށް އާންމުކުރުމާއެކު، އެ ވީޑިއޯ ވަނީ ސަރަހައްދީ އަދި ބައިނަލްއަޤްވާމީ މީޑިއާތަކުގެ ސަމާލުކަން ހޯދާފައެވެ. އަލްޖަޒީރާގެ ނިއުސްފީޑް ފަދަ ވަސީލަތްތަކުން އެ މަންޒަރު ސިފަކޮށްފައިވަނީ އަސަދުގެ ރެޖީމް 2024 ގައި ވެއްޓުމަށްފަހު ސީރިއާއަށް އައި ފިކުރީ އަދި ސަގާފީ މިނިވަންކަމުގެ ރަމްޒެއްގެ ގޮތުގައެވެ. ދިމަޝްޤުގެ ދާރުލް ފިކްރުގެ މީޑިއާ އޮފިސަރު އަދި ސަގާފީ ލިޔުންތެރިޔާ ވަހީދު ތާޖާ އަލްޖަޒީރާއަށް ބުނެފައިވަނީ، "އަހަރެމެން އެ ސަފްހާތަކުން ހިރަފުސް ފޮޅާލުމަށްފަހު، އެ ފޮތްތައް ހައްގުވާ މާގާމަށް އަނބުރާ ރުޖޫއަކޮށްފިން" ކަމަށެވެ.
A Syrian man has returned home after 15 years in Kuwait to uncover a private library he sealed behind a wall in 2011, fearing the Assad regime. The books, certificates and other belongings were found largely intact. pic.twitter.com/SuCROapE5C
— The Siasat Daily (@TheSiasatDaily) September 17, 2026
އަލްޖަޒީރާގެ ސަގާފީ ރިޕޯޓްތަކުން އެނގޭގޮތުގައި، 2024 ވަނަ އަހަރު ރެޖީމް ވެއްޓުނު ފަހުން ސީރިއާގެ އެކި ކަންކޮޅުތަކުގައި ފޮރުވާފައިވާ ނޯޓުފޮތްތަކާއި ވަޅުލާފައިވާ ފޮތްތައް އަންނަނީ ފެންނަމުންނެވެ. ދިމަޝްޤާއި އެހެން ސިޓީތަކުގައި މީގެ ކުރިން މަނާކޮށްފައިވާ ފޮތްތައް ހިމެނޭހެން ފޮތް މައުރަޒުތައް ބާއްވަމުންދާއިރު، މީގެ ކުރިން ބަންދުކޮށްފައިވާ ޗާޕުޚާނާތައްވެސް ވަނީ އަލުން މުޅިން ހުޅުވާފައެވެ.
އެހެންނަމަވެސް، މަޝްރަހު ދިރާސާކުރާ ފަރާތްތަކުން ފާހަގަކުރާ ގޮތުގައި ސީރިއާގެ މި ފިކުރީ މިނިވަންކަމަކީ އަދިވެސް ނާޒުކު ހާލަތެއްގައި އޮތް ކަމެކެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!