އީރާނާ ގުޅުން އޮންނަ 'ހަންޑަލާ' ހެކަރުންގެ ގްރޫޕުން، އިސްރާއީލުގެ އަސްކަރިއްޔާގެ ކުރީގެ ޗީފް އޮފް ސްޓާފް ހަރްޒީ ހަލޭވީގެ ފޯނު ހެކްކޮށް، އޭނާ ސިއްރު ގޮތަކަށް ގަތަރަށް ކުރި ދަތުރެއްގެ މައުލޫމާތު ލީކުކޮށްލައިފިއެވެ.
މި ދަތުރުގައި ގަތަރުގެ އަމީރު ހަމަދު ބިން އަލް-ޘާނީއާ އޭނާ ބައްދަލުކުރި ކަމަށްވެސް އެ ގްރޫޕުން ލީކުކޮށްލި މައުލޫމާތުން އެނގޭކަމަށް ރިޕޯޓްތައް ބުނެއެވެ.
'ހަންޑަލާ ހެކް ޓީމް' އިން އާންމުކޮށްފައިވާ ގޮތުގައި، 2025 ވަނަ އަހަރު މަގާމުން ވަކިވި ހަލޭވީގެ ފޯނާއި ކްލައުޑް އެކައުންޓްތަކުން ގިނަ އަދަދެއްގެ މައުލޫމާތު އެ ގްރޫޕުން ވަނީ ނަގާފައެވެ. މީގެ ތެރޭގައި ގިނަ އަހަރުތަކެއްގެ މަތިން އެއްކޮށްފައިވާ 19،000 އަށްވުރެ ގިނަ ފޮޓޯއާއި ވީޑިއޯ ހިމެނޭ ކަމަށް އެ ގްރޫޕުން ބުނެއެވެ.
އޭގެ ތެރޭގައި ހިމެނެނީ:
- އޭނާގެ އަމިއްލަ އަދި އާއިލީ ފޮޓޯތަކާއި ވީޑިއޯތައް.
- އިސްރާއީލުގެ އަސްކަރީ މަރުކަޒުތަކާއި، ކްރައިސިސް ރޫމްތަކާއި، ޗާޓުތަކުގެ އިތުރުން ކޮމާންޑް ސެންޓަރުތަކުގެ އެތެރޭގެ މަންޒަރުތައް.
- ސަރަހައްދީ ގައުމުތަކުގެ އަސްކަރީ އިސްވެރިންނާއެކު ބޭއްވި ބައްދަލުވުންތަކުގެ ފޮޓޯތައް.
އިސްރާއީލުގެ މީޑިއާތަކުން (ޓައިމްސް އޮފް އިސްރާއީލް، ޔެނެޓް، ހާރެޓްޒް އަދި އައި24 ނިއުސް) އާއި ބައިނަލްއަގުވާމީ މީޑިއާތަކުން މިކަން ކަށަވަރުކޮށްދެމުން ބުނެފައިވަނީ، ހެކަރުން ބައެއް މައުލޫމާތު އާންމުކޮށްފައިވާ ކަމަށެވެ. އިސްރާއީލުގެ މަސްދަރުތަކުން މިކަން ބަލަނީ ނަފްސާނީ ހަނގުރާމައެއްގެ ގޮތުގައި އިސްރާއީލު ލަދުގަންނުވާލުމަށް ހިންގާފައިވާ ސައްހަ ހެކްކުރުމެއްގެ ގޮތުގައެވެ.
ގަތަރު ދަތުރާ ގުޅޭގޮތުން ލީކުވި ފޮޓޯތަކުން ހަލޭވީ ގަތަރުގައި ހުރިކަން ސާފުކޮށް އެނގެއެވެ. އެގޮތުން އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ކުރީގެ ވެރިޔާ ޖެނެރަލް މައިކަލް ކުރިއްލާއާއެކު ބޭއްވި ބައްދަލުވުމެއްގެ ފޮޓޯއެއް ވަނީ އާންމުކޮށްފައެވެ. އެ ފޮޓޯގެ ފަހަތުން ފާރުގައި ގަތަރުގެ އަމީރު ޝައިޚް ތަމީމް ބިން ހަމަދު އަލް ޘާނީގެ ބޮޑު ފޮޓޯއެއް ފެންނަން ހުރެއެވެ. އިސްރާއީލުގެ ރިޕޯޓުތައް ބުނާގޮތުން މި ބައްދަލުވުންތަކަކީ މީގެ ކުރިން އާންމުންނަށް ސިއްރުކޮށްފައިވާ ބައްދަލުވުންތަކެކެވެ.
ހަލޭވީ ގަތަރަށް ކުރި ސިއްރު ދަތުރުގައި އޭނާ އާއި އަމީރު ތަމީމް ސީދާ ބައްދަލުކުރެއްވި ކަމުގެ ފުރަތަމަ ކަށަވަރު ހެކި ކަމަށް ބުނެ ފެތުރޭ ވާހަކަތަކުގައި ކުޑަ ޚިލާފެއް އުފެދޭކަމަށް ބައެއް މަސްދަރުތަކުން ވަނީ ބުނެފައެެވެ. އެއީ އާންމުވެފައިވާ ފޮޓޯތަކުން ހަލޭވީ ގަތަރުގެ މާހައުލެއްގައި ބައްދަލުވުންތަކެއް ކުރިއަށް ގެންގޮސްފައިވާކަން އެނގުނު ނަމަވެސް ސީދާ އަމީރާއެކު ވަކިން ބޭއްވި ބައްދަލުވުމެއްގެ ފޮޓޯ ލީކުކޮށްލާފައި ނުވުމެވެ.
މީގެ އިތުރުން، ހަލޭވީ އުރުދުންގެ އަސްކަރީ ވެރިޔާއާ ބައްދަލުކުރުމާއި ޔޫއޭއީގެ ބައެއް ތަންތަނަށް ޒިޔާރަތްކުރާ ފޮޓޯތައްވެސް ހަންޑަލާ އިން ވަނީ އާންމުކޮށްފައެވެ. އެ ގްރޫޕުން މިކަން ސިފަކުރަނީ "ޒަޔަނިސްޓުންނާއި އަރަބިންގެ މެދުގައި އޮންނަ ގާތް ގުޅުން" ކަޝްފުކުރުމުގެ ގޮތުގައެވެ.
ހަންޑަލާ އަކީ މީގެ ކުރިންވެސް އިސްރާއީލުގެ ސަރުކާރުގެ އިސްވެރިންނަށް އަމާޒުކޮށް ސައިބާ ހަމަލާތައް ދީފައިވާ ގްރޫޕެކެވެ. އެމީހުންގެ އުކުޅަކީ ހަގީގީ މައުލޫމާތު ވަގަށް ނެގުމަށްފަހު، އޭގެ ތެރެއިން ލަދުގަންނުވާލެވޭ ފަދަ މައުލޫމާތުތައް ހޮވާލައިގެން އާންމުކޮށް ހަގީގަތް ހާމަކޮށްދިނުމެވެ.
އިސްރާއީލުގެ އޮފިޝަލުން މި ހާދިސާއާ ގުޅޭގޮތުން ތަފްސީލީ ބަޔާނެއް ނެރެފައި ނުވިނަމަވެސް، މިއީ ސަލާމަތީ ގޮތުން ނުރައްކާތެރި ހާދިސާއެއްގެ ގޮތުގައި ބަލައި ސީރިއަސްކޮށް ވަނީ މައްސަލަ ނަގާފައެވެ. ހާއްސަކޮށް ފޯނު ހެކްކުރި ގޮތަކާއި، އައިކްލައުޑް ނުވަތަ ގޫގުލް ސިންކް މެދުވެރިކޮށް މައުލޫމާތު ނެގި ގޮތަކާ މެދު ވަނީ ސުވާލު އުފައްދާފައެވެ.
މި ހާދިސާއަކީ އިސްރާއީލާއި އީރާނުގެ މަސްރަހު ނުތަނަވަސްވެފައިވާ ދަނޑިވަޅެއްގައި، މައުލޫމާތު ބޭނުންކޮށްގެން ހިންގާ ސައިބާ ހަނގުރާމައިގެ ބައެކެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!